ROMANOS 5 - Xochapa Mixteco

Naꞌa na ndíkundoo vaꞌa xiꞌin Ndioxi

¹ Xaꞌa ya kándixa yo Tata yo Jesucristo, ta Ndioxi ndása ra mií yo ndúu yo naꞌa, na vaꞌa, na íin tá íin naꞌa na köo ka kuachi kúu mií nuu ra, chi Tata yo Jesucristo ku ra si̱kitaꞌan mani yoo xiꞌin Ndioxi, ndi̱kundoo vaꞌa yo xiꞌin ra.

² Saa tu xaꞌa ya kándixa yo Jesucristo kua ndi̱niꞌi uun yo nuu ndi̱kiꞌvi yo ndi̱kitaꞌan vaꞌa ni yo xiꞌin Ndioxi, ta ni küxika ka yo nuu ra. Saa kúsini ni yo chi kúndaa teꞌe ini yo ya koo yo xiꞌin ra nuu kuni yo ya chee ni kúu mií Ndioxi.

³ Ta süvi ndisaa xaꞌa ya vaꞌa yóꞌó ku ya kúsini yo, chi kúsini tu yo tá vaxi tindoꞌo nuu va yo. Saa chi xíni yo ndiꞌi tindoꞌo ndóꞌo yo ta xáa ndee ka ya ini yo xiꞌin ya uꞌvi vaxi nuu yo, ta ndee ka ndíkundikun yo ichí Ndioxi.

⁴ Saa chi tá kúndee ini yo, xáꞌa ndee ini yo xaꞌa ndá ka ya uꞌvi vaxi nuu yo, ta saa kua, ndúu yo naꞌa na íyo ndúvi ikan ya vaꞌa, ya kúni mií Ndioxi. Tá íkan yo saa, ta kúndaa teꞌe ini yo ya ndixa kua sixinu ndiꞌi Ndioxi ya ndi̱kaꞌan ra xiꞌin yo.

⁵ Ta ni süvi ya mani uun ku ya ndáa ini yo ya sixinu Ndioxi ya ndi̱kaꞌan ra xiꞌin yo, chi ndee ni si̱niꞌi ra Tachi I̱í ra nuu yo, nda tá kuꞌva chútu ndaa tikuii ini iin vaso, ndakua xíta ndaa rá yuꞌu ya, kuꞌva saa íkan Tachi I̱í Ndioxi xiꞌin yo, iin síkutu ndaa ya mií yo xiꞌin ya kúꞌvi ni ini ra xíni ra yoo.

⁶ Kivi tá xi̱ndoꞌni yo ndaꞌa kuachi ta köo ndíkuchiñu yo saña yo mií yo ndaꞌa ya. Ni köo ndi̱kuchiñu yo sikaku yo mií yo, nda kivi tá chi̱tuni mií Ndioxi, saa kua ki̱xi Jesucristo ndi̱xiꞌi ra xaꞌa kuachi yo.

⁷ Xa xíni mií yo nda iin naꞌa ta köo na taxi mií ya kuvi na xaꞌa inka naꞌa, ni na ndaa ni ini ku na. Ta saa ni án ndá sana íyo sava naꞌa kuchiñu kuvi xaꞌa inka naꞌa, na vaꞌa ni.

⁸ Ta süvi saa ndi̱kan Ndioxi, chi si̱naꞌa ra mií ra ya kúꞌvi ni ini ra xíni ra yoo, vani ndee ni káa kuachi yo, ta xaꞌa ya kúꞌvi ni ini ra xíni ra yoo, yakan ti̱ꞌvi ra Jesucristo ki̱xi ra ndi̱xiꞌi ra xaꞌa yo, ni yo ivi kuachi ndi̱xiyo yo.

