Mpiin 41 - Uwumbɔr aagbaŋ

Josef aah nabr Ijipt aabɔr aadaŋ pu na aabɔr

¹ Ŋibin ŋilee aapuwɔb na, Ijipt aabɔr nan daŋ tidaŋ ke u si Nail aamɔɔl aagbaan,

² le inaa i filk ki ŋan na ilole nyan ni limɔɔl ngbaan ni, ki bi ŋmɔ timoor.

³ Libuul ngbaan ni, le inaa ilole i kaa filk ki bi kpɔkpɔr na mu nyan ni, ki dan nan sil i filk na chee,

⁴ le i kaa filk na di i filk na di nab. Le ubɔr finn ngeen pu.

⁵ Le ngeen nan ki lii u, le u ki daŋ tidaŋ tiken. U nan kan likalmaan libaa si ki ŋmeen ŋikalmaankpab ŋilole, ŋi nan gbei ki mu biir mbamɔm.

⁶ Le u ki kan likalmaan liken mu si ki mu ŋmeen ŋikalmaankpab ŋilole, ŋaa gbei, ki mu bi ke ntaaweel aakalmaan na,

⁷ le ŋi kaa gbei na di ŋi gbei na nab. Le ubɔr ngbaan fii ngeen pu, ki bee ke u ba dɔ daŋni la.

⁸ Le ni woln kichakpiik ni, le tidaŋ ngbaan aabɔr bii usui, naa mɔ u, nima pu le u nan cha bi yin ni bilandam, ni binib bi ŋani lijinjiir aawan na mɔmɔk, le ki bui bi waadaŋ ngbaan aabɔr. Bi ponn ni ubaa mu aa ŋman nabr ti tuk u.

⁹ Nima chee le ubɔr aanaagbiija u tii u ndaan na bui u ke, “M ga kpiir tuk si din ke m ŋa bakaa.

¹⁰ Saah nan gee liŋuul biboroboroŋam aaninkpel, ni m pu, ki di timi ŋa kiyondiik ni, saajab aaninkpel do na,

¹¹ le timɔk bilee nan daŋ tidaŋ kinyeek kibaa; ti mu aatataa aa nan kpaa.

¹² Hiibru yaab aanachipɔɔn ubaa mu nan bi ti chee kiyondiik ngbaan ni. U nan ye saajab aaninkpel aanaagbiija la. Ti nan bui u timi aadaŋ ngbaan mɔmɔk, le u nan nabr taatataa tii timi.

¹³ Le waah nabr pu na nan gbiin kina. Le aa di cha pinn mi, ki giin ni mi maatuln ni, le ki ku biboroboroŋam aaninkpel ma.”

¹⁴ Le ubɔr yin ni Josef, le bi nyan ni u kiyondiik ni mala. Le bi kuu u tiyikpir, ki kpeln waawanpeenkaan mu, le u nin dan ubɔr chee.

¹⁵ Le ubɔr bui u ke, “M daŋ tidaŋ la, le ubaa aa bi ki ga ŋmaa tuk mi tidaŋ ngbaan aatataa. Bi tuk mi ke aa ga ŋmaa nabr ti tii mi.”

¹⁶ Le Josef bui u ke, “Ubɔrkpaan, maan ŋman. Uwumbɔr le ga cha m nabr ti mbamɔm.”

¹⁷ Le ubɔr bui u ke, “M daŋ ke m si Nail aamɔɔl aagbaan,

¹⁸ n‑yoonn ngbaan le m kan inaa i filk ki ŋan na ilole ibaa nyan ni limɔɔl ni, ki bi ŋmɔ timoor.

¹⁹ Libuul ngbaan ni, le inaa i kaa filk na ilole mu nyan ni. I nan bi kpɔkpɔr sakpen, le maa kee kan inaa ngbaan aaboln Ijipt aatiŋ kee ponn ni.

