Mpiin 46 - Uwumbɔr aagbaŋ

Jakob ni waamaal aah buen Ijipt aatiŋ ponn ni pu na aabɔr

¹ Jakob nan yoor waamaal, ni waawangol mɔmɔk, le ki buen Beerseba aatiŋ ni, le ki ti toor kitork tii Uwumbɔr u ute Aisak mu nan dii na.

² Le Uwumbɔr nan len u chee kinyeek, tidaŋ ni, ki yin u ke, “Jakob, Jakob.” Le u kii ke, “M sɔ.”

³ Le Uwumbɔr bui u ke, “Min le ye Uwumbɔr, u ye aate Aawumbɔr na. Taa san ijawaan ke saan buen Ijipt aatiŋ ni. M ga ŋa saamaal litimbol sakpeln kitiŋ ngbaan ni.

⁴ M ga dii si buen Ijipt aatiŋ ni, le ki nan ki giin ni saamaal Kanaann aatiŋ kee ni. Josef ga li bi aa chee le aa nin kpo.”

⁵ Le Jakob fii Beerseba aatiŋ ni. Le ujapɔtiib di u ni baabim, ni bipuutiib di ŋa itaan aatɔroku tiib bi Ijipt aabɔr nan di tii ni bi na ni.

⁶ Le bi yoor baawakor, ni baawangol li bi nan kan Kanaann aatiŋ ni na mɔmɔk, ki buen Ijipt aatiŋ ni. Jakob nan yoor waamaal mɔmɔk,

⁷ u nan yoor ujapɔtiib, ni ubisatiib, ni uyaabitiib.

⁸ Jakob aamaal aanib bi nan dii u buen Ijipt aatiŋ ponn ni na le nan ye ujapɔpol Rubenn,

⁹ ni Rubenn aajapɔtiib. Bi nan yin bi ke Hanok, ni Palu, ni Hesronn, ni Kami.

¹⁰ Ujapɔɔn Simeonn aajapɔtiib aayimbil sɔ: Jemuel, ni Jaminn, ni Ohad, ni Jakinn, ni Sohar, ni Saul u nan ye Kanaann aapiibo na aabo.

¹¹ Ujapɔɔn Liifai aajapɔtiib aayimbil sɔ: Gesonn, ni Kohaf, ni Merari.

¹² Ujapɔɔn Juda aajapɔtiib aayimbil sɔ: Sela, ni Peres, ni Sera. Juda aajapɔtiib Er ni Onann nan kpo Kanaann aatiŋ ni a. Peres aajapɔtiib le nan ye Hesronn ni Hamul.

¹³ Ujapɔɔn Isakar mu aajapɔtiib le nan ye Tola, ni Pua, ni Jasub, ni Simronn.

¹⁴ Ujapɔɔn Sebulunn mu aajapɔtiib le nan ye Sered, ni Elonn, ni Jaleel.

¹⁵ Jakob aajapɔtiib bi Lea nan ma u chee Mesopotamia aatiŋ ni na le na, ki kpee ubisal Daina. Waabim ni uyaabitiib bi nyan ni u ni Lea aakaasisik ni na kpaan piitaa ni bitaa la.

¹⁶ Ujapɔɔn Gad mu aajapɔtiib le nan ye Sefonn, ni Hagi, ni Suni, ni Esbonn, ni Eri, ni Arod, ni Areli.

¹⁷ Ujapɔɔn Aser mu aajapɔtiib le nan ye Imna, ni Isfa, ni Isfi, ni Beria, ni bininkpan Sera. Beria mu aajapɔtiib le nan ye Heber ni Malkiel.

¹⁸ Jakob aabim ni uyaabitiib kipiik ni biloob bi u nan ma unaagbiipii Silpa chee na le bi na. Labann aah nan di unaagbiipii u tii ubisal Lea na le ma Jakob chee kina.

¹⁹ Jakob aapuu Rachel nan ma mbijabim bilee la, Josef ni Benjaminn.

²⁰ Le Josef aah bi Ijipt aatiŋ ni na, u nan ma mbijabim bilee, Manase ni Efraim. U ni upuu Asenaf, u aate nan ye Potifera u nan ye utotoor, aan ki nyan ni Heliopolis aatiŋ ni na le nan ma bi.

²¹ Benjaminn mu aajapɔtiib le nan ye Bela, ni Beker, ni Asbel, ni Gera, ni Naamann, ni Ehi, ni Ros, ni Mupim, ni Hupim, ni Ard.

²² Jakob aabim ni uyaabitiib kipiik ni binaa bee le u nan ma Rachel chee.

²³ Ujapɔɔn Dann mu aajapɔɔn le nan ye Husim.

²⁴ Ujapɔɔn Naftali aajapɔtiib mu nan ye Jaseel, ni Guni, ni Jeser, ni Silem.

²⁵ Jakob aabim ni uyaabitiib bilole bee le u nan ma unaagbiipii Bilha chee. Labann aah nan di unaagbiipii u tii ubisal Rachel na le ma Jakob chee kina.

²⁶ Le Jakob aamaal bimɔk nan dii u buen Ijipt na nan ye imonko itaa ni biloob, le ujapɔtiib aapuutiib mu bi ki kpee.

²⁷ Josef aah nan ma mbim bilee bi Ijipt aatiŋ ni na yaa kpee kan, Jakob aamaal kpaan imonko itaa ni kipiik le nima chee.

Jakob ni waamaal aah fuu Ijipt aatiŋ ni pu na aabɔr

²⁸ Jakob nan tun ujapɔɔn Juda u ti bui Josef ke u keln ni u Gosenn aatiŋ ni. N‑yoonn mu bi fuu na,

²⁹ le Josef koo itaan aatɔroku ponn ni, le ki buen ute chee nima chee. Waah ti fuu u chee na, le Josef san ti bub chuu ute, le ki wii ki kaani, ni ti yunn pam.

³⁰ Le Jakob bui Josef ke, “Dandana, maah kan si aa beenin bi limɔfal ponn ni na, m gor ke m kpo.”

³¹ Le Josef bui ukpetiib ni ute aamaal ke, “Naah fuu ni m kan nimi na, see m buen ti bui ubɔrkpaan ke nkpetiib ni nte aamaal, bi nan bi Kanaann aatiŋ ni na fuu ni a.

³² M ga bui u ke ni ye bipihdam la, le ki joo ni nimi aawakor, ni nimi aawangol mɔmɔk.

³³ Ni li nyi ubɔr ngbaan yaa yin nimi n‑yoonn mu ki nan baa nimi naah tun lituln li na kan,

³⁴ ni tuk u ke ni ye binib bi lik tiwakor na la, ke niyaajatiib aatuln le ni tun. Nima kan, u ga di Gosenn aapepel tii nimi.” Tiwan ni cha Josef len kina na le ye ke Ijipt yaab aan kpaan binib bi lik tiwakor na chee.