1 Tesalonicenses 5 - Xochapa Mixteco

¹ Ñani yo xiꞌin kuꞌva yo, köo xíniñuꞌu ka nde ndituꞌun nde xiꞌin ndo ndá kivi án ndá yoo kua ndiko koo Tata yo Jesucristo kixi tuku ra ñuu ivi yóꞌó.

² Chi xa xíni vaꞌa ndo ndá kuꞌva koo ndiko koo ra kixi ra. Tá kuꞌva íkan iin ra kuiꞌna kíꞌvi síkuiꞌna ñǔu, saa ikan ra, iin naá ini naꞌa ndiko koo ra.

³ Tá xa̱á naꞌa káꞌan na: “Vaꞌa ni táxin káa ndóo yo, köo ya ndíꞌi ini yo xaꞌa”, káchi na. Ta saa kua iin kuu soꞌva tindaa tindoꞌo nuu na. Tá ndóꞌo iin ñaꞌa yá ñúꞌu seꞌe, iin kúu soꞌva xáa seꞌe yá xáꞌnda ya, kuꞌva saa kundoꞌo naꞌa tá ná ndiko koo Tata yo Jesucristo ñuu ivi yóꞌó. Ta nda iin ka na nïꞌi nuu kuꞌun na ya kaku na nuu tindoꞌo ya ndee ni vaxi nuu na tiempo ikán.

⁴ Sundi ndóꞌo, ñani yo, ta xa kúndaa vaꞌa ini ndo xaꞌa ya yóꞌó, süvi ndóꞌo̱ xíka ichí nuu naá ku ndo yakan ndikanda ni ini ndo tá ná kuu saa. Chi iin kuu soꞌva ndiko koo Tata yo Jesucristo, tá kuꞌva íkan ra kuiꞌna saa ikan ra.

⁵ Chi ndóꞌo̱ ta íyo ndo ichí nuu íyo ñu̱ꞌu̱ yéꞌe̱. Nda iin yo köo íyo nuu naá, ni nuu íyo ni ya väꞌa köo xíka yo.

⁶ Yakan kua ná köo yo tá kuꞌva íin naꞌa, na kíxi. Xíniñuꞌu yo kundito yo. Küsun yo tá íkan naꞌa, na köo íyo ndúví, ná kundito yo, ta ná koo kaxin teꞌe ini yo.

⁷ Chi naꞌa, na kíxi, ta ñǔu kíxi na, ta na xíꞌi ta ñǔu xíꞌi na.

⁸ Sundi yoo ndíkun Tata yo Jesucristo, ta nduvi xíka yo nuu yéꞌe̱, yakan ná koo kaxin teꞌe ini yo. Tá íkan yo saa ta saa kua ndáa ni ini yo xíni yo ra, saa kúꞌvi ni ini yo xíni yo ra. Ta saa kua ndási ndaꞌa ra nima yo tá íin nda lapa nda íyo kàà ndási ya kándika nda, saa íin yo. Ta ndíkaa teꞌe ya téꞌe xi̱ní nda ya ndási ya xi̱ní nda, kuꞌva saa íkan ra xiꞌin yo ndáa ra xíni yo xaꞌa ya kúndaa teꞌe ini yo ya sikaku ra yoo.

⁹ Chi Ndioxi ta köo ndi̱kaxin ra yoo ya sindoꞌo ra yoo, ndi̱kaxin ra yoo ya sikaku ra yoo tixin Tata yo Jesucristo.

¹⁰ Ta saa koo yo xiꞌin ra chi mií ra ku ra ndi̱xiꞌi xaꞌa yo yakan kua án yo táku ku yo án yo ndi̱xiꞌi ku yo, ta kuchiñu yo koo yo xiꞌin ra tá ná ndiko koo ra.

¹¹ Xaꞌa ya ñaa kua xaꞌa ndo ndee xiꞌin taꞌan ndo, chindee taꞌan ndo xiꞌin na taꞌan ndo ya ná kuaꞌnu ka na xiꞌin tuꞌun Ndioxi. Tá kuꞌva íkan ndo vitin saa ikan ndo xiꞌin taꞌan ndo.

