Maika 1 - Uwumbɔr aagbaŋ

¹ N‑yoonn mu bibɔrb bitaa bimina nan jin nnaan Juda aatiŋ pu ki paan paan tɔb pu na, le Uwumbɔr nan di tibɔr timina tuk waabɔnabr Maika, u ye Moresef aatiŋ ni aanii na. Bibɔrb ngbaan sɔ: Jotam le nan puen jin nnaan, le Ahas paan u pu, le Hesekia nan gbeln puwɔb. Uwumbɔr nan kpiir Samaria ni Jerusalem aatim aabɔr tee mɔmɔk le tuk Maika.

Samaria ni Jerusalem aatim aakpolahn

² Ŋitimbol mɔmɔk, ŋun tibɔr tee man, binib bimɔk bi kitiŋ kee pu na, li pel man tibɔr tee. Uwumbɔr Mpɔɔndaan ga len ibamɔn, le ki galn nimi. Li pel man. U bi waapaacham aadichal ni le ki len ni.

³ Uwumbɔr ga nya ni waabuul li bi chain na ni le ki dan; u ga sunn ni ki nan chuun ŋijoo paab.

⁴ Le ŋijoo ngbaan ga donn u taab ke tisikakpiin aah donni mmii ni pu na; ŋi ga puu ti lir tifatann ponn ni ke nnyun aah puu sunni ligongoln pu pu na.

⁵ Israel aanib aah tun titunwanbir ki yii Uwumbɔr aamɔb na le ga cha nimina mɔmɔk ŋa kina. Ŋma aan bi ga galn Israel yaab aah yii Uwumbɔr aamɔb pu na pu? Ni ye Israel aatiyil Samaria la. Ŋma bi Juda aatiŋ ni ki dii ŋiwaa? Ni ye Jerusalem aatiŋ la.

⁶ Kina pu le Uwumbɔr len ke, “M ga cha Samaria kpaln litakpakpokl le kipɔɔk ni, nin chee bi ga ko ndaan aasubil aasui aasar na. M ga ber kaagon lii, ki faa kaabir ti mee kifataŋ ni.

⁷ Kaawaa ŋi bi gee sakpen na ga wii yɔk yɔk, le baawaadir ni aapiidagoob aawangol wu mmii ni, le kaawaa mɔmɔk ga kpaln litapuln li bi fii cha li na. Samaria yaab nan ban nimina mɔmɔk ke bi pɔr la, le baadim ga yoor ŋi mɔmɔk buen nibaa wɔb ki ti li pa bipiidagoob biken.”

⁸ Le Maika bui ke, “Nimina pu le m ga wii, ki gaa ikpolahn. M ga chuun ŋŋmeen kaan taŋ ŋinaatak, ki mɔk maapombiin aah bi pu na. M ga gbei ke ikakal na, ki wii ke taataa na.

⁹ Samaria yaab aabuun aan yann, le Juda yaab mu ga kan kina aaween dandana; libiil fuu ni Jerusalem aatiŋ ni nin chee maanib koo na aabisamɔi ibaa ni.”

Bidim aah duun ni Jerusalem aatiŋ pu na

¹⁰ Taa bui man timi aadim bi bi Gaf aatiŋ ni na baah nyaŋ timi pu na; taa cha bi kan naah wii pu na man. Bef Leafra aanib, biln titan ni man ki mɔk nimi aapombiin.

¹¹ Safir aatiŋ aanib, di inimɔɔn ki chuun niŋmeen man, nimi aadim aah di nimi buen kitiyayaŋ ni man. Binib bi koo Saanann aatiŋ ni na aa kaa ke bi nya ni baatiŋ ponn ni. Ni yaa nan ŋun Bef Esel aatiŋ aanib bi wii kan, ni bee ke lifuur aa bi nima.

¹² Marof aatiŋ aanib ka jek ki kii lifuur; ba pu? Uwumbɔr di tibɔbir ŋɔŋ ni Jerusalem aatiŋ pu a.

¹³ Lakis aatiŋ aanib, di itaan aatɔroku tiib tul itaan pu man. Ni mu tun Israel yaab aatunwanbir, le ki cha Jerusalem yaab tun titunwanbir.

¹⁴ Tɔ, Juda aanib, chɔi Moresef Gaf aatiŋ aanib man. Israel aabɔrb aan kan nterm Aksib aatiŋ ni.

¹⁵ Uwumbɔr ga di Maresa aatiŋ aanib tii udin u ga gaa baatiŋ na. Israel aayidam bi kpa kipak na ga buen ti bɔr Adulam aatakpaluŋ ni.

¹⁶ Juda aanib, kuu nimi aayikpir man ki li wii naah gee nimi aabim bi na pu. Kuu ŋiyikun ke nangba tiib na man, ba pu? bi ga di nimi aabim buen kitiyayaŋ ni ki cha nimi.