⁹ Ta ndisaa ka vi vitin, sïndoꞌo ka Ndioxi yoo kivi tá ná taxi ra kuachi xaꞌa ndiꞌi ni kúu na ñuu ivi yóꞌó, xaꞌa ya ndi̱xiꞌi Jesucristo xaꞌa yo kua nda̱sa ra mií yo ndu̱u yo tá íin naꞌa, na köo ka kuachi kúu mií nuu Ndioxi.

¹⁰ Chi yachi tá íin yo ka̱nitaꞌan xiꞌin Ndioxi saa ndi̱xiyo yo, xaꞌa ya köo ndi̱xaa súvi yo ya káꞌan ra xiꞌin yo. Vani saa i̱kan yo, ta saa ni si̱kitaꞌan mani ra yoo xiꞌin mií ra, xaꞌa ya ti̱ꞌvi ra Seꞌe ra Jesucristo ki̱xi ra ndi̱xiꞌi ra xaꞌa yo. Ta ndisaa ka ví vitin sikaku ra yoo, chi xa ndi̱kitaꞌan mani yo xiꞌin ra.

¹¹ Ta saa ni, süvi ndisaa ya yóꞌó ku ya táxi kusini yo, chi kúsini ni yo, ya xáa kaꞌnu ini Ndioxi xaꞌa yo. Ta xaꞌa ya i̱kan Tata yo Jesucristo xa̱a súvi ra chiñu ya si̱kitaꞌan mani ra yoo xiꞌin Ndioxi, ta vitin ndi̱kundoo vaꞌa yo xiꞌin ra.

Ya i̱kan Jesucristo xaꞌa kuachi ra Adán

¹² Ta vaꞌa ná ndituꞌun i xiꞌin ndo vitin chi tá xi̱koo kuachi ñuu ivi yóꞌó ta xaꞌa ya köo ndíkandixa iin taa ra xi̱nani Adán Ndioxi kua xi̱koo ya. Ta xaꞌa kuachi ya i̱kan ra ikán ku nuu ndi̱kunduꞌu ndìì ya xáꞌni naꞌa. Ta xa xíni yo na íyo kuachi ku ndiꞌi ni kúu naꞌa, ta xaꞌa ya ikán kua xíniñuꞌu na kuvi na.

¹³ Xa kuaꞌa ni va ya väꞌa íkan na ñuu ivi yóꞌó, tá täꞌan ka taxi Ndioxi ley ra ndaꞌa ra Moisés. Nda tiempo ra Adán iin saa nda tiempo ra Moisés ta köo ndísikuiso Ndioxi kuachi na, chi köo ley ra ndi̱xiyo ndaꞌa na.

¹⁴ Sundi saa ni ndiꞌi naꞌa na xi̱taku ñuu ivi yóꞌó tiempo ikán, iin saa nda tiempo ndi̱xiyo ra Moisés, ta iin ndi̱xiꞌi ndiꞌi na ikán xaꞌa ya väꞌa i̱kan na. Vani süvi taꞌan kuachi ya i̱kan ra Adán ku kuachi na, ta saa ni i̱kan na ya väꞌa. Xaꞌa ya ikán kua xi̱niñuꞌu ni kixi inka taa, ra káa tá káa ra Adán. Ta ra ikán ku Jesucristo ra ki̱xi ñuu ivi yóꞌó.

¹⁵ Chi ni köo iin káchi íin ya vaꞌa i̱kan Ndioxi xiꞌin ya väꞌa i̱kan ra Adán. Chi ndiꞌi naꞌa ndi̱xiꞌi xaꞌa kuachi ra Adán. Sundi chee ni ka ya vaꞌa i̱kan iin taa, ra kúu Jesucristo xiꞌin yo. Ndi̱xaꞌvi ni Ndioxi kuaꞌa ni naꞌa ndi̱niꞌi ya vaꞌa nuu ra, ya táxi koo vaꞌa yo xiꞌin ra, xaꞌa ya kúꞌvi ni ini ra xíni ra yoo.