Ndítuꞌun ra Pablo xiꞌin na ndíkun Jesús

¹² Ñani yo xiꞌin kuꞌva yo, xíkan ni nde ya mani nuu ndo ya kañuꞌu ni ndo na taꞌan yo, na chee nuu ndo, saa chi na ñaa ku na sínaꞌa ndóꞌo̱ ta ndíkani na tuꞌun Tata yo nuu ndo.

¹³ Kuꞌvi ni ini ndo kuni ndo na ñaa ta saa xaa toꞌo ndo na xaꞌa chiñu íkan na nuu ndo. Ta vivií ni koo ndo xiꞌin taꞌan ndo.

¹⁴ Ta saa káꞌan tu nde xiꞌin ndo xaꞌa naꞌa, na köo xíin xaa chiñu, ndaꞌi ndo xiꞌin na ná xaa chiñu na, ta sindiko ndo ini tá kúu naꞌa, na ndíkava ni ini, saa chindee ndo na vita ini. Ta kaꞌnu koo ini ndo xiꞌin ndiꞌi naꞌa.

¹⁵ Kuenta koo ndo, sïndiko koo ndo ya väꞌa nuu taꞌan ndo. Ndisaa ya vaꞌa ikan ndo xiꞌin taꞌan ndo, saa ikan ndo xiꞌin ndiꞌi naꞌa.

¹⁶ Ta ndiꞌi saa kivi koo vaꞌa ni ini ndo, kusini ni ndo.

¹⁷ Kaꞌan ni ndo xiꞌin Ndioxi ndiꞌi saa ichí, xïkuiin ndo.

¹⁸ Ndiꞌi saa ichí taxi ndo tixaꞌvi ndaꞌa ra xaꞌa ndiꞌi ñaꞌa, saa chi saa kúni Ndioxi ikan ndo xaꞌa ya ndíkun ndo Jesucristo.

¹⁹ Käsi ndo nuu Tachi I̱í Ndioxi.

²⁰ Kündasi nuu ndo kuni ndo tuꞌun Ndioxi ya síkaꞌán ra ini naꞌa kaꞌan na xiꞌin ndo.

²¹ Sundi koto ndoso ndo ndiꞌi tuꞌun ya káꞌan na xiꞌin ndo sínaꞌa na ndóꞌo̱, tá tu ya ndaa kua ta ndikiꞌin ndo ya.

²² Ta kuxika ndo nuu ndiꞌi ñaꞌa ya väꞌa.

²³ Ta mií Ndioxi, ra táxi koo vaꞌa ni ini yo ná xaa i̱í ni ra ndiꞌi ni kúu ya vaꞌa ndo xiꞌin ya xínituni ndo xiꞌin ikin kuñu ndo. Saa ná chivaꞌa ra ndóꞌo̱, nda iin kuachi ná küu mií ndo tá kivi ná ndiko koo tuku Tata yo Jesucristo kixi ra ñuu ivi yóꞌó.

²⁴ Saa chi Ndioxi ra ka̱na ndóꞌo̱ kundikun ndo ra, ta xaa súvi ra ya ndi̱kaꞌan ra xiꞌin ndo.

Ndái ra Pablo na veꞌe ñuꞌu ndóo ñuu Tesalónica

²⁵ Ñani yo xiꞌin kuꞌva yo, ndúku ni nde ya mani nuu ndo kaꞌan ni ndo xiꞌin Ndioxi xaꞌa nde.

²⁶ Saa tá ndíkitaꞌan ndo xáa kaꞌnu ndo Ndioxi ta xaa toꞌo taꞌan ni ndo.

²⁷ Ta xiꞌin ichí ya táxi Tata yo Jesucristo ndaꞌa i kua káꞌan i xiꞌin ndo ya kaꞌvi ndo tutu yóꞌó nuu ndiꞌi na ñani yo xiꞌin kuꞌva yo.

²⁸ Ta mií Tata yo Jesucristo ná chikaa ni ya vaꞌa ndiꞌi ndo. Saa ná koo.