2 Tesalonicenses 3 - Xochapa Mixteco

Káꞌan ra Pablo xiꞌin na veꞌe ñuꞌu ya kaꞌan na xaꞌa ra xiꞌin Ndioxi

¹ Ya yóꞌó kua sindiꞌi káꞌan nde xiꞌin ndo, kaꞌan ndo xaꞌa nde xiꞌin Ndioxi ya ná kuchiñu kuita kama tuꞌun ra ndiꞌi ni kúu ñaꞌñu, ta ná ndikiꞌin vaꞌa ni na ya tá kuꞌva ndi̱kiꞌin vaꞌa ndóꞌo̱ ya.

² Saa kaꞌan tu ndóꞌo̱ xaꞌa nde ya ná chindee Ndioxi ndeꞌe sikaku ra ndeꞌe nuu naꞌa, na väꞌa, saa chi süvi ndiꞌi na ndáa ni ini xíni Ndioxi.

³ Sundi mií Tata yo Jesucristo ta síxinu ndiꞌi ra tuꞌun káꞌan ra, saa táxi ni ra ndee ndaꞌa ndo ya tuun ni kundikun ndo ra, saa kundaa ni ra ndóꞌo̱ nuu ya väꞌa.

⁴ Ta ndáa ni ini nde xíni nde Tata yo Jesucristo ya chindee ra ndóꞌo̱ xaa súvi ndo ndiꞌi ya ndi̱kaꞌan nde xiꞌin ndo, ta ndiꞌi saa ichí ná ikan ndo saa.

⁵ Mií Tata yo ná chindee ndóꞌo̱ kundaa ini ndo ya kuꞌvi ni ini ndo kuni taꞌan ndo. Ta saa ná chindee ra ndóꞌo̱ ya ndee ni ná koo ini ndo xiꞌin tindoꞌo ya vaxi nuu ndo tá kuꞌva ndixaꞌa ndee ni ini mií ra xiꞌin ndiꞌi tindoꞌo.

Xíniñuꞌu yo xaa chiñu yo

⁶ Ñani yo xiꞌin kuva yo, tixin ndee Tata yo Jesucristo ya kúu mií nde kua xáꞌnda chiñu nde nuu ndo ya ná kuxika ndo nuu na ñani yo xiꞌin kuꞌva yo, na köo xíin xaa chiñu, chi ndiꞌi na íkan saa ta köo xáa súvi na ya si̱naꞌa nde ndóꞌo̱.

⁷ Chi ndóꞌo̱, ta xa xíni ndo ndá kuꞌva ndi̱xiyo nde nuu ndo. Ta kuꞌva saa xíniñuꞌu ndo ikan ndo, ya kundikun ndo ichí nde. Saa chi ndeꞌe, tá kivi ndi̱xiyo nde xiꞌin ndo ta köo ndixíndoo xúxan nde nuu ndo, ndinuni loꞌo xa̱a chiñu nde.

⁸ Ni köo ñaꞌa nda iin ndo ndi̱xixi uun nde, ndiꞌi saa ichí xa̱a chiñu ni nde. Nduvi niuun xa̱a chiñu ni nde saa xi̱taku nde, ta nda loꞌo köo ndi̱sindiꞌi nde ini ndo ya nduku nde ñaꞌa nuu ndo kuxi nde án ya xíniñuꞌu nde.

⁹ Vani kúu mií nde ichí kaꞌan nde xiꞌin ndo ya chindee ndo ndeꞌe, sundi köo ndi̱xiin nde ikan nde saa xiꞌin ndo, chi ku̱ni nde sinaꞌa nde ndóꞌo̱ ya ikan ndo tá kuꞌva íkan nde.

¹⁰ Tá xi̱ndoo nde xiꞌin ndo ta ta̱xi nde ichí ndaꞌa ndo nuu ndi̱kaꞌan nde xiꞌin ndo tuꞌun yóꞌó, káchi nde saa: “Tá ndá na köo xíin xaa chiñu ta ná küxi na”, káchi nde xiꞌin ndo.

¹¹ Chi ku̱ndaa ini nde xaꞌa sava ndo ya köo xíin ndo xaa chiñu ndo, saa íin ndo ndóo mií ndo ni köo chiñu íkan ndo, takua ndóo xúxan ndo, saa kuaꞌan ndo síndiꞌi ni ndo ini inka naꞌa, káchi na xaꞌa ndo.

¹² Ta na íkan saa, ta káꞌan nde xiꞌin na tixin ndee ta̱xi mií Tata yo Jesucristo ndaꞌa nde ya ná ïkan ka na saa, vaꞌa ka ná xaa chiñu na saa kuxi na.

¹³ Ta saa ndóꞌo̱, ñani yo xiꞌin kuꞌva yo, káꞌan nde xiꞌin ndo ya ná künaa ndo íkan ndo ya vaꞌa ndiꞌi saa kivi.

¹⁴ Tá tu ndá na íkan saa, köo xíin na xaa súvi na ya káꞌan nde xiꞌin ndo nuu tutu yóꞌó, ta kiꞌin vaꞌa ndo kuenta unku na, saa kuxika ndo nuu na ñaa, kütaꞌan ka ndo xiꞌin na ya ná kukaꞌan nuu na.

¹⁵ Ta säa ini ndo kuni ndo na, vaꞌa ndikani ndo nuu na ná xaa chiñu na, chi ñani yo ku na.

Nuu káꞌan ra Pablo xiꞌin na ndái ra na

¹⁶ Ta mií Iva yo ra táxi koo vaꞌa ni ini yo, ná taxi ra koo vaꞌa ni ini ndo ndiꞌi saa ichí xaꞌa ndiꞌi ya íkan ndo. Ta saa ná koo ra xiꞌin ndiꞌi ndo.

¹⁷ Ta mií yeꞌe Pablo ku ra táa tutu yóꞌó xiꞌin ndaꞌa i táa i ya, letra mií i kua táa i xaa ya nuu ndo ya kundaa ini ndo yeꞌe ku i tíꞌvi ya xaa ya ndaꞌa ndo.

¹⁸ Ta mií Tata yo Jesucristo ná chikaa ni ya vaꞌa ndiꞌi ndo xiꞌin ya kúꞌvi ni ini ra xíni ra ndóꞌo̱. Saa ná koo.