²⁰ Le inaa i kaa filk na di i filk sakpen na di nab;

²¹ le ubaa aan bee ke i nab tiwan nibaa; ba pu? i beenin bi yaah ba bi pu na la.

²² Le m fii ki ki doon. Le m ki daŋ ke m kan likalmaan libaa si ki ŋmeen ŋikalmaankpab ŋilole ŋi gbei ki mu biir mbamɔm na.

²³ Le likalmaan liken mu si ki ŋmeen ŋikalmaankpab ŋilole ŋi kaa gbei, ki bi ke ntaaweel aakalmaan na,

²⁴ le ŋi kaa gbei na di ŋi gbei na di nab. M tuk binib bi ŋmaa ŋani lijinjiir aawan na mɔmɔk tidaŋ tilee ngbaan, le bi ponn ni ubaa aa ŋmaa nabr taatataa ki tuk mi.”

²⁵ Le Josef bui ubɔr ngbaan ke, “Tidaŋ tilee ngbaan aatataa ye tiwanbaan la. Uwumbɔr le bui si waah ban u ŋa tiwan ni na.

²⁶ Inaa ilole i filk na ye ŋibin ŋilole la, le ŋikalmaan sakpiin ŋilole na mu ye ŋibin ŋilole, le nimɔk ye tiwanbaan.

²⁷ Inaa kpɔkpɔr ilole, ni ŋikalmaan ŋilole ŋi kaa gbei na mu ye ŋibin ŋilole ŋi nkon ga lir na la.

²⁸ Maah tuk si pu na, ni ye mbamɔn le ke Uwumbɔr le bui si waah ban u ŋa pu na.

²⁹ Ŋibin ŋilole ŋi choo na, tijikaar ga li bi Ijipt aatiŋ kee ponn ni sakpen.

³⁰ Ŋee aapuwɔb na, nkon sakpiin ga lir ŋibin ŋilole ŋi mu paa na ni, le ni ga suln ŋibinyaan ŋi jer na aabɔr, ba pu? nkon ngbaan ga li pɔɔ ki bii kitiŋ kee pam.

³¹ Nkon mu ga nan lir na ga li bir pam, le ni ga cha ni suln ŋibin ŋilole ŋi tijikaar nan bi sakpen na aabɔr.

³² Le saah daŋ njan aadaŋ ki ki gir daŋ lelee aan tidaŋ ngbaan aatataa ye tiwanbaan na, Uwumbɔr le sil siin ti kina, ki mu ga cha ni ŋa kina dandana wee.

³³ “Nima pu na, ni ŋan ke aa nyan ulandaan u nyi mbamɔn na, u li lik saatiŋ ngbaan ki ter si.

³⁴ Ni ki ŋan ke aa nyan binib bi ga chuun ki kuun tijikaar ngem ki di bil ŋibin ŋilole ŋi ponn ni tijikaar ga li wiir na.

³⁵ Bi chuun ki kuun tijikaar bil buyoonn ti ga li bi sakpen na, ki li kii ti ntim ntim ni.

³⁶ Ŋibin ŋilole ŋi choo aan nkon ga nan lir na, tijikaar ngbaan le ga nan gaa saatiŋ kimina aanib lii. Nima kan, nkon aan ku bi.”

Josef aah kan tininkpir Ijipt aatiŋ ni pu na aabɔr

³⁷ Josef aabɔr ngbaan nan gbiin ubɔrkpaan Faro ni waaninkpiib aanimbil,

³⁸ le u bui bi ke, “Ti ga ki kan ŋma u li kpa nlan ke Josef u Uwumbɔr di Waafuur Nyaan tii u na?”

³⁹ Le ubɔr bui Josef ke, “Uwumbɔr le mɔk si tiwan mɔmɔk, nima pu na, sin le ga li kpa nlan ni nnyim ki jer unii mɔmɔk.

