El Apocalipsis 13 - Xochapa Mixteco

Kiti nǎꞌa kiti kéta nuu nduta ñûꞌu

¹ Ñaa ndi̱xaa i ndi̱kundichi i nuu yoti yuꞌu nduta ñûꞌu, saa xi̱ni i iin kiti chee ni, ìyo ka vi káa ri. Ke̱ta ri ini nduta ñûꞌu ta kúu mií ri uxa xiní ri, ta íyo uxi ndikin ri, saa ínuu iin corona nuu iin iin ndikin ri ikán. Ta íyo tuꞌun ya kánaꞌa kini ni xaꞌa Ndioxi xiní iin iin ri ikán.

² Tá káa kiti ndikaꞌa leopardo saa káa ri xi̱ni i, ta xaꞌa ri tá káa xaꞌa kiti oso saa káa ya, ta yuꞌu ri tá káa yuꞌu kiti lión saa káa yuꞌu ri. Saa ta̱xi kiti ko̱ó nǎꞌa ikán ndee kúu mií ri ndaꞌa kiti kini ni káa ikán ya ndikunduꞌu ri nuu tai ri kaꞌnda chiñu ri.

³ Ta iin xiní kiti uxa ikán ta ìyo ni káa ya, ndee ka vi ti̱kueꞌe ya, nda tá káa ri xa ndi̱xiꞌi saa káa ri. Ta ndu̱vaꞌa xi̱ní ri nuu ìyo ni ti̱kueꞌe ikán. Ñaa ndi̱kanda ni ini ndiꞌi na ñuu ivi xi̱ni na ri, saa ndi̱kundikun na sata ri.

⁴ Saa xa̱á na síkusiti na nuu kiti ko̱ó nǎꞌa ikán, kiti ta̱xi ndee ndaꞌa kiti chee ìyo ni káa ikán, ñaa xa̱á na xáa kaꞌnu na ri, saa káꞌan xiꞌin taꞌan na, káchi na saa: ―Nda iin naꞌa köo ndee kúu mií tá kuꞌva ndee ni ndee kúu mií kiti yóꞌó, ta ni köo naꞌa kuchiñu kani taꞌan xiꞌin ri ―káchi na xiꞌin taꞌan na.

⁵ Ta suvi mií kiti chee kini ni káa ikán, ndi̱niꞌi ri ichí ya chinuu vaꞌa ni ri mií ri, ta saa káꞌan kini ni ri xaꞌa Ndioxi, ya chínuu väꞌa ri ya toꞌo Ndioxi. Ta uvi xiko uvi yoo ku̱u mií ri ichí ya ndi̱kaꞌan kini ri, saa ku̱u mií ri ichí ya xa̱ꞌnda chiñu ri nuu na ñuu ivi yóꞌó.

⁶ Ta xiꞌin ichí kúu mií ri xu̱na ri yuꞌu ri, saa xa̱á ri káꞌan ri nina tuꞌun kini xaꞌa Ndioxi, saa kini ni káꞌan tu ri xaꞌa kivi Ndioxi va, káꞌan kini ni tu ri xaꞌa veꞌe ñuꞌu ndivi nuu íyo Ndioxi, saa káꞌan kini ni tu ri xaꞌa ndiꞌi na ndóo nuu ndivi va.

⁷ Ta kúu mií ri ichí ya kani taꞌan ri xiꞌin naꞌa na i̱í ndíkun ichí Ndioxi, ndakua kuchiñu ri nuu na. Saa kúu mií ri ichí ya kaꞌnda chiñu ri nuu ndiꞌi na ñuu vali tin na ñuu naꞌnu xiꞌin na káꞌan ndiꞌi ni kúu nuu tuꞌun ndóo ñuu ivi yóꞌó.

⁸ Saa xáa kaꞌnu ndiꞌi naꞌa, na ndóo ñuu ivi kiti ikán. Na ikán, ta köo kivi na ndóso nuu tutu i̱í kúu mií kiti Levo loꞌo nuu ndivi. Chi Levo loꞌo ikán ku ri ndi̱soko xiꞌin mií, ya ndi̱xiꞌi ri. Saa chi̱tuni Ndioxi ikan ra tá täꞌan sikuaꞌa ra ñuu ivi.

⁹ Ta ndóꞌo̱ xíni soꞌo ya yóꞌó ta kuni soꞌo vaꞌa ka ndo ya.

