Nnyam 37 - Uwumbɔr aagbaŋ

Baah kpaa Uwumbɔr Aakaal Aadakaa pu na

¹ Besalel nan kpaa Uwumbɔr Aakaal Aadakaa; u nan di lisiijal aadɔ le ki di kpaa u, dakaa ngbaan aah nan fɔk kitiŋ pu na nan ye ŋisaŋ ŋilole ni ligeln, le waah waa pu na nan ye ŋisaŋ ŋinaa ni ligeln. Nfɔfɔk paacham mu nan ye ŋisaŋ ŋinaa ni ligeln la.

² U nan di salmaa aakur ŋmeen le donn biin u ponn ni, ni lipaal mɔmɔk, le ki di salmaa aakur ŋa nkuul mann gonn u paacham aamɔgben.

³ U nan di salmaa aakur le mɔɔ ibuen inaa ki di dab ŋipepel ŋinaa ngbaan aataa.

⁴ U nan kpii lisiijal aadabil ŋilee ke bi li joo yoor dakaa ngbaan, le ki di salmaa aakur donn biin ŋi pu,

⁵ le ki di ŋi bɔ ibuen inaa i dab baa dakaa ngbaan aataa na.

⁶ U nan di salmaa aakur ŋmeen le ŋa libiil. Laah nan fɔk pu na nan ye ŋisaŋ ŋilole ni ligeln la, le laah waa pu na nan ye ŋisaŋ ŋinaa ni ligeln.

⁷ U nan di ligagaar gbaa salmaa aakur ki mɔɔ tiwan ni kpa ifeen na nilee,

⁸ nibaa nan si dakaa aagbaan mubaa, le niken mu si ngbaan muken. U nan mɔɔ ni, le tiwan ngbaan ni libiil dab tɔb ki kpaan liwanbaal.

⁹ Tiwan ngbaan si libiil pu le ki tok tɔb, le naafeen bii li pu.

Baah kpaa Uwumbɔr aaboroboro aateebul pu na

¹⁰ U nan di lisiijal aadɔ le kpaa teebul ngbaan, waah nan fɔk kitiŋ pu na nan ye ŋisaŋ ŋiloob, le waah waa pu na nan ye ŋisaŋ ŋitaa, le waah fɔk paacham pu na nan ye ŋisaŋ ŋinaa ni ligeln.

¹¹ U nan di salmaa aakur ŋmeen le donn biin u pu, le ki di salmaa aakur ŋa nkuul mann gonn u paacham.

¹² U nan mɔɔ limɔgbaln aakuul, naah nan pee pu na nan ye lisangeln, le u di kpaŋ umɔgben.

¹³ U nan mɔɔ salmaa aakur aabuen inaa dab teebul ngbaan aamɔgben ŋinaa ngbaan, nin chee ŋitaa ŋinaa baa na.

¹⁴ Ibuen ngbaan ni, le bi di ŋidabil ŋi bi joo yoor teebul ngbaan na bɔ i ponn ni, teebul ngbaan aamɔgben chee.

¹⁵ U nan di lisiijal aadɔ le kpii ŋidabil ŋilee ngbaan, le ki di salmaa aakur donn biin ŋi pu.

¹⁶ U nan di salmaa aakur le mɔɔ teebul ngbaan aawan mɔmɔk, ni nan ye nsambim, ni mbobim, ni ŋisambijal aan bi joo ŋani ŋisubil aadaan aapiin na.

Baah ŋa karyaa aah tɔŋni tiwan ni pu na aabɔr

¹⁷ U nan di salmaa aakur ŋmeen le mɔɔ karyaa tiib aah tɔŋni tiwan ni pu na. U nan di ligagaar gbaa ki ŋa tiwan ni pu karyaa tiib tɔŋni na, ki naan nsupuun dab ni pu, aan ni ŋa tiwanbaan.

¹⁸ U nan mɔɔ ŋipan ŋitaa ŋŋangii, ŋitaa mu ŋŋangan, le ni kpaan ŋipan ŋiloob.

¹⁹ U nan naan nsupuun mutataa ki di dab ŋipan ŋiloob ngbaan mɔmɔk pu.

²⁰ U nan naan nsupuun munaa ki di dab kaasisik ni aapachachaal na pu.

²¹ U nan naan nsupuun aah laa bi ŋeeni pu na ki di dab ŋipan ŋiloob ngbaan mɔmɔk pu.

²² Tiwan ngbaan mɔmɔk nan ye baah di ligagaar gbaa salmaa u na ŋmeen la.

²³ U nan ŋa karyaa bilole ki ŋeer ŋipan ŋilole ngbaan, le ki di salmaa ŋmeen mɔɔ kijubababr, ni ŋipen.

²⁴ U nan di salmaa aakur ŋmeen ti aanyunyuun ga pii ndibim kuruwaa piitaa na le mɔɔ tiwan ngbaan mɔmɔk.

Baah nan ŋa baah seer tulalee aayon nin chee na pu na

²⁵ U nan di lisiijal aadɔ le ŋa baah seer tulalee aayon tiwan ni pu na. Ni nan bi likpakpaln, le naah fɔk kitiŋ pu na nan ye ŋisaŋ ŋitaa, le naah waa pu na mu nan ye ŋisaŋ ŋitaa, le naah fɔk paacham mu pu na nan ye ŋisaŋ ŋiloob. Naamɔchɔn ŋinaa, ni nima nan ye liwanbaal la.

²⁶ U nan di salmaa aakur ŋmeen le donn biin paacham, ni isikakl mɔmɔk inaa, ni ŋimɔchɔn ŋinaa, le ki di salmaa aakur ŋa nkuul mann gonn ni.

²⁷ U nan mɔɔ salmaa aakur aabuen ilee, ki di dab baan ŋimɔgben aataab, nin chee bi ga di idɔ bɔ ki li joo yoor tiwan ngbaan na.

²⁸ U nan di lisiijal aadɔ le kpii idɔ ngbaan, ki donn salmaa aakur biin i pu.

²⁹ U nan ŋa Uwumbɔr aakpan ni tulalee aayon mu nu mɔ na mu.