ROMANOS 11 - Xochapa Mixteco

Köo ndi̱kundasi nuu Ndioxi na ñuu ra

¹ Xaꞌa ya ñaa kua ndákan tuꞌun tuku i mií i, káchi i: ¿Án sana xa ku̱ndasi nuu va Ndioxi na ñuu ra, na Israel? káꞌán i. Ta süvi ya ndaa ku ya, saa chi ni mií i ta ra Israel ku tu yeꞌe va. Chi yeꞌe ta ka̱ku i tixin seꞌe ñani sikua ra Abraham, ta na veꞌe ra Benjamin ku i.

² Xiꞌin ya yóꞌó kúndaa ini yo ya köo ndi̱kundasi nuu Ndioxi kuni ra na ñuu ra, na ndi̱kaxin ra. ¿Án ñúꞌu ini ndo xaꞌa ya ndi̱kaꞌan ra profeta Elías, ra ndi̱kaꞌan tuꞌun yuꞌu Ndioxi xinaꞌa, tá ndi̱kaꞌan kuachi ra xaꞌa na Israel nuu Ndioxi, káchi ra saa:

³ “Tata mií yo Ndioxi, xa xa̱ꞌni ndiꞌi na nda profeta, nda ndi̱kaꞌan ndoso tuꞌun yuꞌu un. Xa si̱ndiꞌi tu na xaꞌa ndiꞌi yu̱ú nama ií nuu si̱niꞌi nde kiti nuu va un, ya xáa kaꞌnu nde yóꞌo̱. Siíndaa yeꞌe ku i ndi̱ndoo táku i, ta vitin kúni na kaꞌni na yeꞌe”, káchi ra Elías xiꞌin Ndioxi.

⁴ Saa ndi̱kuiin Ndioxi ndi̱kaꞌan ra xiꞌin ra, káchi ra saa: “Kündiꞌi ini un chi xa íyo ka uxa mil taa nda ndi̱kaxin i ndíkun yeꞌe, ta köo ndi̱kusiti nda nuu ndioxi, ya síkí, náni Baal”, káchi Ndioxi xiꞌin ra Elías.

⁵ Ta saa tu vitin va, íyo ka iin tiꞌvi loꞌo na ñuu i Israel, na ndi̱kaxin Ndioxi ndíkun na ra, xaꞌa ya kúꞌvi ni ini ra xíni ra na.

⁶ Xaꞌa ya vaꞌa ni Ndioxi kua i̱kan ra saa xiꞌin yo, süvi xaꞌa nda iin ya vaꞌa íkan yo kua ndi̱kaxin ra yoo, xaꞌa ya kúꞌvi ni ini ra xíni ra yoo kua i̱kan ra saa xiꞌin yo. Saa chi tá tu xaꞌa ya vaꞌa íkan yo kua, ta köo ndáa yaꞌvi ya ndi̱niꞌi uun yo nuu Ndioxi, ya kúꞌvi ni ini ra xíni ra yoo, ndikuu.

⁷ Saa ná kundaa ini yo ndá kuꞌva íyo ya: süvi ndiꞌi na Israel ndi̱kuchiñu niꞌi ya ndúku na, ndisaa iin tiꞌvi na ndi̱kaxin Ndioxi ku na ku̱chiñu ndi̱niꞌi ya, saa chi inka tiꞌvi ikán ta ndee ni ndu̱tuun ini na.

⁸ Tá káꞌan tuꞌun Ndioxi ya ta̱a na xinaꞌa, káchi ya: “Mií Ndioxi ku ra si̱naa ini na kíxi na. Ndi̱kasi ra nuu na ya köo kúchiñu na koto na ya ndaa, ndi̱kasi tu ra soꞌo va na ya ná küni soꞌo na, saa íin na nda kivi vitin”, káchi tuꞌun Ndioxi.

