Mpiin 48 - Uwumbɔr aagbaŋ

Jakob aah ŋa tinyoor ŋa Efraim ni Manase pu pu na aabɔr

¹ N‑yoonn mubaa bi nan tuk Josef ke ute buŋ. Nima pu le u nan yoor ujapɔtiib bilee, Manase ni Efraim, le bi buen bi ti mann ute Jakob.

² N‑yoonn mu Jakob ŋun ke ujapɔɔn Josef dan u nan mann u na, le u pɔɔn ubaa ki fii kal waawandookaan pu.

³ Le Jakob bui Josef ke, “Uwumbɔr Mpɔɔnsakpiindaan nan dan m chee Lus aatiŋ ki bi Kanaann aatiŋ ni na, le ki nan ŋa tinyoor ŋa m pu.

⁴ U nan bui mi ke, ‘M ga tii si mbim pam, nima kan, saamaal ga ŋa ŋitimbol ŋi wiir na. M ga di kitiŋ kee tii saamaal ki li ye biyaan ki cha n‑yoonn mu kaa kpa ndoon na.’”

⁵ Jakob nan ki bui u ke, “Josef, saabim mulee mu aa ma Ijipt aatiŋ ni do aan m nin fuu ni na, min le yeh bi. Efraim ni Manase mu ye maabim le ke Rubenn ni Simeonn aah ye pu na.

⁶ Aa yaa ki ma mbim kpee bi pu kan, maan ŋmaa yin bi maabim, le lifaal li bi ga kan na ga nyan ni Efraim ni Manase chee la.

⁷ Aana Rachel pu le m bi ŋani kina. U nan kpo Kanaann aatiŋ ni, naa daa Efraf chee, n‑yoonn mu m nan nyan Mesopotamia aatiŋ ni na. Le ni bii nsui pam. M di u sub Efraf aatiŋ aasan chee la.” Dandana wee bi yin Efraf aatiŋ ngbaan ke Betlehem la.

⁸ N‑yoonn mu Jakob kan Josef aabijabim ngbaan na, le u baa ke, “Ŋma ye mbim ngbaan?”

⁹ Le Josef bui u ke, “Maabim ye, Uwumbɔr aah tii mi mbim bi Ijipt aatiŋ kee ponn ni na le na.” Le Jakob bui u ke, “Li joo ni bi, aan m mee tinyoor ŋa bi pu.”

¹⁰ Jakob aah nan por sakpen pu na, waa nan ki waa mbamɔm. Le Josef di waabim ngbaan buen u chee, le u bub chuu bi, ki moor bitakpin.

¹¹ Le Jakob bui Josef ke, “M nan dak ke maan ki kan si, le Uwumbɔr cha m kan aa ni saabim mu.”

¹² Le Josef yaar waabim ngbaan ute aataŋaayil chee, le ki gbaan ute aanimbiin ni.

¹³ Le Josef di Efraim siin Jakob aaŋangan wɔb, le ki di Manase mu siin uŋangii wɔb.

¹⁴ Le Jakob aah ban u mee tinyoor ŋa bi pu na, le u di uŋaal punn ki di paan bi pu, le ki di uŋangii paan Efraim, uwaatiir pu, ki di uŋangan paan Manase, upol pu,

¹⁵ le ki mee tinyoor ŋa Josef pu ke: “Uwumbɔr u ye ntetiib Abraham ni Aisak Aawumbɔr na, ŋa tinyoor ŋa mbim bee pu. Cha Uwumbɔr u lik mi ki nan saa din wee na, ŋa tinyoor ŋa bi pu.

¹⁶ Cha Uwumbɔr aatuun u gaa mi tibɔbir mɔmɔk ni lii na ŋa tinyoor ŋa bi pu. Cha maayimbil, ni ntetiib Abraham ni Aisak aayimbil li kpa yimbipur bi pu. Cha bi kan mbim ni yaabitiib pam.”

¹⁷ Le Josef aah kan ke ute di uŋangii paan Efraim pu na, naa mɔɔr u. Nima le u chuu ute aaŋangii u paar ki di paan Manase pu,

¹⁸ le ki bui ute ke, “Nte, naa ye kina, umina le ye ubopol. Di aaŋangii paan u pu.”

¹⁹ Le ute yii, ki bui u ke, “Maabo, m nyi kina. Manase aamaal mu ga ŋa litimbosakpeln. Le unaal Efraim ga li ye u pu unikpaan, le waamaal mu ga ŋa ŋitimbosakpeln.”

²⁰ Nima chee le u ŋa tinyoor ŋa bi pu liyaadaal ngbaan, ki bui ke, “N‑yoonn mumɔk Israel yaab ti ban bi ŋa tinyoor ŋa unii pu na kan, bi ga pur nimi aayimbil, le ki bui ke, ‘Uwumbɔr ŋa aa pu tinyoor ke waah ŋa Efraim, ni Manase pu pu na.’” Jakob aah nan ŋa pu na, ni mɔk ke u nan di Efraim le ŋa upol Manase pu.

²¹ Le Jakob bui Josef ke, “Aa kan aa? Naan ki yunn m ga kpo; Uwumbɔr mu le ga li bi ni chee ki giin nimi buen niyaajatiib aatiŋ ni.

²² Maah nan di maajawan nyaŋ Amor yaab ki gaa kitinyaan ki bi yin ki ke Sekem na, m di kitiŋ ngbaan ki di tii sin la, naa ye aakpetiib.”