Los Hechos 22 - Xochapa Mixteco

¹ ―Na taꞌan yo, na ñuu Israel xiꞌin ndiꞌi ndóꞌo̱ tata na xikuaꞌa, kuni soꞌo loꞌo ndo ná kaꞌan i xiꞌin ndo, ya ndíkuiin xaꞌa i ―káchi ra xiꞌin na.

² Saa tá xi̱ni soꞌo na ya káꞌan ra tuꞌun mií na ya hebreo xiꞌin na, ta iin ku̱taxin yuꞌu na, saa ndi̱kaꞌan ra xiꞌin na, káchi ra saa:

³ ―Yeꞌe taꞌan mií ndo judío ku i, ta ka̱ku i ñuu Tarso ya ndíkaa estado Cilicia, saa xa̱ꞌnu i ñuu Jerusalén yóꞌó. Ta si̱kuaꞌa i ndaꞌa ra maestro Gamaliel, si̱naꞌa ndiꞌi ra yeꞌe xaꞌa ichí ya ka̱ndixa ni xii sikua yo. Tá íkan ndóꞌo̱ kándixa ni ndo Ndioxi, saa íkan tu yeꞌe va. Ta ndiꞌi saa ichí kúni i xaa súvi i ley Ndioxi.

⁴ Chi̱kaa ni ini i sindiꞌi xaꞌa ndiꞌi i na ndíkun Jesús. Ta xaꞌa ya ikán kua, xa̱á i xáa ndikuu i xiꞌin na. Kuaꞌan i iin iin ñuu tíin i na: taa ku nda ñaꞌa ku ná, ndiꞌi na tíin i kuaꞌan xiꞌin i veꞌe kàà. Ndakua íyo ini i kaꞌni i na, ya ná ndiꞌi xaꞌa na.

⁵ Nda sutu naꞌnu nuu yo xiꞌin na xikuaꞌa ndíso chiñu xiꞌin yo judío ku na xíni vaꞌa xaꞌa ya káꞌan i xiꞌin ndo. Chi na ikán ku na ta̱xi tutu ndaꞌa i ya ndíkuiin xaꞌa i tiin i na ndíkun Jesús ndóo ñuu Damasco, kixi na xiꞌin i ñuu Jerusalén yóꞌó ya ndoꞌo ni na.

Káꞌan ra Pablo xiꞌin na ndá kuꞌva kua xa̱á ndíkun ra ichí Jesús

⁶ ’Saa ke̱e i kuaꞌan i ñuu Damasco, ta siloꞌo xaa i ñuu ikán ta kua iin kuꞌva kàà uxi uvi nduvi. Ñaa iin ku̱u soꞌva ta ndakua iin ndi̱yeꞌe ndaa mií ñu̱ꞌu̱ yéꞌe̱ nuu íin i.

⁷ Ñaa ndu̱va i kuaꞌan i nuu ñuꞌú. Ta saa xi̱ni soꞌo i tachi iin na káꞌan xiꞌin i: “Saulo, Saulo, ¿ndachu ndíkun un xíka un sata i sítixuꞌvi un yeꞌe?”, káchi tachi na xiꞌin i.

⁸ Saa ndi̱kuiin i káꞌan i: “¿Unku yóꞌo̱, tata?”, káchi i. Ñaa ndi̱kaꞌan ra xiꞌin i: “Yeꞌe ku Jesús, ra ñuu Nazaret, ta suvi yeꞌe ku ra ndíkun un xíka un sítixuꞌvi ni un”, káchi ra xiꞌin i.

⁹ Ta nda taa kuaꞌan xiꞌin i xi̱ni nda ndi̱yeꞌe ndaa ni saa ndi̱ndiꞌvi ni nda, sundi köo ndi̱kunda ini nda xiꞌin tuꞌun ya ndi̱kaꞌan ra xiꞌin i.

¹⁰ Saa ndi̱kuiin i káꞌan i: “¿Ta unkua xíniñuꞌu i ikan i, Tata?”, káchi i xiꞌin ra. Saa ndi̱kaꞌan ra xiꞌin i: “Kuandikoo kuáꞌan kiꞌvi un ñuu Damasco, ikán ku nuu kaꞌan na xiꞌin un unkua xíniñuꞌu un ikan un”, káchi ra xiꞌin i.