⁹ Saa ndi̱kaꞌan tu ra rey David va, káchi ra soꞌva: “Viko ya ndítava na, ta ná nduu ya tá káa iin yavi nuu kóyo sana naꞌa. Án tá káa iin ñunu ya íyo sěꞌe nuu kákuꞌun kiti saa ná koo na, ná ndiꞌi xaꞌa na tá kuꞌva chi̱tuni mií Ndioxi.

¹⁰ Ná ndukuaa na, ná küchiñu ka na koto na. Ná tixuꞌvi ni na ndakua ndutoso sata na”, káchi tuꞌun Ndioxi ya ta̱a ra rey David xaꞌa na xinaꞌa.

Kúni tu Ndioxi sikaku ra naꞌa, na köo kúu judío

¹¹ Saa ndákan tuꞌun tuku i, káchi i soꞌva: ¿Án ndi̱koyo na judío ta ni ndïkuita na, túvi ndo? ¡Köo ndi̱ndoꞌo na saa! Xaꞌa ya köo ndi̱xiin na kuni soꞌo na ya ndi̱kaꞌan Ndioxi xiꞌin na, ta nda na köo kúu judío kee vaꞌa, chi sikaku Ndioxi na, ya ná ndukuiñu ini na judío, ta saa ndiko koo tuku na ndikundikun na Ndioxi.

¹² Kuachi na judío kua köo ndi̱xiin na kuni soꞌo na ya ndi̱kaꞌan Ndioxi xiꞌin na. Yakan vitin ta ndiꞌi ni kúu na ñuu ivi ndi̱niꞌi ya vaꞌa i̱kan Ndioxi, nda na köo kúu judío vaꞌa ni ke̱e. Sundi tá ná kuni soꞌo na judío ya káꞌan Ndioxi xiꞌin na, ta vaꞌa ni ka kee na.

¹³ Ta vitin káꞌan i xiꞌin ndóꞌo̱ köo kúu judío, ya ná kundaa ini ndo, yeꞌe ku ra apóstol, ra ti̱ꞌvi Ndioxi vaxi i kaꞌan ndoso i tuꞌun ra xiꞌin ndo, ta chiñu ndee ni ndee ku ya yóꞌó nuu i, ndáa yaꞌvi ni ya.

¹⁴ Yakan ndee ni ndíkundee i káꞌan ndoso i tuꞌun ra xiꞌin ndo, chi kúni i ná ndukuiñu xiní na ñuu i kuni na ndóꞌo̱, ta saa ndiko koo na nuu Ndioxi ya sikaku ra sava na.

¹⁵ Xaꞌa ya ku̱ndasi Ndioxi xi̱ni ra na judío, yakan vaꞌa ku̱yati ndiꞌi ni kúu na ñuu ivi nuu ra. Tá ná ndikuiso mani tuku Ndioxi na judío nuu ra, ta nditaku na. Chi vitin tá íin na xa ndíi saa íin na nuu ra.

¹⁶ Vitin ná ndituꞌun i inka tuꞌun xiꞌin ndo ya kundaa ini ndo: Tá táꞌvi na uxan íya ta síkuaꞌa na xita vaꞌa ya núnuu táxi na ya ndaꞌa Ndioxi ndúu ií ya, ta ndiꞌi ka mií uxan ya ndi̱ndoo ikán ndúu ií ndiꞌi ya. Kuꞌva saa kúndaa tu ini yoo xiꞌin tioꞌo itun va, tá ndúu ií tioꞌo nu, ta saa ndúu ií ndiꞌi tu ndaꞌa va nu.

¹⁷ Ta ya káꞌan i xiꞌin ndo xaꞌa itun yóꞌó kua, kúni i ná kundaa ini ndo. Saa chi sava na judío, Tá íyo ndaꞌa itun olivo, itun tàtà, ta ndi̱taꞌnu ndaꞌa nu, saa íin na. Ta ndaꞌa nu nuu ndi̱taꞌnu ikán kua ndi̱kunuꞌni inka ndaꞌa olivo itun ikú, ya kuchiñu kuaꞌnu itun ikú xiꞌin sikui vaxi tioꞌo itun olivo tàtà. Tá íin ndaꞌa itun olivo ikú, saa íin ndóꞌo̱, köo kúu judío.

