Nnyam 20 - Uwumbɔr aagbaŋ

Uwumbɔr aakaal kipiik na aabɔr

¹ Uwumbɔr le nan len tibɔr timina mɔmɔk:

² “Min le ye Nidindaan Uwumbɔr u nyan ni nimi Ijipt aatiŋ ni, nin chee ni nan ye binaagbiib na.

³ “Ni taa doon liwaal libaa; ni li dooni min baanja.

⁴ “Ni taa naan tiwan nibaa ki di naŋ paacham aawan nibaa, bee kitiŋ aawan nibaa, bee nnyun ni aawan nibaa, ke ni doon ni.

⁵ Ni taa gbaan kitiŋ ke ni doon liwaal libaa; ba pu? min le ye Nidindaan Uwumbɔr, le maa ban m ni ubaa li kpaan yeh nimi. M ga daa binib bi nan mi na, ni biyaabitiib, ni bi mu aayaabitiib aatafal,

⁶ ki ga li gee binib churbakaa bi mu gee mi ki kii tii maakaal na.

⁷ “Ni taa yin maayimbil fam fam, min Nidindaan Uwumbɔr ga daa unii u yin maayimbil fam fam na aatafal.

⁸ “Ni li nyuŋni likpaakool daal aawiin, ke mu ye Maawiindaal la.

⁹ Ni kpa iwiin iloob, ni di tun nimi aatun,

¹⁰ le winlole daal ye lifuur daal ke ni li joo dooni mi. Nwiin ngbaan daal kan, nimi, ni nimi aabim, ni nimi aanaagbiib, ni nimi aawakor, ni biwɔwɔm bi bi nimi aatiŋ ni na ubaa taa tun lituln.

¹¹ Iwiin iloob le min Uwumbɔr di naan dulnyaa, ni kitaapaak, ni nnyusakpem, ni tiwan ni mɔmɔk bi ni ponn ni na, ki di winlole daal fuur. Nima pu le min Uwumbɔr ŋa tinyoor ŋa winlole daal pu ki ŋa mu chain.

¹² “Aa li pak aate ni aana, nima kan, aa ga li bi ki yunn kitiŋ ki m ga di tii nimi na ni.

¹³ “Aa taa ku unii.

¹⁴ “Aa taa gɔr kidagook.

¹⁵ “Aa taa su kinaayuk.

¹⁶ “Aa taa mɔn nnyamɔn paan unii ubaa.

¹⁷ “Aa taa cha aanimbil li man aaŋeen aatɔ aadichal, bee upuu, bee waanaagbiib, bee waanaa, bee waabon, bee waah kpa tiwan nimɔk na pu.”

Binib ngbaan aah san Uwumbɔr ijawaan pu na

¹⁸ N‑yoonn mu binib ngbaan nan ŋun utaal gben, ni kakaan aawiil, ki kan utaal moor, ni iŋmanyuu Sainai Aajool ngbaan pu na, le ijawaan chuu bi, le biwon gbaa, le bi san ti sil dandar.

¹⁹ Le bi bui Moses ke, “Ni yaa ye sin le len ti chee tibɔr kan, ti ga ŋun; ti san ijawaan ke Uwumbɔr yaa len ti chee kan, nibaakan ti ga kpo.”

²⁰ Moses nan giin bui bi ke, “Taa san ijawaan man, Uwumbɔr dan ke u nan tɔŋ nimi, le ki ban ke ni kii waamɔb, nima kan, naan tun titunwanbir.”

²¹ Tɔ, binib ngbaan nan beenin si dandar, le Moses baanja buen ntaalangbam bɔmbɔm ngbaan chee, nin chee Uwumbɔr bi na.

Kitork aabimbiln aakaal

²² Uwumbɔr nan tuk Moses ke u bui Israel yaab ke, “Ni kan min Uwumbɔr aah bi paacham ki len ni chee tibɔr pu na.

²³ Ni taa naan tikunabr, bee salmaa aawaa ke ni li dooni ŋi ki kpee m pu.

²⁴ Ni di titan ki maa kitork aabimbiln tii mi, aan ki di nimi aapiih, ni iŋoob, ni nimi aanaa toor kitork ki di see mmii ni tii mi, ki toor kimɔbaan aatork mu tii mi. Nin chee mɔk m nyan tii nimi ke ni li dooni mi na, le m ga dan ni chee ki nan ŋa tinyoor ŋa ni pu.

²⁵ Ni yaa ban ni di ŋitakpal maa kitork aabimbiln tii mi kan, ni taa kpii ŋi; ba pu? ni yaa di kichiln kpii litakpal kan, laa ki ŋan tii mi.

²⁶ Ni yaa maa kitork aabimbiln kan, ni taa maa naah ga li taar ŋi pu ki joi lipaab na; ni yaa ŋa kina ki taar chaa libimbiln ngbaan paab kan, ni ga di nibaa mɔk binib.