Ruf Aagbaŋ 4 - Uwumbɔr aagbaŋ

Boas aah di Ruf di kpan pu na

¹ Boas nan buen nin chee kitiŋ ngbaan ponn ni aanib kuun ni ki kpokl tibɔr kitiŋ ngbaan aabisamɔb chee na, le ki ti kal nima. Le Elimelek aado aanii chob chob, u Boas ba len waabɔr na, nan jer nima chee, le Boas yin u ke, “Njɔ, dan do, ki nan kal.” Le u buen ti kal.

² Le Boas nyan kitiŋ ngbaan ni aayidam kipiik di kpee bi pu aan bi mu nan kal. Baah kal ti doo na,

³ le Boas bui udo yoo na ke, “Naomi aah nyan ni Moab aatiŋ ni ki gir ni na, u ban ke u di tikpel Elimelek aakpaakon na di kooh la,

⁴ le m ban m nyaa si. Tɔ, aa yaa ga daa mu kan, aa daa mu bijab bi ka na aanimbil ni. Aa yaa kaa ti ki gee mu kan, aa len, aan bi ŋun; ba pu? sin le kpa nsan ke aa pue daa mu, le m nin paa aa pu.” Le uja ngbaan bui ke, “M ga daa mu.”

⁵ Le Boas bui u ke, “Ni ŋan; tɔ, aa yaa daa nkpaakon ngbaan Naomi chee kan, aa ga kpan Ruf, u ye Moab aatiŋ aanii ki ye ukpopii na mu la, le bukpaab ngbaan gaar unii u kaa ki bi na aadichal ni.”

⁶ Uja ngbaan nan gar ke, “Ni yaa ye kina kan, m di maasan mu m kpa ke m daa bukpaab ngbaan na tii si; ba pu? ni mɔk ke mi mbaa aabim aan nan ŋmaa ji bu aafaal. Maan ki daa bu, aa ga ŋmaa daa bu.”

⁷ Tɔ, n‑yaayoonn ngbaan bi yaa nan bi kooh tiwan, bee bi ban bi kpeln tiwan aan kidaak ti kal kan, ni nan ye nkaal le ke unii u bi kooh na takr waanaatakl di tii unii u bi daa na. Israel yaab yaa nan ti ŋa kina kan, ni mɔk ke tibɔr doo le na.

⁸ Kina pu na, uja ngbaan aah nan bui Boas ke u daa bu na, le u chuu takl waanaatakl di tii Boas.

⁹ Le Boas bui biyidam kipiik na, ni bimɔk nan bi nima na ke, “Din wee, ni kan ki ye biseeraadam, ke m daa Naomi chee Elimelek aah yeh tiwan ni mɔmɔk aan ni nan kpaln ujapɔtiib Malonn ni Kilionn yaan na.

¹⁰ Ki kpee, Malonn aakpopii Ruf, u ye Moab aatiŋ aanii na mu kpaln mpuu la. Nimina le ga cha Elimelek u kaa ki bi na aawangol gaar waadichal ni, le waadichal aan ber udo yaab chee, ni waatiŋ ni. Nimi le ye biseeraadam din wee.”

¹¹ Biyidam ngbaan ni bimɔk nan bi nima na, nan bui ke, “Mbamɔn, ti ye biseeraadam. Uwumbɔr cha aapuu ngbaan ŋa ke Rachel ni Lea bi nan maa Jakob lidichal na. U tii si likpal Efraf aamaal ni, ki cha Betlehem aanib mɔmɔk li nyi si.

¹² Cha Uwumbɔr aah ban u tii si mbim mu upiisapɔɔn wee chee na ŋa saadichal ke Juda ni Tamar aajapɔɔn Peres aadichal na.”

David aayaajatiib aamaal

¹³ Kina pu le Boas nan yoor Ruf kun udo ki ti di u ŋa upuu. Le Uwumbɔr nan biin u pu, le u dek ki ma ubijabo.

¹⁴ Le bipiib biken bui Naomi ke, “Pak Uwumbɔr. U tii si yaabil u ye ubijabo ki ga nan li joo si na. U cha ubo ngbaan nan li kpa liyimbil Israel aatiŋ ni.

¹⁵ Aabipuu gee si la, le waah ŋa pu tii si na jer mbijabim bilole aah ga ŋmaa ter si pu na. N‑yoonn mue u tii si yaabil u ga tii si limɔfapɔln ki li kii si buyoonn aa por na.”

¹⁶ Le Naomi yoor ubo ngbaan ki di ŋmeen, le ki kpiin u.

¹⁷ Bipiib bi nan bi gbɔk bi na nan yin ubo ngbaan ke Obed. Bi nan bui unii mɔk ke, “Naomi kan ubijabo a.” Le Obed nan ma Jese u nan ma David na.

^18-22 Mmaal ngbaan, ki nyan Peres mɔk ki ti saa David chee na sɔ: Peres nan ma Hesronn, le Hesronn mu ma Ram, le Ram mu ma Aminadab, le Aminadab mu ma Nasonn, le Nasonn mu ma Salmonn, le Salmonn mu ma Boas, le Boas mu ma Obed, le Obed mu ma Jese, le Jese mu ma David.