¹⁶ Ta xaꞌa kuachi i̱kan ra Adán nuu Ndioxi kua ndi̱ꞌi xaꞌa ndiꞌi yo, ku̱xika ndiꞌi yo nuu Ndioxi. Sundi xaꞌa ya vaꞌa, ya si̱niꞌi uun Ndioxi nuu yo ta síin va káa ya: Chi xaꞌa ya ndee ni ndee ndi̱xiyo kuachi yo nuu Ndioxi yakan kua xi̱niñuꞌu ni yo ndikiꞌin yo ya vaꞌa, ya síniꞌi uun Ndioxi nuu yo, saa nda̱sa ra mií yo, ndu̱u yo tá íin naꞌa, na köo ka kuachi kúu mií nuu ra.

¹⁷ Xaꞌa kuachi iindaa taa, ra núnuu ku nuu xa̱á xáꞌnda chiñu ndìì ya xáꞌni ndiꞌi naꞌa. Sundi ndiꞌi naꞌa, na ndíkuiso ya vaꞌa ta̱xi Ndioxi ndaꞌa na, ta kutaku na tin kaꞌnda chiñu na xiꞌin ra. Chi iindaa mií taa, ra kúu Jesucristo ku ra táxi kutaku yo, saa nda̱sa ra yoo ndu̱u yo tá íin naꞌa, na köo ka kuachi kúu mií nuu ra.

¹⁸ Xaꞌa kuachi iin mituꞌun taa, ra Adán kua ku̱xika ndiꞌi yo nuu Ndioxi. Nda saa xa̱á ndiꞌi na ñuu ivi yóꞌó xíꞌi na. Ni saa va, sundi xaꞌa ya vaꞌa i̱kan Jesucristo kua ta̱xi Ndioxi kutaku yo, ndi̱kuiso ra yoo ndu̱u yoo tá íin naꞌa, na köo ka kuachi kúu mií nuu ra, saa ta̱xi ra kutaku yo xiꞌin ra.

¹⁹ Xaꞌa ya köo ndíxiin iin taa kuni soꞌo ra ya ndi̱kaꞌan Ndioxi xiꞌin ra, xaꞌa ya ikán kua ndu̱u na, naꞌa na kúu mií kuachi nuu Ndioxi. Ta saa ni xaꞌa ya vaꞌa ni xi̱ni soꞌo iin taa ya ndi̱kaꞌan Ndioxi xiꞌin ra, xaꞌa ya i̱kan ra saa, ta kuaꞌa ni na ñuu ivi ndi̱niꞌi ya vaꞌa sata ra. Xaꞌa ya ikán kua ndasa vaꞌa ra na, ndu̱u na na vaꞌa, na köo ka kuachi kuu mií nuu ra.

²⁰ Tá ta̱xi Ndioxi ley ra ndaꞌa na, saa kua ku̱ndaa ini na ya ndee ni íyo kuachi na nuu ra. Tá ndee ni nda̱a kuachi na ta saa ndee ni ka ndaa tu ya vaꞌa i̱kan Ndioxi xiꞌin va na, xaꞌa ya kúꞌvi ni ini ra xíni ra na.

²¹ Tá täꞌan ka kixi Jesucristo, ta ndee ya kúu mií kuachi na ku ya xa̱ꞌnda chiñu nuu na ta xa̱á ya xáꞌni ya na. Sundi vitin ta ndee ni ka ndee ya vaꞌa ta̱xi Ndioxi xáꞌnda chiñu nuu ndiꞌi yo kándixa Jesucristo xaꞌa ya kúꞌvi ni ini ra xíni ra yoo. Nda̱sa vaꞌa Ndioxi yo nuu ra, ndu̱u yo tá íin naꞌa, na köo ka kuachi kúu mií nuu ra, ta saa ta̱xi ra ya kutaku yo xiꞌin ra ndiꞌi saa kivi ya vaxi.