¹⁰ Tá íyo naꞌa chi̱tuni Ndioxi ya kundasi na veꞌe kàà, ta xíniñuꞌu na kundasi na veꞌe kàà. Tá íyo naꞌa, na xáꞌni ndìì xiꞌin i̱chi xiín, ta suvi kuꞌva saa xíniñuꞌu na kuvi na xiꞌin i̱chi̱. Tuꞌun yóꞌó kúni kachi ya ndiꞌi naꞌa, na ndíkun Ndioxi, ta xíniñuꞌu na sikuaꞌa na kundee ini na xiꞌin tindoꞌo ya uꞌvi ni tixuꞌvi na, ta ná sïndikoo na ya kándixa na Ndioxi.

¹¹ Ta saa xi̱ni i inka kiti ìyo ni káa, ke̱ta ri tixin ñuꞌú. Íyo uvi ndikin ri, tá káa ndikin kiti levo saa káa ndikin ri, sundi tá káꞌan kiti ko̱ó nǎꞌa ikán, saa káꞌan tu ri ikán va.

¹² Ta ri yóꞌó kúu mií ri ichí ya kúu mií kiti núnu̱ú, kiti ìyo ni ti̱kueꞌe xiní, ta xa ndu̱vaꞌa xiní ri. Ta ta̱xi kiti núnu̱ú ikán ndee ndaꞌa ri sikan ke̱ta tixin ñuꞌú ikán, ta ri sikan ke̱ta ikán xa̱á ri xáꞌnda chiñu ri nuu ndiꞌi ni kúu naꞌa, na ñuu ivi ya xíniñuꞌu ndiꞌi na xaa kaꞌnu na kiti núnu̱ú, ri ìyo ni ti̱kueꞌe xiní ikán, ta nda̱ꞌa ya.

¹³ Ta suvi kiti uvi, ri sikan ke̱ta tixin ñuꞌú ta ndee ni íkan ri yatuꞌun nuu naꞌa, nda táxi ri kána koo ñu̱ꞌu̱ xíxi nuu ndivi vaxi ya nuu ñuꞌú, ta ndee ni xíto naꞌa ya íkan ri.

¹⁴ Saa si̱ndaꞌvi ri uvi ikán ndiꞌi na ndóo ñuu ivi yóꞌó xiꞌin yatuꞌun íkan ri. Ta xiꞌin yuꞌu mií kiti núnu̱ú ikán kua íkan kiti uvi ikán yatuꞌun nuu naꞌa. Saa xa̱ꞌnda chiñu kiti uvi ikán chiñu nuu naꞌa ya sikuaꞌa na naꞌna kiti núnu̱ú, ri ìyo ni ndi̱taꞌnda xiní xiꞌin i̱chi ta ndi̱taku tuku ri.

¹⁵ Ta kiti uvi ikán ndi̱niꞌi ri ichí ya taxi ri kutaku naꞌna kiti núnu̱ú ikán. Ta naꞌna kiti núnu̱ú ikán ndi̱kiꞌin ya tachi ya vaꞌa káꞌan ya, saa xa̱ꞌnda ya chiñu ya ná kuvi ndiꞌi naꞌa, na köo xíin xaa toꞌo naꞌna ri ikán.

¹⁶ Ta kiti uvi, ri ìyo ni káa ikán xa̱ꞌnda ri chiñu ya ndikunuu sello iin iin na, kaꞌi na vali tin na naꞌnu, saa tu na kuika tin na ndaꞌvi, saa tu na íkan chiñu mií na án na xáa chiñu xiꞌin ya nduxa nuu xitoꞌo na. Ndi̱taꞌnda chiñu ya ndikunuu sello ndaꞌa kuáꞌá na án taan na.

¹⁷ Ta naꞌa, na köo sello kúu mií, ta küchiñu na sata na ñaꞌa xíniñuꞌu na ta ni ku̱chiñu na xiko na. Ta sello ikán kua kúu kivi kiti núnu̱ú ikán, án número mií ri ìyo ni káa ikán kua.

¹⁸ Uꞌvi ni kundaa ini yo xaꞌa ri yóꞌó, chi xíniñuꞌu ni yo ya ndíchi saa kuchiñu kundaa ini yo xiꞌin ya unkua kúni kaꞌan ya. Chi número mií kiti ìyo ni káa ikán kua káꞌan xaꞌa iin taa, ta número ri ikán ku ya iñu ciento uni xiko iñu.