Los Hechos 8 - Xochapa Mixteco

Xíka ra Saulo kánitaꞌan ra xiꞌin na kándixa Jesús

¹ Saa tu ra Saulo va ndi̱xiyo yuꞌu ra xiꞌin na xa̱ꞌni ra Esteban. Tá ndi̱xiꞌi ra saa ku nuu xa̱á tíxuꞌvi ni na ndíkun Jesús ndóo ñuu Jerusalén, xaꞌa ya ikán kua ndi̱xita yava ndiꞌi na kuaꞌan na. Sava na kuaꞌan ñuu Judea xiꞌin ñuu Samaria, siin nda apóstol ku nda ndi̱ndoo ñuu Jerusalén.

² Saa ndi̱xaꞌan sava nda taa, nda ndee ni ndíkun Jesús ku nda ndi̱xaꞌan si̱nduxin ra Esteban, ta ndee ni xáku nda xaꞌa ra.

³ Saa xa̱á ra Saulo xíka ra kánitaꞌan ra xiꞌin na ndíkun Jesús, kuakiꞌvi ra ini veꞌe na, tá veꞌe, tá veꞌe kuakiꞌvi ra táva ra na, taa ku nda ñaꞌa ku ná, iin ñúu ndai ra na kuaꞌan xiꞌin ra veꞌe kàà.

Káꞌan ndoso na tuꞌun vaꞌa xaꞌa Jesús xiꞌin na ñuu Samaria

⁴ Tá ndi̱xita na ndíkun Jesús, ka̱na koo na ñuu Jerusalen kuaꞌan na, ta ndiꞌi saa ñuu nuu kuaꞌan na ta ndítuꞌun na tuꞌun vaꞌa xaꞌa Jesús kuaꞌan na.

⁵ Taꞌan na ke̱e ikán ku tu ra Felipe va, ta ke̱e ra kuaꞌan ra chí estado Samaria. Káꞌan ndoso ra tuꞌun vaꞌa xaꞌa Jesús, ya kúu ra Cristo.

⁶ Iin kátin naꞌa nuu ra táa soꞌo na ya káꞌan ra, ta kuaꞌa ni yatuꞌun Ndioxi xíto na tin xíni soꞌo na íkan ra nuu na.

⁷ Chi kuaꞌa ni na kúu mií tachi nduvaꞌa si̱ndaꞌa ra. Tá síndoo ya na kée ya kuaꞌan ya, ta iin ndáꞌi koꞌo ya síndoo ñaꞌa ya. Kuaꞌa ni ku tu na ndu̱chiꞌña xaꞌa tin na küvi kaka si̱ndaꞌa ra.

⁸ Xaꞌa ya ikán kua ndee ni kúsini mií na ñuu ikán.

⁹ Ta ñuu ikán íyo iin ra náni Simón, ta ra tasi ku ra. Ta kuaꞌa ni naꞌa si̱ndaꞌvi ra nuu ndi̱xika ra ñuu Samaria. Ndee ni taa kúu mií ra, káchi na xaꞌa ra.

¹⁰ Ta ndiꞌi na ikán xíni soꞌo ka vi na ya káꞌan ra xiꞌin na, na vali ku na, na naꞌnu ku na, ndiꞌi yaa na xíni soꞌo ya káꞌan ra. Ta káꞌan na xaꞌa ra, káchi na saa: ―Ndee Ndioxi ya ki̱xi nuu ndivi kua kúu mií ra yóꞌó ―káchi na xaꞌa ra.

¹¹ Suvi xiꞌin mií ya tasi ikán si̱ndaꞌvi ra na, yakan kándixa ni ñaꞌa na. Ta xa kuaꞌa ni tiempo si̱ndaꞌvi ra na kándixa na ra.

¹² Ta saa tá ka̱ndixa na tuꞌun ya káꞌan ndoso ra Felipe xiꞌin na xaꞌa ichí nuu xáꞌnda chiñu Ndioxi tin xaꞌa kivi Jesús. Ñaa ndikun chi̱chi na, nda taa tin ná síꞌi ku na chi̱chi.

¹³ Nda ra Simón, ra tási, ka̱ndixa tuꞌun ya ndi̱kaꞌan ra Felipe. Ta ndi̱xaꞌan ra chi̱chi ra xiꞌin na, saa xa̱á ra xíka ra xiꞌin ra Felipe. Ta ndíkanda ni ini ra xaꞌa yatuꞌun Ndioxi íkan ra Felipe.

¹⁴ Saa ku̱ndaa ini nda apóstol nda ndóo ñuu Jerusalén tuꞌun xaꞌa na Samaria. Tá ku̱ndaa ini nda ya ndi̱kiꞌin na ikán tuꞌun Ndioxi, ta saa ti̱ꞌvi nda ra Pedro xiꞌin ra Juan, kuaꞌan nda ñuu ikán.

¹⁵ Tá ndi̱xaa ra Pedro xiꞌin ra Juan ñuu Samaria ta ndi̱kaꞌan nda xaꞌa na kándixa Jesús xiꞌin Ndioxi ya ná ndikiꞌin na Tachi I̱í Ndioxi.

