Los Hechos 23 - Xochapa Mixteco

¹ Saa ndi̱koto ra Pablo nuu ndiꞌi na xikuaꞌa ndóo ikán, ta ndi̱kaꞌan ra xiꞌin na, káchi ra saa: ―Na taꞌan yo, nda kivi vitin ta íyo vaꞌa ni va ya xínituni i nuu Ndioxi ―káchi ra xiꞌin na.

² Tá xi̱ni soꞌo ra Ananías, ra ínuu nuu ndiꞌi sutu, ya ndi̱kaꞌan ra Pablo, ta saa xa̱ꞌnda ra chiñu nuu nda ndíta yati xiín ra Pablo ya ná kani nda yuꞌu ra.

³ Saa ndi̱kuiin ra Pablo káꞌan ra: ―Vaxi kivi ta kani tu Ndioxi yóꞌo̱ va, chi yóꞌo̱ uvi yuꞌu ku un ta chiñu nuu un kua xaa nani un kuachi i ikan un ya ndaa xiꞌin i tá kuꞌva káꞌan ley yo, ta yóꞌo̱ köo íkan un saa xiꞌin i, yáꞌa un nuu ley xaꞌa ya xáꞌnda un chiñu ya kani nda yeꞌe ―káchi ra Pablo xiꞌin ra.

⁴ Saa ndi̱kaꞌan nda ndóo ikán xiꞌin ra, káchi nda saa: ―¿Ndachu káꞌan un saa xiꞌin sutu ra chee xáa chiñu nuu Ndioxi? ―káchi nda xiꞌin ra.

⁵ Saa ndi̱kuiin ra Pablo, káchi ra saa: ―Na taꞌan yo, xaa kaꞌnu ni ini ndo xaꞌa i, köo xíni i ya kúu ra sutu chee. Ni tuꞌun Ndioxi ya ta̱a ra Moisés xinaꞌa ta káchi ya saa: “Käꞌan ndikuu un xaꞌa na chiñu ñuu un”, káchi ya ―káchi ra Pablo xiꞌin nda.

⁶ Saa ku̱ndaa ini ra xaꞌa sava nda ya kúu nda saduceo ta sava nda kúu fariseo. Ñaa nda̱niꞌi ra tachi ra ta ndee ni ndi̱kaꞌan ra, káchi ra saa: ―Nda taꞌan yo, yeꞌe ta yeꞌe fariseo ku i, saa tu tata va i ra fariseo ku ra. Xaꞌa ya ñaa kua táxi na kuachi xaꞌa i chi kándixa i ya ndítaku na ndíi ―káchi ra xiꞌin nda.

⁷ Tá ndi̱kaꞌan ra saa, ñaa xa̱á nda saduceo xiꞌin nda fariseo káni taꞌan xiꞌin taꞌan mií nda. Saa ndi̱taꞌvi taꞌan nda.

⁸ Saa chi nda saduceo káꞌan köo ndítaku na ndíi ta ni tatun Ndioxi köo, ni tachi nduvaꞌa köo, káchi nda ikán. Ta nda fariseo kándixa nda ya ndítaku na ndíi ta kándixa nda ya íyo tatun Ndioxi xiꞌin tachi nduvaꞌa.

⁹ Xaꞌa ya ñaa kua xa̱á iin ndá síso káꞌan ndiꞌi nda, saa ndi̱kundita sava nda maestro, nda kíꞌin sata nda fariseo, káꞌan nda saa: ―Köo ñaꞌa ndi̱kan vi ra, án iin tatun ndi̱kaꞌan xiꞌin ra án iin tachi vaꞌa ndi̱kaꞌan xiꞌin ra. Kuenta koo yo chi án sana xiꞌin Ndioxi va káni taꞌan yo ―káchi nda.

¹⁰ Saa xa̱á xáa ndee nda xaꞌa ya, nda yati kani taꞌan nda. Ñaa xa̱á íꞌvi va mií ra ndíso chiñu xiꞌin nda lapa ikán, chi ìyo sikuachi vali nda ikin kuñu ra Pablo káꞌán ra. Xaꞌa ya ikán kua xa̱ꞌnda ra chiñu ya tava nda lapa ra kuꞌun ra xiꞌin nda ini cuartel.

¹¹ Saa tá ku̱ñuu ta ndi̱tuvi Tata yo Jesús nuu ra Pablo, káꞌan ra xiꞌin ra, káchi ra saa: ―Xaꞌa un ndee yóꞌo̱ Pablo, ku ïꞌvi un saa chi tá kuꞌva ndíkuiin un káꞌan un xaꞌa i ñuu Jerusalén yóꞌo̱, saa ndikuiin tu un kaꞌan un xaꞌa i ñuu Roma va ―káchi Tata yo Jesús xiꞌin ra.