¹¹ Ta köo ndi̱kuvi ka koto i xaꞌa ya ndee ni ndi̱yeꞌe nuu i. Saa ti̱in nda kuaꞌan xiꞌin i ndaꞌa i, ndáka nda yeꞌe ndi̱xaa i ñuu Damasco.

¹² ’Ta íyo iin ra náni Ananías mi ñuu ikán, ta xáa súvi ni ra ikán ya káꞌan ley Ndioxi ta̱a ra Moisés. Saa vaꞌa ni káꞌan ndiꞌi mií na judío taꞌan yo ndóo ñuu ikán xaꞌa ra.

¹³ Ndi̱xaꞌan ra xi̱to ra yeꞌe, tá ndi̱xaa ra ta ndi̱kaꞌan ra xiꞌin i, káchi ra saa: “Ñani yo Saulo, vitin nduvaꞌa un”, káchi ra xiꞌin i. Ta ndikun saa ndi̱xuna nuu i.

¹⁴ Saa ndi̱kaꞌan ra xiꞌin i, káchi ra saa: “Ndioxi ra ka̱ñuꞌu xii sikua yo ku ra ndi̱kaxin yóꞌo̱ ya ku̱ndaa ini un unkua chi̱tuni ra ikan ra xiꞌin na ñuu ivi. Ndi̱kaxin ra yóꞌo̱ xi̱ni un Jesús ra nda̱a, ta xi̱ni soꞌo un tuꞌun ya ndi̱kaꞌan ra xiꞌin un tá vaxi un ichí.

¹⁵ I̱kan Ndioxi ya vaꞌa xiꞌin un, chi yóꞌo̱ ku ra ndikuiin xaꞌa Jesús nuu ndiꞌi ni kúu na ñuu ivi, ta kaꞌan un xiꞌin na xaꞌa ra ndá kuꞌva ndi̱tuvi ra nuu un saa xi̱ni soꞌo un ya ndi̱kaꞌan ra.

¹⁶ Ta kündatun ka un vitin. Kuandikoo kuchi un tixin kivi Jesús. Ta kaꞌan un xiꞌin ra ná xaa kaꞌnu ini ra xaꞌa kuachi un”, káchi ra Ananías ikán xiꞌin i ―káchi ra Pablo xiꞌin na.

Káꞌan ra Pablo xiꞌin na ndá kuꞌva ti̱ꞌvi Ndioxi ra kuꞌun ra nuu na köo kúu judío

¹⁷ Saa ndi̱kaꞌan ka ra Pablo xiꞌin na, káchi ra saa: ―Tá ndi̱ko koo i ndi̱xaa i ñuu Jerusalén ta ndi̱xaꞌan i veꞌe ñuꞌu kaꞌnu káꞌan i xiꞌin Ndioxi, saa si̱tuvi ya nuu i,

¹⁸ xi̱ni i Tata yo Jesús káꞌan ra xiꞌin i, káchi ra saa: “Kama ni koo un kee un ñuu Jerusalén yóꞌó, chi küaꞌa na ñuu yóꞌó kandixa na ya káꞌan un xaꞌa i xiꞌin na”, káchi ra xiꞌin i.

¹⁹ Ta saa ndi̱kaꞌan i xiꞌin ra, káchi i saa: “Tata, kuni soꞌo va na kaꞌan i xiꞌin na, chi xíni mií na ndá kuꞌva si̱tixuꞌvi i na kándixa tuꞌun un, ndi̱xika i veꞌe ñuꞌu sinagoga ti̱in i na ta̱an i veꞌe kàà, xa̱a nduvaꞌa i xiꞌin na.

²⁰ Saa tá xa̱ꞌni na ra Esteban, ra ndi̱kuiin xaꞌa tuꞌun un ta ndi̱xiyo yuꞌu i xi̱ndichi i xi̱ni i xa̱ꞌni ñaꞌa na, nda xi̱ndaa i toto nda xa̱ꞌni ra”, káchi i xiꞌin Jesús.

²¹ Saa ndi̱kuiin ra káꞌan ra xiꞌin i: “Kuaꞌan chi vitin tiꞌvi i yóꞌo̱ kuꞌun xika un, kuꞌun un nda inka ñuu kaꞌan un xiꞌin na köo kúu judío xaꞌa i”, káchi ra xiꞌin i ―káchi ra Pablo xiꞌin na judío.