¹⁶ Saa chi nda iin na ikán täꞌan ndikiꞌin Tachi ra, takua chi̱chi kuiti na tixin kivi Jesús.

¹⁷ Ta saa chi̱nuu ndaꞌa ra Pedro xiꞌin ra Juan sata na, ta ndi̱kaꞌan nda xaꞌa na xiꞌin Ndioxi, ñaa ndi̱kiꞌin na Tachi I̱í Ndioxi.

¹⁸ Saa tá xi̱ni ra Simón ya ndíkiꞌin na Tachi I̱í Ndioxi tá chínuu ndaꞌa nda sata na, ta ñaa xa̱á ra táxi ra xuꞌun ndaꞌa nda,

¹⁹ káchi ra saa: ―Taxi ndo ndee taꞌan ya kúu mií ndo ñaa ndaꞌa i. Tá ná chinuu ndaꞌa i sata ndá ka naꞌa ta ná ndikiꞌin na Tachi I̱í Ndioxi ―káchi ra xiꞌin nda.

²⁰ Saa ndi̱kuiin ra Pedro káꞌan ra xiꞌin ra: ―Vaꞌa ná sindiꞌi xaꞌa Ndioxi yóꞌo̱ xiꞌin xuꞌun un, chi ndíkani ini un sata un Tachi I̱í Ndioxi.

²¹ Ta yóꞌo̱ küvi kiꞌvi un xiꞌin nde xaa chiñu un nuu Ndioxi, chi köo íyo ndaku nima un nuu ra.

²² Ndiko koo ini un xaꞌa kuachi un, ta nduku ya mani nuu Ndioxi xaꞌa ya íyo nima un án sana xaa kaꞌnu ini ra xaꞌa kuachi un.

²³ Saa chi xíto i ta süvi ichí vaꞌa kuaꞌan un, ichí väꞌa kuaꞌan un. Tá káa iin ra núꞌni saa káa un xaꞌa kuachi un ―káchi ra Pedro xiꞌin ra Simón ikán.

²⁴ Saa ndi̱kuiin ra káꞌan ra: ―Nduku loꞌo mií ndo ya mani xaꞌa i nuu Ndioxi, ya ná kündoꞌo i taꞌan ya ndi̱kaꞌan un xiꞌin i ―káchi ra.

²⁵ Sindiꞌi tá ndi̱kaꞌan ndoso ra Pedro xiꞌin ra Juan tuꞌun vaꞌa xaꞌa Jesús ya ti̱ꞌvi Ndioxi ra ki̱xi ra sikaku ra yo ñuu ivi yóꞌó, ta ndi̱xika nda mií ñuu Samaria ndi̱tuꞌun nda xiꞌin naꞌa. Ta saa ndi̱ko koo tuku nda kuaꞌan nda ñuu Jerusalén, ta ndítuꞌun nda xiꞌin ndiꞌi na ndóo ñuu vali nuu yáꞌa nda kuaꞌan nda ichí.

Ndi̱kitaꞌan ra Felipe xiꞌin iin ra taa ra ke̱e ñuu Etiopía

²⁶ Saa ku̱u iin ichí ndi̱kaꞌan iin tatun Ndioxi xiꞌin ra Felipe káchi ya saa, ―Kundichi kuáꞌan chí sur, chí ichí ya kéta ñuu Jerusalén ta kuanuu ya kuaꞌan ya chí ñuu Gaza ya ndíkaa iku yuyu ―káchi tatun Ndioxi xiꞌin ra.

²⁷ Ta saa ke̱e ra kuaꞌan ra. Tá kuaꞌan ra ichí ikán ta ndi̱kitaꞌan ra xiꞌin iin ra ke̱e inka ñuu xíka ya náni Etiopía. Ra kapo ku ra ikán ta xáa chiñu ra nuu yá reina yá náni Candace, yá xáꞌnda chiñu nuu mií na ñuu ra na Etiopía. Ta ndee ni chiñu kúu mií ra ikán nuu yá. Ndíso chiñu ra xiꞌin ndiꞌi xuꞌun yá. Ta ndi̱xaꞌan ra xa̱a kaꞌnu ra Ndioxi veꞌe ñuꞌu kaꞌnu ñuu Jerusalén.

²⁸ Saa ndi̱ko koo ra kuanuꞌu ra ñuu ra. Kánuu ra sata iin carreta itun ñúu kuai kuaꞌan ra. Ta níꞌi ra iin tutu káꞌvi ra kuaꞌan ra. Ta tutu ya ta̱a ra ndi̱kaꞌan ndoso tuꞌun yuꞌu Ndioxi, ra náni Isaías kua káꞌvi ra kuaꞌan ra.

²⁹ Saa ndi̱kaꞌan Tachi I̱í Ndioxi xiꞌin ra Felipe káchi ya saa: ―Kuyati kuaꞌan ndikitaꞌan un xiꞌin ra ínuu sata carreta kuaꞌan ñaa ―káchi ya xiꞌin ra.

