Nnyam 31 - Uwumbɔr aagbaŋ

Binib bi ga ŋmaa ŋa Uwumbɔr Aabool aawan na

¹ Uwumbɔr nan bui Moses ke,

² “M lee Uri aajapɔɔn u bi yin u ke Besalel u ye Hur aayaabil ki nyan ni Juda aanibol ni na,

³ le ki gbiin u min Uwumbɔr aapɔɔn. M cha u kpa ŋuntii, ki kpa nlan ki nyi tiwan mɔmɔk aatuln,

⁴ u kpa nlandak ki nyi waah ga di salmaa, ni tikunabr, ni tikumann,

⁵ ki donn ŋa tiwanyaan mɔmɔk aabɔŋ pu na, ki geei ŋitakpanyaan, ki kpii tiwanyaan aabɔŋ mu.

⁶ M ki nyan Ahisamak aajapɔɔn u bi yin u ke Oholiab, ki nyan ni Dann aanibol ni na, ke u ter u. M ki tii binib bi mu nyi tiwan mɔmɔk aatuln na nlan, ke bi ŋmaa ŋa tiwan ni mɔmɔk m tuk bi ke bi ŋa na.

⁷ Bi ga ŋa Maabool, ni Maakaal Aadakaa ni waabiil, ni Libool ngbaan aawan mɔmɔk,

⁸ ni teebul ni waawan mɔmɔk, ni karyaa tiib aah tɔŋni salmaa aawan ni pu na, ni naawan mɔmɔk, ni baah seer tulalee aayon nin chee na,

⁹ ni baah seer kitork nin chee na, ni naawan mɔmɔk, ni nnyun aasambil, ni laapɔtaln,

¹⁰ ni bitotoorb aawanpeenkaanyaan ki tii Aaronn ni ujapɔtiib, bi li joo tun kitork aatuln,

¹¹ ni maakpan, ni tulalee aayon mu nu mɔ, aan bi joo ŋani Chain Aapepel ni na. Bi yaa ban bi ŋa tiwan ngbaan kan, bi ŋa ni mɔmɔk maah mɔk si pu na.”

Likpaakool daal, lifuur aawiin daal

¹² Uwumbɔr nan ki bui Moses

¹³ ke u tuk Israel yaab ke, “Ni li joo likpaakool daal, nwiin mundaal ni ga fuur na; ba pu? mu ye limɔkl, le ki mɔk ke tipuur bi m ni nimi aakaasisik ni ki cha n‑yoonn mu choo na, le ki mɔk ke min Uwumbɔr le lee nimi, ni li ye maanib.

¹⁴ Ni li joo lifuur aawiin ngbaan; ba pu? mu bi chain. Unii umɔk yii, kaa joo mu chain, ki tun lituln nwiin ngbaan daal na kan, ni ku u.

¹⁵ Ni kpa iwiin iloob, ni li tun nibaa aatuln, le winlole daal ngbaan ye lifuur aawiin le tii min. Umɔk tun lituln liyaadaal ngbaan na kan, ni ku u.

¹⁶ Israel yaab li joo nwiin mue daal, mu li ye tipuur aamɔkl.

¹⁷ Ni ga li ye limɔkl le m ni Israel yaab chee; ba pu? Min Uwumbɔr le di iwiin iloob naan paacham ni kitiŋ, le winlole daal m doo lituln, ki kal fuur.”

¹⁸ N‑yoonn mu Uwumbɔr len Moses chee tibɔr doo, Sainai Aajool paab na, le u di ŋitakpapapan ŋilee ŋi uma Uwumbɔr ubaa ŋmee waakaal ŋi pu na di tii u.