Ndítuꞌun taꞌan nda kaꞌni nda ra Pablo

¹² Ñaa ndi̱tuvi inka kivi ta chi̱taꞌan tuꞌun sava nda judío kaꞌni nda ra Pablo, ta ni küxi nda ni tikuii köꞌo nda, ndakua ná kaꞌni nda ra, saa kuxi nda. Tá ndá nda ná sïxinu ya ki̱ndoo nda ta ná ndi̱kava chiꞌña sata nda, káchi nda.

¹³ Yáꞌa uvi xiko ku nda chi̱taꞌan tuꞌun ikan saa.

¹⁴ Ñaa ndi̱xaꞌan nda nuu sutu nda naꞌnu tin nuu nda xikuaꞌa ínuu nuu na judío, ta ndi̱kaꞌan nda xiꞌin na, káchi nda saa: ―Ndeꞌe ta chi̱taꞌan tuꞌun nde küxi nde ndakua ná kaꞌni nde ra Pablo saa kuxi nde. Tá ndá nde ná sïxinu ya ta ná ndikava chiꞌña sata nde.

¹⁵ Ta vitin, ndóꞌo̱ kúu mií chiñu ta chitaꞌan tuꞌun ndo kaꞌan ndo xiꞌin ra ndíso chiñu xiꞌin nda lapa ná kundaka nda ra Pablo kixi ra taan chi íyo ka ya kúni ndo koto ndoso ndo ra, kachi ndo, ta ndeꞌe xa koo tuꞌva nde kaꞌni nde ra yachi ka tá täꞌan xaa ra ―káchi nda ikán xiꞌin na.

¹⁶ Saa ku̱ndaa ini ra seꞌe yá kuꞌva ra Pablo xaꞌa ya chi̱taꞌan tuꞌun nda. Ñaa ndi̱xaꞌan ra ndi̱tuꞌun ra xiꞌin ra Pablo ini cuartel ikán.

¹⁷ Ñaa ka̱na ra Pablo iin ra ínuu nuu nda lapa ikán, ta ndi̱kaꞌan ra xiꞌin ra, káchi ra saa: ―Kundaka loꞌo ra kuâán loꞌo yóꞌó ná kuꞌun ra xiꞌin un nuu ra chiñu chee saa chi íyo ya kúni ra kaꞌan ra xiꞌin ra ―káchi ra Pablo xiꞌin ra ikán.

¹⁸ Saa ndi̱kundaka ñaꞌa ra kuaꞌan ra. Tá ndi̱xaa ra ikán saa xa̱á ra káꞌan ra: ―Ra Pablo, ra ndíkaa veꞌe kàà ka̱na yeꞌe ta ndi̱xikan ra ya mani nuu i kixi i xiꞌin ra kuâán loꞌo yóꞌó, saa chi íyo ya kúni ra kaꞌan ra xiꞌin un, che ―káchi ra xiꞌin ra.

¹⁹ Saa ti̱in ra chiñu chee ikán ndaꞌa ra, ta ndi̱kiꞌin ra kuaꞌan ra xiꞌin ra iin ñaꞌñu, saa ndi̱ndakan tuꞌun ñaꞌa ra, káchi ra saa: ―¿Unkua kúni un kaꞌan un xiꞌin i? ―káchi ra xiꞌin ra.

²⁰ Saa ndi̱kuiin ra káꞌan ra: ―Na chiñu nuu na judío xiꞌin na xikuaꞌa nuu na, ta chi̱taꞌan tuꞌun na kaꞌan na xiꞌin un kundaka un ra Pablo kuꞌun ra xiꞌin un nuu na taan, ya koto ndoso ka ñaꞌa ndo, che.

²¹ Sundi kändixa un ya káꞌan na, chi yáꞌa uvi xiko ku taa nda chi̱taꞌan tuꞌun kaꞌni sěꞌe ñaꞌa nda. Ni küxi nda ta ni köꞌo nda tikuii ndakua ná kaꞌni ñaꞌa nda, che. Tá ndá nda ná sïxinu ya ta ná ndikava chiꞌña sata nda, che. Ta vitin xa íyo tuꞌva na chiñu ndátun na unkua kachi yóꞌo̱ ―káchi ra xiꞌin ra.

²² Saa ta̱va ra ra kuâán loꞌo ikán kuaꞌan ra, ta ndi̱kaꞌan ra xiꞌin ra ya ná käꞌan ra xiꞌin nda iin naꞌa xaꞌa ya ndi̱kaꞌan ra xiꞌin ra.

