Ŋiyataŋak 14 - Uwumbɔr aagbaŋ

¹ Bipiib aalan le maa ŋidichal, le kijɔrk ber ŋi.

² Cha saabimbin li ŋan ki mɔk ke aa san Uwumbɔr ijawaan; li ye ubeebeedaan ki mɔk ke saa san u.

³ Ujɔr aapupuk le cha u len tibɔr sakpen; ulandaan aamɔliin le kii u.

⁴ Inaa yaa kaa bi i dar saakuu kan, saapil ga li ye nkuun la, le i yaa bi kan, li ga li gbii njikaabim.

⁵ Saah ga ŋmaa nyu useeraadaan u pu baala na len ibamɔn n‑yoonn mɔmɔk la, le saa kaan ŋmaa nyu u pu baala na ma geei inyamɔn ŋmeen la.

⁶ Unii u yoor ubaa paacham sakpen na aan ŋmaa kan nlan, le bilandam ma yaa ban bi bae kan, naa pɔɔ bi.

⁷ Nyan aabaa bijɔrb chee; baa kpa nibaa ki ga mɔk si.

⁸ Ni ŋa kinye aan ulandaan chi? Naah ye pu na le ye ke u nyi waah ga ŋa pu na. Ni ŋa kinye aan ugbaan kpa kijɔrk? Naah ye pu na le ye ke u dak ke u nyi la.

⁹ Bijɔrb yaa tun titunwanbir kan, naa muk bi, le bilandam ma ban chapinn.

¹⁰ Saamɔɔn ye saawan la, le saapombiin mu ye saawan. Saan ŋmaa yakr kina aawan tii ubaa.

¹¹ Utunwanbirdaan aadichal ga ber, le uninyaan ma aadichal beenin si.

¹² Saah dak ke nsan mu ye nsanyaan na le ga ŋmaa di si buen nkun ni.

¹³ Tilaar ga ŋmaa bɔr mpombiin. Tilaar ngbaan yaa ti doo kan, mpombiin ngbaan ga li beenin bi.

¹⁴ Titunwanbirdam ga kan tiwan ni ŋeer bi na. Bininyaam mu ga kan baatun aapar.

¹⁵ Ujɔr ma gaal tibɔr mɔmɔk keei la, le bilandam ma lik baah chuun pu na.

¹⁶ Bilandam chur bibaa le kaa koo tibɔr ni, le bigbaam ma bi yɔl yɔl le ki tun kaa dakl lik.

¹⁷ Unii u aasui fiir mala mala na tun kijɔrk aatuln la; binib aa gee unii u ŋmanni bi na.

¹⁸ Maa‑nyi‑nibaa‑dam kani baajɔrk aah ban pu na la, le bilandam ma aapar ye ichiin.

¹⁹ Titunwanbirdam ga gbaan binib bi aabimbin ŋan na chee le ki gaŋ bi ke bi san bi kinimbaak.

²⁰ Unii ubaa aa gee ugiin, hali u ni unii u koo gbɔk tɔb na aa gee u, le uwankpadaan ma kpa jɔtiib sakpen.

²¹ Aa yaa ban mpopiin kan, li ŋani bigiim tiŋann; aa yaa lik seen ubaa kan, ni ye titunwanbir la.

²² Aa yaa tun litunyaan kan, aa ga kan kipak ni lisil binib biken chee, le aa yaa tun titunwanbir kan, aa yenni la.

²³ Li tun ki kan tinyoor, aa yaa ka ki gbaa tibɔr baanja kan, aa ga ŋa ugiin la.

²⁴ Bilandam aapar le ye liwangol, bijɔrb ma aah kan pu na le ye kijɔrk ŋmeen.

²⁵ Useeraadaan u len ibamɔn na gaal binib aamɔfal lir la; u yaa geei inyamɔn kan, u joo binib kooh la.

²⁶ Unii u san Uwumbɔr ki pak u na ban ŋŋmarm ni lifuur le tii u ni waadichal.

²⁷ Aa ban ke aa nya nkun ni ii? Li pak Uwumbɔr ki san u ijawaan aan ki kan limɔfal.

²⁸ Ubɔr aapak ni waapɔɔn nyan ni waanib aah wiir pu na chee la; ubɔr yaa kaa kpa binib kan, waa ye nibaa.

²⁹ Aa yaa bi suuna kan, aa kpa nlan, tɔ, saaŋuul yaa fiir mala mala kan, aa mɔk binib saah ye ugbaan pu na la.

³⁰ Nsuudoon le tii tiwon laafee, le lipiipoln bi ke mbuunkpok na.

³¹ Aa yaa muk bigiim kan, aa seei Uwumbɔr u naan bi na la; aa yaa ŋa ugiin tiŋann kan, aa nyuŋni Uwumbɔr la.

³² Bibiindam le joo baatunwanbir kulni baamɔfal, le bininyaam ma kpa limakl nkun ni.

³³ Nlan bi unii u kpa nlan na aalandak mɔmɔk ni; bijɔrb ma aa nyi nlan aawan nibaa.

³⁴ Mbimbinyaan tii litimbol mpɔɔn ni kipak la; le titunwanbir ma ye litimbol mɔmɔk aanimɔɔn.

³⁵ Bibɔrb aasui piin baatutum bi nyi baatuln na pu la, le ki dar baatutum bi jinni bi inimɔɔn na aatafal.