2 Tesalonicenses 2 - Xochapa Mixteco

Káꞌan ra Pablo ya kuu tá ná ndituvi taa ra nduvaꞌa, ra nǎꞌa

¹ Ñani yo xiꞌin kuꞌva yo, kúni nde kaꞌan nde xiꞌin ndo xaꞌa ya kuu tá ná ndiko koo Tata yo Jesucristo kixi tuku ra ñuu ivi yóꞌó, nuu ndikitaꞌan yo xiꞌin ra. Ta ndeꞌe, xáku ndaꞌvi ni nde nuu ndo,

² täxi ndo ndinama kama ni ini ndo xaꞌa ya káꞌan na xiꞌin ndo, síꞌvi na ndóꞌo̱ ya si̱kaꞌan Ndioxi ini na kaꞌan na tuꞌun yuꞌu ra ya xa ndi̱ko koo Tata yo Jesucristo ñuu ivi yóꞌó, án kaꞌan na xiꞌin ndo ndá ka tuꞌun ya taa na tutu xaa ya nuu ndo nuu síndaꞌvi na ndóꞌo̱, ya ta̱a ndeꞌe ya xaa ya nuu ndo, káchi na xiꞌin ndo, ta ni süvi ya ndaa kua.

³ Täxi ndo sindaꞌvi nda iin naꞌa ndóꞌo̱. Saa chi tá ná tindaa kivi ya ndiko koo tuku Tata yo Jesucristo kixi ra ñuu ivi yóꞌó, ta xiꞌna ka na sáa ini xíni Ndioxi ku na ndikuita kani taꞌan na xiꞌin ra. Sindiꞌi ikán saa keta taa, ra nduvaꞌa ni ini, ra nǎꞌa, ra chi̱tuni Ndioxi ndiꞌi xaꞌa.

⁴ Saa xáa ra kanitaꞌan ra xiꞌin Iva yo Ndioxi ta kanitaꞌan tu ra xiꞌin ndiꞌi ndioxi ya ndíi xáa kaꞌnu na ñuu ivi yóꞌó án ndá ka ya xáa kaꞌnu na. Saa kiꞌvi ra ndikunduꞌu ra nda ini veꞌe ñuꞌu kaꞌnu Iva yo Ndioxi, ta kaꞌan ra kúu ra ndioxi.

⁵ Ñani yo xiꞌin kuꞌva yo, ndikaꞌán ni ini ndo tá yachi, tá ndi̱xiyo nde xiꞌin ndo ñaa, ta xa ndi̱kaꞌan ni nde xiꞌin ndo xaꞌa ya yóꞌó, ya kuu saa.

⁶ Ta xa xíni mií ndo íyo ñaꞌa sási nuu ra nduvaꞌa ikán, ya köo kúchiñu ra keta túvi ra vitin, sundi tá ná tindaa kivi ya chi̱tuni mií Iva yo Ndioxi, saa kua keta túvi ra.

⁷ Saa chi ndee ya väꞌa, ya xáꞌnda chiñu nuu ra nduvaꞌa ikán ta xa íyo ya xáa chiñu sěꞌe ya ñuu ivi yóꞌó, ndá ndátun ya ná kutaꞌa ñaꞌa sási nuu ya,

⁸ saa kua keta túvi taa ra ndee ni nduvaꞌa ikán, ta xáa ra ikan ni ra ya väꞌa. Sundi tá ná ndiko koo Tata yo Jesucristo kixi ra ñuu ivi yóꞌó xiꞌin ndee chee ni kúu mií ra, ta ndisaa xiꞌin loꞌo paꞌa tachi yuꞌu ra kua kaꞌni ra taa nduvaꞌa ikán, sindiꞌi xaꞌa ñaꞌa ra.

⁹ Ta kivi ná ndituvi ra nduvaꞌa ikán ñuu ivi yóꞌó ta xiꞌin ndee kiti nǎꞌa kua ndituvi ra, ta ndee ni ndee kuu mií ra, ikan ni ra yatuꞌun nuu naꞌa, saa ndikanda ni ini na kuni na ra xiꞌin ya vata ikan ra nuu na.

¹⁰ Ta saa nduku ni ra kuꞌva ya kuchiñu ra sindaꞌvi ra naꞌa, na kuaꞌan ichí nuu ndiꞌi xaꞌa na. Chi köo ndi̱xiin na ndikiꞌin na ya ndaa ya kúꞌvi ni ini Ndioxi xíni ra na, ya kuchiñu na kaku na.

¹¹ Xaꞌa ya ikán kua taxi Ndioxi ndee vata ndaꞌa na ya sindaꞌvi ya na, ta kandixa ni na ndee ikán.

¹² Saa sitixuꞌvi ni Ndioxi na ikán chi köo ndi̱xiin na kandixa na ya ndaa. Ya väꞌa va kua ku̱sini ni na i̱kan na nuu ra.

Ndi̱kaxin Ndioxi mií yo ya sikaku ra yoo

¹³ Sundi ndeꞌe, ta ndiꞌi saa ichí táxi ni nde tixaꞌvi ndaꞌa Ndioxi xaꞌa ndo, chi Ndioxi ta kúꞌvi ni ini ra xíni ra ndóꞌo̱. Saa ndi̱kaxin ra ndóꞌo̱ ya sikaku ra xiꞌna ndóꞌo̱, nda̱sa vaꞌa ra ini ndo tixin Tachi I̱í ra. Xaꞌa ya ndáa ni ini ndo xíni ndo ya ndaa xaꞌa Tata yo Jesucristo.

¹⁴ Saa ka̱na Ndioxi ndóꞌo̱ tixin tuꞌun vaꞌa xaꞌa Tata yo Jesucristo ya si̱naꞌa nde ndóꞌo̱, ya ná kuchiñu ndo kaku ndo, ta saa niꞌi ndo ya vaꞌa luvi ni kúu mií Tata yo Jesucristo.

¹⁵ Yakan káꞌan nde xiꞌin ndo ñani yo tin kuꞌva yo, tuun ni kundikun ndo ya si̱naꞌa nde ndóꞌo̱ kándixa ndo, xiꞌin ya ndi̱kaꞌan nde xiꞌin ndo, tin ya xi̱ni soꞌo ndo xaꞌa nde xiꞌin ya ta̱a nde nuu tutu ti̱ꞌvi nde xaa ndaꞌa ndo.

¹⁶ Ta mií Tata yo Jesucristo xiꞌin mií Iva yo Ndioxi ku ra kúꞌvi ni ini xíni yoo, saa si̱ndiko ra ini yo ndiꞌi saa kúu ichí, ta ndixaꞌa ni ra ndee xiꞌin yo ya ndee ni tuun kundikun yo ra, xaꞌa ya vaꞌa ni ini ra xiꞌin yo.

¹⁷ Ta saa ná taxi ni ra ndee ndaꞌa ndo ya koo vaꞌa ni ini ndo ta ná kana vaꞌa ndiꞌi ya káꞌan ndo xiꞌin ya íkan ndo.