Tíꞌvi nda ra Pablo kuaꞌan ra ndaꞌa ra gobernador Félix

²³ Saa ka̱na ra ndíso chiñu xiꞌin nda lapa uvi nda naꞌnu nuu nda, ta xa̱ꞌnda ra chiñu nuu nda, káchi ra saa: ―Kaꞌan ndo xiꞌin nda lapa ná kundoo tuꞌva uvi ciento nda kuꞌun xaꞌa nda, ta uni xiko uxi nda yóso kuai, xiꞌin uvi ciento nda ná kuꞌun xiꞌin lanza. Ta ná koo tuꞌva nda kana nda kàà i̱in ñu̱u vitin kuꞌun nda ñuu Cesarea.

²⁴ Saa xaa ndúvi tu ndo kuai koso mií ra Pablo xiꞌin nda taꞌan ra, ya ná köo ya kundoꞌo ra, xaa vaꞌa ra xiꞌin ndo taxi ndo ra ndaꞌa ra gobernador Félix ñuu Cesarea.

²⁵ Saa ta̱a ra iin tutu nuu káꞌan ra xiꞌin ra, káchi ra saa:

²⁶ “Chíndee i yóꞌo̱ Tata Félix gobernador ra chee nuu nde, yeꞌe ku ra kúu Claudio Lisias, ta tíꞌvi i tutu yóꞌó xaa ya ndaꞌa un.

²⁷ Nuu káꞌan i xiꞌin un ya tíꞌvi i ra yóꞌó xaa ra ndaꞌa un, chi na judío ta ti̱in na ra, siloꞌo kaꞌni ñaꞌa na. Saa ku̱ndaa ini i ya kúu mií ra tutu ñuu Roma ta ndi̱xaꞌan i xiꞌin nda lapa ndi̱kiꞌin i tuꞌun ra, ki̱ndaa i ra ndaꞌa na.

²⁸ Xaꞌa ya kúni i kundaa vaꞌa ini i ndá xaꞌa kua táxi na kuachi xaꞌa ra, ta saa ndáka i ra ndi̱xaꞌan i nuu na xikuaꞌa xiꞌin na chiñu ínuu nuu mií na judío.

²⁹ Ta saa ku̱ndaa ini i süvi ya ndee vi kua chíkaa kuachi na ra. Xaꞌa ley mií va na kua chíkaa kuachi na ra, ni köo ichí na kaꞌni vi na ra, ni veꞌe kàà ndïkaa vi ra, ndikuu.

³⁰ Ta vitin ku̱ndaa ini i, chítaꞌan tuꞌun na kaꞌni na ra, yakan tíꞌvi i ra xaa ra ndaꞌa un, ta ndi̱kaꞌan i xiꞌin na táxi kuachi xaꞌa ra ná xaa na nuu un xaa nani un kuachi xiꞌin na. Ya yóꞌó ku ndiꞌi ya káꞌan i xiꞌin un, Tata. Ndikitaꞌan ka yo”, káchi ra xiꞌin tutu kuaꞌan ndaꞌa ra gobernador ikán.

³¹ Tá íyo ya ndi̱kaꞌan ra xiꞌin nda lapa ikán saa íyo ya i̱kan nda. Ka̱na koo ñu̱u nda kuaꞌan nda xiꞌin ra Pablo, saa ndi̱xaa nda ñuu Antípatris.

³² Ndi̱tuvi inka kivi ta ndi̱ko koo nda lapa kuaꞌan nda nuu íin cuartel, kuaꞌan xaꞌa nda. Ndisaa nda yóso kuai ku nda kuaꞌan xiꞌin ra Pablo nda nuu kuaꞌan ra.

³³ Ñaa tá ndi̱xaa nda ñuu Cesarea ta ta̱xi nda lapa tutu ikán ndaꞌa ra gobernador, saa ta̱xi tu nda ra Pablo va ndaꞌa ra.

³⁴ Tá si̱ndiꞌi ra ka̱ꞌvi ra tutu ikán ta ndi̱ndakan tuꞌun ra míi chí ke̱e ra Pablo, káchi ra, saa tá ku̱ndaa ini ra ya ke̱e ra estado Cilicia,

³⁵ saa ndi̱kaꞌan ra xiꞌin ra, káchi ra saa: ―Ná kixi na táxi kuachi xaꞌa un, saa kuni soꞌo i ya kaꞌan un ―káchi ra xiꞌin ra. Saa xa̱ꞌnda ra chiñu nuu nda lapa ya kundaa nda ra nuu koo ra ini veꞌe kaꞌnu ya si̱kuaꞌa ra rey Herodes yachi mi ñuu ikán.