Nnyam 1 - Uwumbɔr aagbaŋ

Ijipt yaab aah nan ŋa Israel yaab falaa pu na

¹ Jakob aajapɔtiib bi nan dii u buen Ijipt aatiŋ ni na, bimɔk ni baamaal le nan ye

² Rubenn, ni Simeonn, ni Liifai, ni Juda,

³ ni Isakar, ni Sebulunn, ni Benjaminn,

⁴ ni Dann, ni Naftali, ni Gad, ni Aser.

⁵ Bi mɔmɔk nan kpaan ki ti saa binib imonko itaa ni kipiik, le ki nyan ni Jakob aamaal ni. Ujapɔɔn Josef ma nan puun bi Ijipt aatiŋ ni.

⁶ Baah bi nima na, le Josef, ni ukpetiib, ni baamaal bi nan bi n‑yoonn ngbaan na, nan kpo doo,

⁷ le biyaabitiib, bi nan ye Israel yaab na, nan ma mbim, le bi pɔr ki wiir ki gbiin Ijipt aatiŋ ni, ki kpa mpɔɔn pam.

⁸ Le ubɔrpɔɔn u kaa nan nyi Josef aabɔr na jin nnaan Ijipt aatiŋ ni.

⁹ U nan bui waanib ke, “Israel yaab bee moo pɔr ki kpa mpɔɔn, le baan ki lik pak timi.

¹⁰ Nibaakan ti ni timi aadim yaa kpa butɔb kan, bi ga kpee bi pu le bi to timi, le ki san nya kitiŋ kee ni. Cha ti ban mbimbin mu ga kiir bi, aan bi taa ki pɔr kpee na.”

¹¹ Nima pu na, Ijipt yaab nan nyan baanib le bi lik Israel yaab ki cha bi tun lituln li pɔɔ na, ki ŋani bi falaa sakpen. Bi nan cha Israel yaab le maa ntisakpem mulee mu bi yin mu ke Pitom ni Rameses na, ntim ngbaan nan ye nin chee ubɔr nan joo waajikaar ni waawan mɔmɔk bilni na la.

¹² Tɔ, baah nan nan Israel yaab ki moo ŋani bi falaa sakpen pu na, Uwumbɔr nan cha bi moo pɔr kpee kina la, le ki yaa gbiin Ijipt aatiŋ ponn ni, le Ijipt yaab nan gur san Israel yaab ijawaan,

^13-14 le bi nan moo ŋa bi falaa ki cha bi tun linaagbiituln. Bi nan cha bi maa tidir, ki ko baasar, kaa nan san bi kinimbaak.

¹⁵ Le Ijipt aabɔr bui Hiibru yaab aamamaam bilee bi bi yin bi ke Sifra ni Pua, bipiib bilee bi nan ter Hiibru yaab aapiib bi maa na ke,

¹⁶ “Ni yaa ban ni ter Hiibru yaab aapii u imalween chuu u na kan, ubo ngbaan yaa ye ubijabo kan, ni ku u, u yaa ye upiibo kan, ni taa ku u.”

¹⁷ Bimamaam ngbaan mu nan san Uwumbɔr ijawaan, le kaa kii ubɔr ngbaan aamɔb, le kaa ku mbijabim ngbaan.

¹⁸ Nima pu na, ubɔr nan yin ni bimamaam ngbaan le ki nan baa bi ke, “Ba ŋa ni ŋani kina? Ba ŋa ni cha mbijabim ngbaan bi, kaa ku bi?”

¹⁹ Le bi giin bui u ke, “Hiibru yaab aapiib aa bi ke Ijipt aapiib na; baamalween aa pɔɔ, bi yaa yin timi kan, ti nin ti ti fuu na muin upii ngbaan ma a.”

^20-21 Bimamaam ngbaan aah nan san Uwumbɔr ijawaan na, le u nan ŋa tinyoor ŋa bi pu ki cha bi ma mbim pam. Le Israel yaab too pɔr kpae ki kpa mpɔɔn.

²² Gbelngbeln na, ubɔr ngbaan nan siin nkaal ki bui waanib mɔmɔk ke bi di Hiibru yaab aabijabim bi bi laa ma bi na ki di mee lii Nail aamɔɔl ni, tɔ, bi taa ku mpiibim ma.