2 Tesalonicenses 1 - Xochapa Mixteco

Tíꞌvi ra Pablo tuꞌun mani kuaꞌan nuu na veꞌe ñuꞌu ndóo ñuu Tesalónica

¹ Yeꞌe Pablo, xiꞌin ra Silvano tin ra Timoteo ku nde tíꞌvi tutu yóꞌó xaa ya ndaꞌa ndóꞌo̱, na veꞌe ñuꞌu, na ndóo ñuu Tesalónica nuu káꞌan ndioxi nde xiꞌin ndo. Chi xa iin ku ndo xiꞌin Iva yo Ndioxi tin Tata yo Jesucristo.

² Ta mií Iva yo Ndioxi xiꞌin Tata yo Jesucristo ná taxi koo vaꞌa ni ini ndo, saa ná chikaa ni ra ya vaꞌa ndóꞌo̱.

Kivi ná ndiko koo Cristo ñuu ivi yóꞌó ta sindoꞌo ni Ndioxi naꞌa, na íyo kuachi

³ Ñani yo xiꞌin kuꞌva yo, ndiꞌi saa ichí xíniñuꞌu ni nde kaꞌan nde xaꞌa ndo xiꞌin Ndioxi. Chi ndóꞌo̱, ta kándixa ni ndo ra, ta vitin taan xáꞌnu ka ndo xiꞌin tuꞌun ra, saa kúꞌvi ni ini ndo xíni taꞌan ndo.

⁴ Ta ndeꞌe, ta ndee ni kúsini nde xiꞌin ndo, saa ndítuꞌun nde xiꞌin na ñani yo, na veꞌe ñuꞌu nuu kuaꞌan nde, káꞌan nde xaꞌa ndo xiꞌin na ya ndee ni ñúꞌu ndo nuu tindoꞌo, tíxuꞌvi ni ndo. Vani saa ndóꞌo̱ ndo ta ndee ni ndáa ini ndo xíni ndo Tata yo Jesucristo, xáꞌa ni ndo ndee kuaꞌan ndo ichí ra.

⁵ Ta xaꞌa tindoꞌo ya ndóꞌo ndo kua sínaꞌa yoo ya ndee ni ndaa ini Ndioxi, chi ndása vaꞌa ra ndóꞌo̱ ya kuchiñu ndo koo ndo xiꞌin ra nuu xáꞌnda chiñu ra, ta xaꞌa ya ñaa kua ndóꞌo ni ndo vitin.

⁶ Ta xaꞌa ya ndaa ni ini ra yakan kúu mií ra ichí xaa nduvaꞌa ni ra xiꞌin naꞌa, na síndoꞌo ni ndóꞌo̱.

⁷ Vani ndóꞌo ni ndo vitin, sundi vaxi kivi saa taxi ra ndikundee ndo nuu ndiꞌi ya ndóꞌo ndo, iin káchi taxi ra koo vaꞌa ni ndo xiꞌin nde. Ya yóꞌó ikan ra kivi ná ndiko koo Tata yo Jesucristo kixi ra nuu ndivi xiꞌin na tatun Ndioxi, na ndee ni ndee kúu mií.

⁸ Ta ndiko koo ra tañu ñu̱ꞌu̱, ya ndee ni xíxi, saa xaa nduvaꞌa ni ra xiꞌin naꞌa, na köo ndi̱xiin ndikuni Ndioxi, ni köo ndi̱xíin na kuni soꞌo na tuꞌun vaꞌa xaꞌa Tata yo Jesucristo.

⁹ Na ikán, ta ndee ni sindoꞌo Ndioxi na, ndiꞌi saa ichí taxi ra ndoꞌo ni na, saa tava ra na kuꞌun xika na nuu ra. Täxi ra koo na xiꞌin ra nuu luvi ni káa, nuu koo ra kaꞌnda chiñu ra.

¹⁰ Ta ya yóꞌó kua kuu tá kivi ná ndiko koo Tata yo Jesucristo. Sundi mií ndóꞌo̱, na ñuu ra, na i̱í ku ndo xaa kaꞌnu ni ñaꞌa. Saa ndikanda ni ini ndo kuni ndo ra. Ta kivi ikán kua koo vaꞌa ni ini ndo, chi ndi̱kiꞌin vaꞌa ndo tuꞌun ra ya ndi̱kaꞌan nde xiꞌin ndo, saa ka̱ndixa ni ndo ya.

¹¹ Xaꞌa ya ñaa kua káꞌan ni nde xaꞌa ndo xiꞌin Ndioxi, ndiꞌi saa tiempo ya ná chindee ra ndóꞌo̱ ya kuu ndo naꞌa, na ndee ni ndáa yaꞌvi nuu ra, ya ndi̱kaxin ra ndóꞌo̱ kundikun ndo Tata yo Jesucristo koo ndo tá kuꞌva kúni mií ra. Ta saa ná ikan ra ya vaꞌa xiꞌin ndo sixinu ra ya ndíkani ini ndo ikan ndo, saa chi ndáa ni ini ndo ra xaꞌa chiñu íkan ndo.

¹² Ta saa ndikunuu sukun ni ya toꞌo Tata yo Jesucristo xaꞌa ndiꞌi ya íkan ndo, ni mií ra ta chinuu vaꞌa ni ra tuꞌun ndo nuu Ndioxi. Ndi̱xaꞌvi ni Ndioxi xaꞌa ya vaꞌa si̱niꞌi uun ra nuu yo xiꞌin mií Tata yo Jesucristo.