¹⁸ Ta xaꞌa ya ñaa kua käꞌan tái ni ndo ya vaꞌa ni ka mií ndo nuu na judío. Tá tu ndíkani ini ndo saa, ta ndikáꞌan ini ndo, süvi ndóꞌo̱ ku ndo táxi táku tioꞌo itun olivo ikán, mií tioꞌo nu ku ya táxi táku ndo.

¹⁹ Ta án sana kaꞌan tu sava ndo, kachi ndo saa: “Saa ndixa íyo va ya, xa ndi̱taꞌnda ndaꞌa itun olivo tàtà, ya kuchiñu sitiin ndaa Ndioxi ndeꞌe íin tá íyo itun olivo ikú”, kachi ndo.

²⁰ Saa ndixa íyo ya, vaꞌa kundaa ini ndo. Chi ya ndi̱taꞌnda ndaꞌa itun olivo tàtà ikán, ta xaꞌa ya köo ndi̱xiin na kandixa na Cristo kua. Yakan vaꞌa ndi̱kundikun ndóꞌo̱ íin tá íyo itun olivo ikú. Yakan kütai ni ini ndo, vaꞌa ni ka ná ku íꞌvi ndo kuni ndo Ndioxi.

²¹ Saa chi tá tu köo ndi̱xaa kaꞌnu ini Ndioxi xaꞌa itun olivo tàtà, ta saa xäa kaꞌnu tu ini ra xaꞌa ndóꞌo̱ íin tá íin ndaꞌa itun olivo ikú va.

²² Koto ndó, vaꞌa ni Ndioxi kúndaꞌvi ni ini ra xíni ra yoo, sundi köo sísiki ra xiꞌin naꞌa, na köo xíin kandixa ñaꞌa, ta kúndaꞌvi ni ini ra xíni ra ndóꞌo̱. Yakan kua kandixa ni ndo ra, tuun ni kandixa ndo ya kúndaꞌvi ni ini ra xíni ra ndóꞌo̱. Tá tu köo íkan ndo saa, ta ìyo xaa xíka ra ndóꞌo̱, tá kuꞌva kúxika ndaꞌa itun tá táꞌnda nu.

²³ Saa ni, tá ná ndinama ini na judío, ta xáa na kandixa ni tuku na Ndioxi, chi kúu mií ra ndee ya kuchiñu ndikuiso tuku ra na. Ta saa sitiin tuku ra na ndaꞌa itun olivo nuu ndi̱xiyo na yachi.

²⁴ Saa chi mií ndo, ta tá íin itun olivo ikú saa ndi̱xiyo ndo, ta ku̱chiñu ndo ndi̱tiin ndo ndaꞌa itun olivo tàtà, nuu köo ndi̱xiyo ndo yachi. Ta ndisaa ka vi na judío, vaꞌa ni ka nditiin tuku na ndaꞌa itun nuu xa ndi̱xiyo na yachi.

Vaxi kivi ndikuiso tuku Ndioxi na ñuu ra na Israel

²⁵ Ñani yo xiꞌin kuꞌva yo, ndóꞌo̱ köo kúu judío, kúni i kaꞌan i xiꞌin ndo ya ná kundaa ini ndo xaꞌa chiñu ya íyo sěꞌe ikan Ndioxi. Yakan kua xäa xíni ni ndo mií ndo, saa chi sava mií na Israel ta ndee ni ndu̱tuun ini na, köo xíin na kandixa na Jesucristo, ta saa ikan na nda ná xinu naꞌa, na köo kúu judío, na ndi̱kaxin Ndioxi sikaku ra.

²⁶ Ta saa ku nuu kaku ndiꞌi na judío tá kuꞌva káꞌan tuꞌun Ndioxi ya ta̱a na xinaꞌa, káchi ya saa: Vaxi kivi ta kixi iin ra sikaku naꞌa, ñuu Sión kee ra, ta ra ikán vaxi ra sikaku ra na veꞌe ra Jacob, kindaa ndiꞌi ra ñaꞌa ya väꞌa íkan na, káchi ya.

