Nnyam 15 - Uwumbɔr aagbaŋ

Moses aalahn

¹ Nima chee le Moses ni Israel yaab nan gaa nlahn mumina ki pak Uwumbɔr: “M ga gaa ilahn ki pak Uwumbɔr, ba pu? waah nyaŋ pu na kpa kipak; u di itaan ni bijab bi jak i na mee lii nnyusakpem ponn ni.

² Uwumbɔr le ye u kii mi ki pɔɔ na. Uma le gaa mi lii. Uma le ye Maawumbɔr, le m ga pak u. Uma le ye nte Aawumbɔr, le m ga gaa ilahn ki pak waah kpa mpɔɔn pu na.

³ Uwumbɔr ye u ŋmaa to butɔb na la, waayimbil le ye Uwumbɔr.

⁴ U di Ijipt yaab aajab ni baatɔroku tiib ki di mee lii nnyusakpem ponn ni; baaninkpiib nyanyaam mɔmɔk nan bee nnyusakpem ponn ni.

⁵ Nnyusakpem mu nyoo na nan biin bi pu, le bi muin ti doon taab ke litakpal na.

⁶ Uwumbɔr, saaŋangii le tun mpɔɔn aatuln li kpa kipak na; muma le kool saadim aakpab yuk yuk.

⁷ Saanaan mu kpa kipak na ponn ni le aa joo saapɔɔn nyaŋni saadim. Saaŋuul naahn mmii le ki wu bi ke ŋikak na.

⁸ Aa pii libuln lii nnyusakpem pu, le nnyun fii sil paacham, le mu sil ke ligoln na; le nnyusakpem nin chee nyoo sakpen na kpaln nin chee pɔɔ na.

⁹ Timi aadin bui ke, ‘M ga paan bi pu aan ki chuu bi. M ga yakr baawangol le ki nyan maah gee ni na. M ga di maajaak aajuk le ki jenn bi ki gaa baah kpa tiwan ni na mɔmɔk.’

¹⁰ Uwumbɔr, aa nan fuur lii Ijipt yaab pu nfum mbaa le bi muin ke tikur na, ki bee nnyusakpem ni.

¹¹ Uwumbɔr, lilawaal bi ke si na? Ŋma bi ke si na, aan saabimbin bi chain kina? Ŋma ba tee bi ki tun lijinjiir, ni ŋitun sakpiin ke saah tun pu na?

¹² Sin le taln aaŋangii, le kitiŋ di timi aadim di nab.

¹³ Saah puu tipuur ti na aa beer fam, sin le loln saanib bi aa gaa bi lii na pu nsan, saapɔɔn ni le aa joo saanib, bi ti koo saatiŋ ki bi chain na ni.

¹⁴ Ŋinibol mɔmɔk ŋun aa pu, le ijawaan chuu bi, le biwon gbaa, ijawaan nan chuu Filistia yaab.

¹⁵ Ijawaan nan chuu Edom aaninkpiib, le Moab yaab aayidam aawon gbaa, le Kanaann yaab aataakpab yɔl,

¹⁶ le ijawaan lir bi pu. Uwumbɔr, binib ngbaan kan saapɔɔn, le ijawaan chuu bi, le bi si lik, kaa ŋmaa ŋa nibaa, le saanib bi aa nyan bi tinaagbiir ni na chuun jer.

¹⁷ Si le di bi kaan saajool pu, sin Uwumbɔr aah nyan nin chee ke ni li ye aado na, saadichal li aa maa li aabaa na ni.

¹⁸ Sin Uwumbɔr le ga li ye ubɔr ki cha n‑yoonn mu kaa kpa ndoon na.”

Miriam aalahn

¹⁹ Israel yaab nan chuun kitikuun pu le ki puur nnyusakpem, le n‑yoonn mu Ijipt yaab aajab, ni baataan, ni baatɔroku tiib, ni bijab bi ŋaal bi na mu nan paan Israel yaab pu nnyusakpem ponn ni na, le Uwumbɔr cha nnyun gir biin bi pu.

²⁰ Uwumbɔr aabɔnabpii Miriam, u ye Aaronn aaninkpan na nan yoor waachayakrtuun, le bipiib mɔmɔk mu yoor baachayakrtuun ki dii u ki waa liwaal,

²¹ Miriam le nan gaa ilahn ke: “Gaa ilahn ki pak Uwumbɔr man, ba pu? waah nyaŋ pu na kpa kipak; u di itaan ni bijab bi jak i na mee lii nnyusakpem ponn ni.”

Nnyun mu cho na

²² Moses nan loln binib ngbaan pu nsan ki nyan Limɔɔkal Aanyusakpem na chee, ki di bi dii Sur aateersakpiin ni. Bi nan chuun kiteek ngbaan ni, ki ti saa iwiin itaa, le baa nan kan nnyun.

²³ Le bi ti fuu nin chee bi yin ni ke Mara na, le ki ti kan nnyun, le mu nan cho pam, le baa ŋmaa nyun nnyun ngbaan. Nima pu le bi nan yin mu ke, “Mara.”

²⁴ Le binib ngbaan nan ŋulni Moses pu ki baa u ke, “Ti ga nyu ba?”

²⁵ Le Moses mee Uwumbɔr mbamɔm, le Uwumbɔr mɔk u ndɔ mubaa, le u di mu mee lii nnyun ngbaan ponn ni, le nnyun na mɔɔk, bi nyu. Nima chee le Uwumbɔr tii bi ikaal ke bi li joo i, le u ki toŋ bi nima chee mu.

²⁶ U nan bui bi ke, “Ni yaa kii tii mi n‑yoonn mɔmɔk, ki ŋani maah ban pu na, ki joo maakaal i m di tii nimi na kan, maan cha iween i aaboln m nan cha i lir Ijipt yaab pu na lir ni pu. Min le ye Uwumbɔr u sɔŋni nimi aaween na.”

²⁷ Le bi ti ki fuu Elim aanyunbun kipiik ni ilee, ni ŋibɔkpal aasui imonko itaa ni kipiik aah si gbɔk i na chee, le ki kal nima.