Los Hechos 18 - Xochapa Mixteco

Ndi̱xaa ra Pablo ñuu Corinto

¹ Sindiꞌi ikán ke̱e ra Pablo ñuu Atenas ta ndi̱kiꞌin ra kuaꞌan ra chí ñuu Corinto.

² Ta ikán ndi̱kitaꞌan ra xiꞌin iin ra náni Aquila, ta ra judío ku ra, ñuu Ponto ka̱ku ra, saa ndi̱xaa ra xiꞌin yá síꞌi ra yá Priscila ñuu Corinto, ta yachi ndixiyo na ñuu Italia. Saa ku̱u iin ichí xa̱ꞌnda ra rey Claudio chiñu ya kee ndiꞌi na judío ndóo ñuu Roma ikán kuꞌun na. Xaꞌa ya ikán kua ke̱ta ra Aquila xiꞌin yá síꞌi ra yá Priscila kuaꞌan na, sikan ndi̱xaa na ndóo na ñuu Corinto. Saa ndi̱xaꞌan ra Pablo xíto ra na.

³ Ñaa ndi̱ndoo ra ndi̱xiyo ra xiꞌin na chi iin kachi xáa chiñu na xiꞌin taꞌan na chi taꞌan chiñu íkan ra kua íkan tu mií va na, síkuaꞌa na veꞌe mantiado.

⁴ Ta ndiꞌi kivi ndíkundee na judío xáꞌan ra Pablo veꞌe ñuꞌu sinagoga káꞌan ra xiꞌin na judío tin na köo kúu judío. Ndinuꞌu ini ra káꞌan ra xiꞌin na síxinu ra ini na ya ná ndikundikun na Jesús.

⁵ Saa tá ndi̱xaa ra Silas xiꞌin ra Timoteo ñuu macedonia ta chiñu nuu ra Pablo kua xíka ra káꞌan ndoso ra tuꞌun Ndioxi. Vitin taan káꞌan ra xiꞌin na judío xaꞌa Jesús ya kúu ra Cristo.

⁶ Ta köo xíin na ikán ndikiꞌin na tuꞌun káꞌan ra Pablo xiꞌin na. Ñaa xa̱á na kánaꞌa na xiꞌin ra. Saa ki̱si ra tikoto ra, ta ndi̱kaꞌan ra xiꞌin na, káchi ra saa: ―Käꞌan ka i xiꞌin ndo. Vitin ndíso mií ndo kuachi xaꞌa ndo, köo ndíso ka i kuachi ndo. Vitin ta kuꞌun i kaꞌan ndoso i tuꞌun Ndioxi xiꞌin na köo kúu judío ―káchi ra Pablo xiꞌin na.

⁷ Saa ke̱ta ra veꞌe ñuꞌu na judío ta ndi̱kiꞌin ra kuaꞌan ra veꞌe iin ra náni Justo ra íyo yati xíin veꞌe ñuꞌu sinagoga, ta xáa toꞌo ni ra ikán Ndioxi.

⁸ Ta iin ra náni Crispo, ra xáꞌnda chiñu veꞌe ñuꞌu sinagoga ñuu ikán, xi̱ni soꞌo ra ya ndi̱kaꞌan ra Pablo. Saa ka̱ndixa ra Jesús xiꞌin ndiꞌi na veꞌe ra. Ta kuaꞌa ni ka mií na ñuu Corinto xa̱á kándixa Jesús. Ñaa ndikun chi̱chi na.

⁹ Saa ku̱u iin ñǔu índuꞌu ra Pablo kíxi ra, ta si̱tuvi ya nuu ra xi̱ni ra káꞌan Tata yo Jesús xiꞌin ra, káchi ra saa: ―Ku ïꞌvi un. Kaꞌan ndoso ni un tuꞌun i. Kütaxin yuꞌu un.

