Ruf Aagbaŋ 1 - Uwumbɔr aagbaŋ

Elimelek ni waadichal aah fii buen Moab aatiŋ ni pu na

^1-2 N‑yoonn mu jer aan Israel yaab aa nan kee kpa bibɔrb na, le nkon nan lir Israel yaab aatiŋ pu. Kina pu le uja u bi nan yin u ke Elimelek, aan u ye Efraf aamaal aanii, ki koo Betlehem aatiŋ ki bi Juda aatiŋ pu na, ni upuu Naomi, ni ujapɔtiib bilee bi bi yin bi ke Malonn ni Kilionn na, nan laa fii kun Moab aatiŋ ni.

³ Baah nan ti koo nima na, le Elimelek kpo, ki cha Naomi ni waabijabim mulee na.

⁴ Bi nan yoor Moab aasapɔm la, bi nan yin ubaa ke Opa, ki yin uken ke Ruf. Ŋibin kipiik aah jer na,

⁵ le Malonn ni Kilionn mu kpoi, ki cha Naomi u ye ukpopii kaa ki kpa mbim na, ni bikpopiib bilee na.

Naomi ni Ruf aah gir kun Betlehem aatiŋ ni pu na

⁶ Naah yunn siib na, le Naomi ŋun ke Uwumbɔr ŋa waanib tinyoor ki tii bi tijikaar sakpen; le u gor ke u ni ubipuutiib nya Moab aatiŋ ni.

⁷ Bi mɔmɔk nan kpaan fii ke bi gir Juda aatiŋ pu. Baah cha na,

⁸ le u bui bi ke, “Gir kun man nido, ki ti li bi ninatiib chee. Uwumbɔr ŋa nimi tiŋann ke naah ŋa min ni bi kpoi na tiŋann pu na.

⁹ Uwumbɔr ki cha ni mɔmɔk kan bijab ki mɔn ki kan ŋidichal.” Le Naomi moor bitakpin ki chɔi bi. Bi nan piin ki bi wii,

¹⁰ ki bui ke, “Aayii. Ti ga dii si buen saanib chee la.”

¹¹ Le Naomi bui bi ke, “Mbisatiib, gir kun man. Ba ŋa ni ban ni dii mi? Ni dak ke m ga ki ŋmaa maa mbijabim aan ni nan mɔn bi ii?

¹² Gir kun man; ba pu? m por sakpen ke m ki mɔn tichar. Hali m yaa ŋa nlandak ki kpa limakl ke m ga ki maa, ki mɔn tichar kinyeek kee, ki ma mbijabim kan,

¹³ ni ga kii ki kiir bi aan bi ti chikr aan ni nan mɔn bi ii? Nimina ga ŋmaa kiir nimi ni taa mɔn ubaa aa? Mbisatiib, maa dak ke kina ga ŋmaa ŋa. Uwumbɔr yii mi ki fenn upuwɔb tii mi, le nsui bii ni pu pam.”

¹⁴ Le bi nan ki piin ki bi wii; le Opa chɔi uchapii ki gir kun, le Ruf ma si bub joo uchapii kaan di u lii.

¹⁵ Le Naomi bui u ke, “Ruf, aayɔnn gir kun udo yaab, ni baawaal chee. Aa mu li dii u cha.”

¹⁶ Ruf nan gar u ke, “Taa bui mi ke m buen ki cha si. Cha m dii si buen. Saah cha nimɔk na, m ga buen; saah ga li koo nimɔk na, m mu ga li koo nima la. Saanib ga li ye maanib la, le Saawumbɔr li ye Maawumbɔr.

¹⁷ Nin chee aa ti kpo na, nima chee le m mu ga kpo, le bi sub mi nima. Nkun yaa kaa yakr mi aa chee, le min le yaa yakr aa chee kan, Uwumbɔr daa ntafal sakpen.”

¹⁸ Naomi aah kan ke Ruf sil ban ke u dii u buen na, le waa ki gar tibaa.

¹⁹ Bi nan cha le ki ti fuu Betlehem aatiŋ ni. Baah ti fuu na, le kitiŋ ngbaan aanib mɔmɔk nan kpa mpopiin, le nima chee aapiib teen ke, “Naomi sil ye ee?”

²⁰ Le Naomi bui ke, “Taa ki yin mi ke Naomi, ni li yin mi ke Mara, ba pu? Uwumbɔr Mpɔɔnsakpiindaan cha mmɔb ponn ni toŋ.

²¹ Maah nan nyan do ki cha na, m nan kpa pam, le Uwumbɔr di mi giin ni aan maa ki joo ni nibaa. Uwumbɔr Mpɔɔnsakpiindaan doo mi ki di tibɔbir tii mi, le ni beenin yin mi Naomi ii?”

²² Naomi ni ubipuu Ruf u ye Moab aatiŋ aanii na aah nan nyan ni Moab aatiŋ ni ki gir kun ni pu na le na. Binib nan bi piini lidicheel le bi fuu Betlehem aatiŋ ni.