Nnyam 36 - Uwumbɔr aagbaŋ

¹ “Besalel, ni Oholiab, ni biwanŋab biken bi Uwumbɔr nan di kina aalan ni nnyim tii bi, aan bi nyi tiwan ni mɔmɔk bi ga di ŋa Uwumbɔr Aabool ngbaan na, ga ŋa tiwan ngbaan mɔmɔk Uwumbɔr aah tuk bi pu na.”

Baah nan joo ni ipiin sakpen pu na

² Moses nan yin Besalel, ni Oholiab, ni biken bi Uwumbɔr di nnyim aalan tii bi aan bi ban ke bi ter na, ki tuk bi ke bi piin lituln ngbaan.

³ Bi nan gaa u chee ipiin i mɔmɔk Israel yaab nan joo ni ke bi nan di ŋa Uwumbɔr Aabool ngbaan na. Tɔ, Israel yaab nan beenin joo ni baapiin, ki nan tii Moses kichakpiik mɔmɔk ni.

⁴ Le biwanŋab bi nan bi tun lituln ngbaan na buen

⁵ ti tuk Moses ke, “Binib ngbaan aah joo ni pu na, ni chaar jer Uwumbɔr aah bui ke ti di tiwan ni ŋa Waabool ngbaan na.”

⁶ Le Moses tun binib ngbaan chee, ki bui bi ke ni ŋeer a, ubaa taa ki joo ni nibaa; nima pu na, binib ngbaan aa nan ki di nibaa buen.

⁷ Baah nan joo ni pu na nan wiir ti jer baah ban pu na.

Baah ŋa Uwumbɔr Aabool pu na

⁸ Biwanŋab ponn ni, binib bi nyi lituln ngbaan sakpen na nan ŋa Uwumbɔr Aabool na. Bi nan di ipiih aakur ti man chaun, ni nsiin, ni timann, luu ŋitanyaan aakeken kipiik, le ki gbaŋ ŋi ki naan tiwan ni kpa ifeen na mann gonn ŋi pu, le ki ŋa ŋi.

⁹ Ŋitan ngbaan mɔmɔk nan ŋak tɔb la, ŋaah fɔk pu na nan ye ŋipiikeken ŋilole, le mpepeen nan ye lipiikekeln libaa.

¹⁰ Bi nan di ŋikeken ŋiŋmu ki kpaan ŋal dab tɔb, le ki di ŋiŋmu ŋi gur na mu ŋal dab tɔb.

¹¹ Bi nan di ŋikekengen bɔmbɔn le ki di ŋa iŋminsarkee ki kpaŋ igbaan, lipaal aakeken mɔmɔk pu.

¹² Bi nan ŋa iŋminsarkee piiŋmu le njan aakekeln pu, le ki ŋa piiŋmu mu ligeln liken na pu, le ŋi ŋak tɔb.

¹³ Bi nan di salmaa ŋa ipigɔrkee piiŋmu, ki di chuu iŋminsarkee ngbaan dab tɔb aan ni ŋa likekeln libaa.

¹⁴ Bi nan di ŋitan ŋi bi di uŋoob aakur luu na aagen kipiik ni libaa ŋa likekeln biin Libool ngbaan pu.

¹⁵ Bi nan ŋa ni mɔmɔk ŋak tɔb la, nfɔfɔk nan ye ŋipiikeken ŋilole ni ligeln, le mpepeen ye lipiikekeln libaa.

¹⁶ Bi nan di ŋitan ŋiŋmu le ŋal dab tɔb, le ki di ŋiloob mu ŋal dab tɔb, le ni ŋa ŋikeken ŋilee.

¹⁷ Bi nan ŋa iŋminsarkee piiŋmu le ki di kpaŋ libaa, le ki ŋa iŋminsarkee piiŋmu mu kpaŋ liken na.

¹⁸ Bi nan di tikumann ŋa ipigɔrkee piiŋmu, le ki di ŋipepel ŋilee ngbaan lɔk dab tɔb aan ni ŋa lipepel libaa aawan.