¹⁰ Saa chi yeꞌe ta íyo i xiꞌin un, ta nda iin na küchiñu keꞌe yóꞌo̱ ya xaa nduvaꞌa na xiꞌin un. Kaꞌan tuꞌun i xiꞌin na, saa chi kuaꞌa ni na ñuu yóꞌó ndikundikun ichí i ―káchi Jesús xiꞌin ra.

¹¹ Xaꞌa ya ikán kua ndi̱ndoo ra ndi̱xiyo ra ñuu Corinto. Iin kuiya sava si̱naꞌa ra na tuꞌun Ndioxi.

¹² Ta iin kivi tá kúu ra Galión gobernador xáꞌnda chiñu ra nuu na estado Acaya, saa kua ndi̱kitaꞌan sava na judío ti̱in na ra Pablo kuaꞌan ra xiꞌin na nuu na chiñu.

¹³ Ta̱xi na kuachi ndaꞌa na xaꞌa ra, káchi na saa: ―Ra xíka sáka xiní naꞌa ya ná käñuꞌu na Ndioxi tá kuꞌva káꞌan ley nde ku ra ―káchi na xiꞌin ra.

¹⁴ Ñaa xa̱á kúni kaꞌan ra Pablo, ta kama ka ndi̱kuiin mií ra gobernador Galión ikán káꞌan ra xiꞌin na judío, káchi ra saa: ―Tá tu ndìì xa̱ꞌni ra án inka ka ya ndee i̱kan ra, ta kuni soꞌo i ya káꞌan ndo, saa xaa nani i kuachi xiꞌin ndo, ndikuu.

¹⁵ Sundi xaꞌa tuꞌun va xiꞌin kivi na ya vaxi nuu ley mií va kua káni taꞌan ndo. Xaꞌa ya ñaa kua xäa nani i kuachi xiꞌin ndo, vaꞌa xaa nani mií va ndo ya xiꞌin taꞌan ndo ―káchi ra xiꞌin na.

¹⁶ Saa ta̱va ra na ka̱na koo na keꞌe.

¹⁷ Tá ka̱na koo na keꞌe ta ti̱in na griego inka ra náni Sóstenes, ra xáꞌnda chiñu veꞌe ñuꞌu sinagoga. Ñaa xa̱á na xáa nduvaꞌa na xiꞌin ra. Nuu teꞌe ra gobernador Galión xa̱á na xáa nduvaꞌa na xiꞌin ra, ta ni köo ndi̱kaꞌan ra xiꞌin na.

Ndi̱ko koo ra Pablo kuaꞌan ra ñuu Antioquía

¹⁸ Ta naꞌá ni ndi̱ndoo ra Pablo ñuu Corinto ndi̱xiyo ra xiꞌin na xíka ichí Jesús. Sindiꞌi ikán ta ndi̱kaꞌan ndioxi ra xiꞌin na, saa ndi̱kiꞌin ra kuaꞌan ra xiꞌin ra Aquila tin yá Priscila síꞌi ra Aquila. Nda̱a na sata iin barco itun kuaꞌan nda estado Siria. Ñaa ndi̱xaa na ñuu Cencrea ta ikán ndi̱xata teꞌe ra Pablo xiní ra, nuu ndínaꞌa ra mií ra ya síxinu ra ya xa ki̱ndoo ra xiꞌin Ndioxi.

¹⁹ Saa tá kuaꞌan na xiꞌin barco ta ndi̱xaa na ñuu Éfeso, ta ikán si̱ndoo ra Pablo yá Priscila xiꞌin ra Aquila. Ñaa ndi̱kiꞌin ra kuaꞌan mií ra veꞌe ñuꞌu sinagoga mi ñuu ikán. Saa ndíkani ra tuꞌun Ndioxi nuu na ndóo ikán.

²⁰ Ñaa xa̱á xíkan na ya mani nuu ra ya ná ndoo naꞌá ka ra koo ra xiꞌin na. Ta köo ndi̱xiin ra ndoo ra.