²⁷ Saa ndi̱kaꞌan ka Ndioxi, káchi ra: Ya kíndoo i xiꞌin na vitin kua ndikata i ndiꞌi ni kúu kuachi na, káchi tuꞌun Ndioxi.

²⁸ Ta vitin xaꞌa ya ku̱ndasi nuu na judío xi̱ni na tuꞌun vaꞌa xaꞌa Jesucristo, yakan kua kúu na naꞌa, na káni taꞌan xiꞌin Ndioxi. Ta xaꞌa ya íkan na saa, ta nda ndóꞌo̱ köo kúu judío ndi̱niꞌi ya vaꞌa kandixa ndo Jesucristo. Ta saa ni kúꞌvi ni ini Ndioxi xíni ra na ikán, saa chi na ikán ku na ndi̱kaxin ra, kúu na ñuu ra, tá íyo ya ndi̱kaꞌan ra nuu ki̱ndoo ra xiꞌin xii sikua na xinaꞌa.

²⁹ Saa chi Ndioxi, ta köo kíndaa ra ñaꞌa ya xa ta̱xi ra ndaꞌa naꞌa, ni naꞌa na ka̱na ra, ta xa na ka̱na ra kúu va na, köo ndíko koo ini ra xaꞌa ya íkan ra xiꞌin na.

³⁰ Saa ndóꞌo̱, yachi ta köo ndi̱xiin ndo kandixa ndo Ndioxi. Ta vitin ndi̱niꞌi ndo ya vaꞌa nuu ra, ku̱ndaꞌvi ini ra xi̱ni ra ndóꞌo̱, xaꞌa ya köo ndi̱xiin na judío kandixa na ra.

³¹ Ta vitin ta na judío ku naꞌa, na köo xíin kandixa Ndioxi, ta ndóꞌo̱ ndi̱niꞌi ndo nuu Ndioxi ya kúndaꞌvi ini ra xíni ra ndóꞌo̱. Íkan ra saa xaꞌa ya kúni ra ná ndiko koo na nuu ra, ta niꞌi tu na ikán va nuu ra ya kundaꞌvi ini ra kuni ra na.

³² Xaꞌa ya köo ndi̱xini soꞌo na ñuu ivi ya ndi̱kaꞌan Ndioxi xiꞌin na, yakan ndu̱u na tá íin naꞌa na ñúꞌu veꞌe kàà. I̱kan Ndioxi saa ya kuchiñu kundaꞌvi ini ra kuni ra ndiꞌi ni kúu yo.

³³ ¡Ndíkanda ni va ini yo xaꞌa ya kuika kúu mií Ndioxi, ta saa ndee ni vi ndíchi ra, íyo ka vi ya xínituni ra. Nda iin mituꞌun naꞌa küchiñu kundaa ini ya ndikani na ndá kuꞌva xáa súvi ra chiñu ya kúni mií ra!

³⁴ Ta ¿unku vi naꞌa kuchiñu kundaa ini xaꞌa ya ndíkani ini Ndioxi? Ta ¿án ndá íyo vi naꞌa kuchiñu kaꞌan xiꞌin Ndioxi ndá ñaꞌa kua xíniñuꞌu ra ikan ra?

³⁵ Ni köo naꞌa kaꞌan saa: “Xiꞌna taxi yo ya vaꞌa ndaꞌa Ndioxi, ta sindiꞌi saa ndiko koo ra taxi ra ya vaꞌa ya kúni mií yo ndaꞌa yo”, kachi na.

³⁶ Mií Ndioxi ku ra si̱kuaꞌa ndiꞌi ni kúu ñaꞌa ya íyo, xaꞌa mií ra si̱kuaꞌa ra ndiꞌi ya, ta ndiꞌi ya ndi̱kuaꞌa íyo ya xaa súvi ya kúni mií ra. ¡Yakan kua ná kunuu vaꞌa ni ya toꞌo ra ndiꞌi saa tiempo! Saa ná koo.