³⁰ Ta saa ku̱yati ra nuu ra ikán. Tá ku̱yati ra ta xi̱ni soꞌo ra káꞌvi ra tutu ya ta̱a ra Isaías, ra ndi̱kaꞌan ndoso tuꞌun yuꞌu Ndioxi. Ñaa ndi̱ndakan tuꞌun ñaꞌa ra, káchi ra saa: ―Tata, ¿án kúndaa ini un unkua káꞌan tutu ya káꞌvi un ñaa? ―káchi ra xiꞌin ra.

³¹ Saa ndi̱kuiin ra káꞌan ra: ―Tata, ¿unkua ikan i kundaa ini i unkua kúni kaꞌan ya ta köo naꞌa ndikani ya nuu i? ―káchi ra. Ñaa ndi̱kaꞌan ra xiꞌin ra Felipe ndaa ra sata carreta nuu ínuu ra.

³² Saa nda̱a ra. Ta tuꞌun Ndioxi ya káꞌvi ra kuaꞌan ra, káchi ya saa: Tá ndóꞌo iin kiti levo loꞌo ndáka xitoꞌo ri kuaꞌan ri kuvi ri, saa ndo̱ꞌo ra. Ni köo ndi̱kaꞌan ra tá kuaꞌan ra xiꞌin na kuvi ra. Tá íkan levo loꞌo ni köo ndáꞌi ri iin yayaa ndíchi ri xáꞌnda na kachi sata ri, saa i̱kan ra. Yayaa xi̱ndichi ra nuu na, ni köo ndi̱xuna ra yuꞌu ra ya kaꞌan ra xiꞌin na.

³³ Si̱kaꞌán na nuu ra, ta köo ndi̱kan na ya ndaa xiꞌin ra. Ndaꞌvi ni ra, ni seꞌe ra köo, ni seꞌe sikua ra köo, chi kama ni si̱ndiꞌi na xaꞌa ra, xa̱ꞌni ñaꞌa na, káchi tuꞌun Ndioxi ya ta̱a ra Isaías, ya káꞌvi ra ñuu Etiopía ikán kuaꞌan ra.

³⁴ Saa ndi̱kaꞌan ra ikán xiꞌin ra Felipe, káchi ra saa: ―¿Án xíni un unku xaꞌa káꞌan ya? Tá tu xíni un, ta ikan loꞌo un ya mani ndikani un nuu i, chi köo xíni i án xaꞌa mií ra Isaías káꞌan ya, án xaꞌa inka na káꞌan ya? ―káchi ra xiꞌin ra Felipe.

³⁵ Saa ndi̱kuiin ra Felipe káꞌan ra: ―Xaꞌa Jesús va káꞌan ya ―káchi ra. Ta saa xa̱á ra ndíkani ra ya káꞌvi ra ikán kuaꞌan ra. Ta saa káꞌan ra tuꞌun vaꞌa xaꞌa Jesús xiꞌin ra.

³⁶ Saa yáꞌa nda kuaꞌan nda iin ñaꞌñu nuu ndíkaa tikuii. Ta saa ndi̱kaꞌan ra ikán xiꞌin ra Felipe, káchi ra saa: ―Yóꞌó ndíkaa tikuii ta ¿án ndá ka ñaꞌa kúmani nuu i saa kuchiñu kuchi i? ―káchi ra xiꞌin ra Felipe.

³⁷ Saa ndi̱kuiin ra káꞌan ra: ―Tá tu ndinuꞌu ini un kándixa un ya ndi̱kaꞌan i xiꞌin un ta vaꞌa kuchi va un ―káchi ra xiꞌin ra. Saa ndi̱kaꞌan ra káchi ra saa: ―Ndinuꞌu ini i kándixa i ya kúu Jesucristo Seꞌe Ndioxi ―káchi ra.

³⁸ Saa xa̱ꞌnda ra chiñu ya ná kundatun kuai xiꞌin itun carreta. Ñaa nu̱u ra Etiopía xiꞌin ra Felipe ndi̱xaa nda ini tikuii. Saa si̱kuchi ñaꞌa ra Felipe.

³⁹ Tá ndiꞌi ka̱na koo nda ini tikuii ikán, ta ndi̱kiꞌin Tachi Ií Ndioxi ra Felipe kuaꞌan ra, ni köo ka ra ndi̱xini ra. Saa nda̱a tuku ra sata carreta ra kuaꞌan ra, kúsini ni ra kuaꞌan ra.

⁴⁰ Ta ra Felipe nda nuu ñuu ya náni Azoto ndi̱tuvi ra. Ñaa ndítuꞌun ra tuꞌun vaꞌa xaꞌa Jesús kuaꞌan ra. Iin iin ñuu nuu yáꞌa ra kuaꞌan ra ta ndítuꞌun ra xaꞌa Jesús xiꞌin ndiꞌi na, saa i̱kan ra nda ndi̱xaa ra ñuu Cesarea.