²¹ Saa nda̱i ra na, káchi ra saa: ―Xíniñuꞌu kuꞌun i ñuu Jerusalén viko ya vaxi, sundi ná kuꞌun i tá Ndioxi ndi̱kaꞌan, ta ndiko koo tuku i koto i ndóꞌo̱ ―káchi ra xiꞌin na. Saa keta ra ñuu Éfeso kuaꞌan ra xiꞌin barco.

²² Ndi̱xaa ra ñuu Cesarea ikán ndi̱kiꞌin ra kuaꞌan ra chindee ra na ndíkun Jesús ndóo ñuu Jerusalén. Sindiꞌi ikán, ta saa ke̱e ra kuaꞌan ra nda ñuu Antioquía.

²³ Saa ndi̱xiyo ra uvi ndaá kivi ñuu ikán. Ñaa ndi̱kiꞌin ra kuaꞌan ra iin iin ñuu ya ñúꞌu estado Galacia xiꞌin estado Frigia. Kuaꞌan ra káꞌan ka ra xiꞌin na ndíkun Jesús, chíndee ra na ya ná kandixa ka na Jesús.

Ndíkani ra Apolos tuꞌun xaꞌa Jesús ñuu Éfeso

²⁴ Tá xíka ra Pablo inka ñuu, ta saa ndi̱xaa iin ra náni Apolos ñuu Éfeso, ta ra judío ku ra ikán. Ñuu Alejandría ka̱ku ra, saa si̱kuaꞌa vaꞌa ra, xíni ni ra tuꞌun Ndioxi ya ta̱a na xinaꞌa.

²⁵ Ndee ni vaꞌa si̱kuaꞌa ra tuꞌun Ndioxi, ta ndinuꞌu ni ini ra káꞌan ra, kúsini ni ra ya ndítuꞌun ra xaꞌa Tata yo Jesús, saa teꞌe ni ndíkani ra tuꞌun xaꞌa ra, vani takua ndisaa xaꞌa ya si̱naꞌa ra Juan ra si̱kuchi naꞌa kua xíni ra.

²⁶ Ta ni köo íꞌvi ra káꞌan ra, ndi̱kiꞌvi ra ini veꞌe ñuꞌu sinagoga ñuu Éfeso ikán, ta ndinuni loꞌo káꞌan ra xiꞌin na. Saa xi̱ni soꞌo ra Aquila xiꞌin yá Priscila síꞌi ra ya káꞌan ra Apolos ikán. Ta ñaa ta̱va síin na ra ndi̱kani vaꞌa ka na ichí xaꞌa Ndioxi nuu ra.

²⁷ Sindiꞌi ikán, saa xa̱á kúni ra kuꞌun ra estado Acaya, ta saa chi̱ndee na ndíkun Jesús ndóo ñuu Éfeso ikán ra. Ta̱a na iin tutu kuaꞌan xiꞌin ra, ti̱ꞌvi na ya kuaꞌan ndaꞌa inka na ndíkun Jesús ndóo ñuu ikán ya ná ndikiꞌin vaꞌa ñaꞌa na. Tá ndi̱xaa ra estado Acaya ta chi̱ndee ni ra na kándixa Jesús, na i̱kan Ndioxi ya vaꞌa xiꞌin káñuꞌu ñaꞌa na.

²⁸ Teꞌe ni káꞌan ra Apolos xiꞌin nda judío nuu ndíkani ndiꞌi ra nuu nda xaꞌa tuꞌun Ndioxi ya ta̱a nda ndikaꞌan ndoso tuꞌun yuꞌu Ndioxi xinaꞌa, sínaꞌa ra ya nuu nda nuu káꞌan ya xaꞌa Jesús ya kúu ra Cristo, káchi ra xiꞌin nda, ta ni köo ka ya níꞌi nda kaꞌan nda xiꞌin ra.