Ndíkaa ra Pablo ndaꞌa na chiñu

²² Saa xíni soꞌo na ya káꞌan ra Pablo, ñaa ndi̱ndaꞌi ni na, káchi na saa: ―¡Vaꞌa ka ná kuvi ra! ¡Köo kúu mií ra ichí kutaku ka ra! ―káchi na.

²³ Sáa ka vi na ta ndee ka vi ndáꞌi na, nda toto súkun na ta̱va na kísi niꞌni na ta kíꞌin na ñuꞌú xáta na chí nìnù.

²⁴ Saa xa̱ꞌnda ra ndíso chiñu xiꞌin nda lapa ikán chiñu ya tiin nda ra Pablo chikaa nda ini cuartel ya kani ñaꞌa nda saa ná kaꞌan ra ndá xaꞌa kua íkan na saa xiꞌin ra.

²⁵ Ñaa ti̱in nda ra ka̱tun nda ndaꞌa ra ya xaa nduvaꞌa nda xiꞌin ra. Ta saa ndi̱kaꞌan ra xiꞌin iin ra chee nuu nda lapa ikán, káchi ra saa: ―¿Án íyo ichí ya káꞌan xaa nduvaꞌa ndo xiꞌin iin taa ra kúu mií tutu ñuu Roma tá täꞌan kuꞌun ra nuu juez kunani kuachi ra? ―káchi ra Pablo xiꞌin ra ikán.

²⁶ Saa tá xi̱ni soꞌo ra ya ndi̱kaꞌan ra Pablo xiꞌin ra, saa ndi̱kiꞌin ra kuaꞌan ra kaꞌan ra xiꞌin ra ndíso chiñu xiꞌin nda lapa, káchi ra saa: ―Kuenta koo un xaꞌa ya ikan un xiꞌin ra yóꞌó, chi ra kúu mií tutu ñuu Roma ku ra ―káchi ra xiꞌin ra.

²⁷ Saa tá xi̱ni soꞌo ra ya ndi̱kaꞌan ra xiꞌin ra, ñaa ndi̱xaa ra nuu ra Pablo káꞌan ra xiꞌin ra: ―¿Án ndixa kúu mií un tutu ñuu Roma? ―káchi ra xiꞌin ra. Saa ndi̱kuiin ra káꞌan ra: ―Ya ndaa kúu va ya ―káchi ra.

²⁸ Saa ndi̱kuiin ra ndíso chiñu xiꞌin nda lapa ikán káꞌan ra: ―Kuaꞌa ni cha̱ꞌvi yeꞌe ta saa ka̱na tutu i ya ñuu Roma ―káchi ra xiꞌin ra Pablo. Saa ndi̱kuiin ra Pablo káꞌan ra: ―Sundi yeꞌe ta köo ndi̱kan i saa, nda tá ka̱ku vi i kúu mií i tutu ya ñuu Roma ―káchi ra.

²⁹ Ñaa vaꞌa ka ka̱na koo nda lapa nda ndóo ndátun xaa nduvaꞌa xiꞌin ra Pablo, kuaꞌan nda. Nda mií ra ndíso chiñu xiꞌin nda lapa ikán ta ndi̱ndiꞌvi ni ra chi ndi̱yaꞌa ndoso ra ley ñuu Roma xaꞌa ya ka̱tun ñaꞌa ra Pablo.

Ndáka na ra Pablo kuaꞌan ra nuu na chiñu naꞌnu nuu na judío

³⁰ Saa ndi̱tuvi inka kivi ta kúni ra ndíso chiñu xiꞌin nda lapa ikán kundaa vaꞌa ka ini ra xaꞌa ra Pablo ndá xaꞌa kua ta̱xi na judío kuachi xaꞌa ra. Ñaa nda̱xin ra cadena núꞌni ra, ta saa ka̱na ra nda sutu naꞌnu xiꞌin na xikuaꞌa nuu na judío, ndi̱kitaꞌan ndiꞌi na ndóo na, ta saa ta̱va ra ra Pablo, ki̱ꞌin ñaꞌa ra ka̱ndichi ra nuu na.