⁴⁰ M ga di sin le ŋa maatiŋ kee aaninkpel, le maanib mɔmɔk ga kii saah len pu na mɔmɔk. Sin le ga li paa m pu kitiŋ kee ni.

⁴¹ Dandana wee m nyan si ke aa li ye uninkpel Ijipt aatiŋ kee ponn ni.”

⁴² Le ubɔr chuu ŋmaar tibɔr aabɔmbik, ki di ŋmaan Josef aaŋanbik, le ki di libɔrbɔkul di peen u, ki di salmaa aakuleen di peen uneen ni.

⁴³ Ubɔr nan di waataan aatɔroku leler ki di tii Josef ke u koo u ni, le ki cha waajab loln u pu nsan ki di mann Ijipt aatiŋ mɔmɔk, le ki kaani ke, “Gbaan man. Gbaan unimbiin ni man.” Kina le bi nan di Josef ŋa Ijipt aatiŋ mɔmɔk aaninkpekpaan.

⁴⁴ Ubɔr ngbaan nan ki bui u ke, “Min Faro le ye ubɔr, ubaa mu aa ki bi see sin le paa m pu tininkpir ni.”

^45-46 U nan tii Josef Ijipt yaab aayimbil, ki yin u ke Safenaf Panea, le ki di Potifera u nan ye utotoor ki bi Heliopolis aatiŋ ni na aabisal, u bi yin u ke Asenaf na, di tii Josef, u di ŋa upuu. Josef nan ye ŋibin piitaa le ki piin ubɔr do lituln. U nan nya ubɔrkpaan do lichiln ni, le ki chaa Ijipt aatiŋ aapepel mɔmɔk.

⁴⁷ Le ŋibin ŋilole ŋi aayoonn tijikaar nan ŋa kitiŋ ngbaan ni sakpen na,

⁴⁸ Josef nan kuun tijikaar pam ki siin ntim mɔmɔk ponn ni. Baah nan kon tijikaar ntim mumɔk ponn ni na, le u nan kuun ti bil nima chee.

⁴⁹ Tijikaar nan ŋa sakpen ki ti nyaŋ, le Josef aa nan ki ŋaŋni waah kuuni pu na, ti nan wiir ke limɔɔtanbol aah wiir pu na la.

⁵⁰ Waahr aan nkon aabin ngbaan nin fuu ni na, Josef aapuu Asenaf nan ma mbijabim mulee le tii u.

⁵¹ U nan bui ke, “Uwumbɔr cha m suln maafalaa, ni nte do yaab aabɔr a.” Nima pu na, u nan yin njan aabo ke Manase.

⁵² U nan ki bui ke, “Uwumbɔr le tii mi mbim limukl aatiŋ ni,” nima pu le u nan ki yin lelee aabo ke Efraim.

⁵³ Le ŋibin ŋilole ŋi ponn ni tijikaar nan gbii sakpen na nan jer,

⁵⁴ le nkon aabin ŋilole na piin, le ni gbiin Josef aah nan len pu na. Nkon nan lir ntim muken ni, tijikaar mu nan bi Ijipt aatim mɔmɔk ni.

⁵⁵ Buyoonn nkon nan lir Ijipt aatiŋ ni na, le kitiŋ ngbaan aanib mɔmɔk nan wii ŋani ubɔr ke bi ban tijikaar la. Le u bui bi ke bi li cha Josef chee ki ti ŋa waah len pu na.

⁵⁶ Nkon ngbaan nan moo pɔɔk, ki yaa gaa kitiŋ ngbaan mɔmɔk ni, nima pu le Josef nan piir tijikaar aadir ngbaan, le ki kooh tijikaar tii Ijipt yaab mɔmɔk.

⁵⁷ Binib nan nyan ni ntim mɔmɔk ni, ki dan Ijipt ni, bi nan daa tijikaar Josef chee; ba pu? nkon ngbaan nan pɔɔ, ni kookoo, ki ti nyaŋ.