¹⁹ Bi nan di ipihja aagbaman le ki di ŋa libiil libaa, le ki di ngbanyaan muken ŋa liken, aan ni li bii paab.

²⁰ Bi nan di lisiijal aadɔ kpaa Libool ngbaan aawon ki di siin.

²¹ Tiwon ngbaan aafɔfɔk nan ye ŋitaa kipiik ni ŋiŋmu la, le naawawaan mu ye ŋisaŋ ŋinaa ni ligeln.

²² Bi nan ŋa ŋimɔchɔn ŋilelee, aan nima kan, tiwon ngbaan aadɔ ga ŋmaa toŋ tɔb pu. Ni mɔmɔk nan bi kina la.

²³ Bi nan di idɔja moninko le ki di ŋa ŋŋangii wɔb aawon,

²⁴ le ki di tikunabr aakudɔ imonko ilee ki di bɔ puin taab, ikudɔ ilee le bi di bɔ puin idɔja ngbaan ibaabaa aataab, ki di kpaa dab tiwon aamɔchɔn ŋilee.

²⁵ Bi nan di idɔja moninko le ki di ŋa ŋŋangan wɔb aawon,

²⁶ le ki di tikunabr aakudɔ imonko ilee bɔ puin taab, ikudɔ ilee le bi di bɔ puin idɔja ngbaan ibaabaa aataab.

²⁷ Bi nan di idɔja iloob le ki ŋa liwilir wɔb, Libool ngbaan aapuwɔb,

²⁸ le ki di idɔja ilelee ki ŋa igulɔ mɔmɔk.

²⁹ Bi nan di igulɔ aadɔja ngbaan di kpaa dab taab, le i di kina ti dab paacham aadɔ mu. Bi nan ŋa igulɔ ilee ngbaan aawon aadɔja kina la.

³⁰ Idɔja ngbaan nan ti kpaan iniin la, ni tikunabr aakudɔ kipiik ni iloob i dɔ taab na, bi nan di ilelee le di kpaa dab taab aadɔja na mɔmɔk.

³¹ Bi nan di lisiijal aadɔ le ŋa idɔpuinkee kipiik ni iŋmu, Libool ngbaan aapepel libaa nan kpa iŋmu la,

³² lipepel liken mu iŋmu, le liwilir, lipuwɔb mu iŋmu.

³³ Kaasisik ni aadɔpuinkoo ma, bi nan di i puin i dan paacham aadɔja na pu, ki piin Libool ngbaan aapepel libaa ki ti saa liken.

³⁴ Bi nan di salmaa aakur le donn biin idɔ ngbaan mɔmɔk pu, le ki di salmaa aabɔmbim ŋmaan dab idɔpuinkee ngbaan mɔmɔk, bi nan donn salmaa aakur le ki biin i mu pu.

³⁵ Bi nan di ŋitanyaan ŋi bi di ipiih aakobɔnn, ni timann, ni nsiin luu ŋi na, ki di ŋa likekeln, le ki gbaŋ, ki naan tiwan ni kpa ifeen na li pu.

³⁶ Bi nan di lisiijal aadɔ le ki ŋa idɔja inaa, ki donn salmaa aakur biin i pu, le ki di salmaa aapigɔrkee di ŋmaan chuu likekeln ngbaan ki yakr Libool ngbaan nfum mulee. Bi nan ŋa tikunabr aadɔ inaa i dɔ taab na ki di chuu idɔja ngbaan.

³⁷ Bi nan di ŋitanyaan ŋi bi di ipiih aakobɔnn, ni timann, ni nsiin luu ŋal dab tɔb na, le ki gbaŋ ŋimɔgben, le ki di biin mbisamɔb.

³⁸ Bi nan kpii idɔja iŋmu, le ki ŋa ipigɔrkee i pu, le ki di ŋmaan chuu likekeln ngbaan. Bi nan di salmaa aakur le donn biin idɔja ngbaan aapaacham ni taab, le ki di tikumann aakudɔ iŋmu di punn mbisamɔb aadɔja ngbaan aataab.