Liifai Yaab 25 - Uwumbɔr aagbaŋ

Libilolole aabɔr

¹ Uwumbɔr nan len Moses chee tibɔr, Sainai Aajool paab, ki bui

² ke u di ikaal imina mɔk Israel yaab. N‑yoonn mu ni ti koo kitiŋ ki Uwumbɔr ban u di tii nimi na ni kan, ni nyuŋ uma Uwumbɔr ki taa ko kitiŋ ngbaan libilolole mɔk ni.

³ Ni li ko nimi aasar ki bu tijikaar, ki toor nimi aasubil aasar, ki chee nimi aajikaar ki ti saa ŋibin ŋiloob.

⁴ Libilolole ni kan, ni cha kitiŋ ngbaan doon fuur, ni di libiln ngbaan tii Uwumbɔr. Ni taa ko ki bu njikaabim, ki taa toor nimi aasubil aasui mu.

⁵ Njikaaleen ŋi ŋa nimi aasar ni aan naa bun ti na, ni taa buen ti chee ti man, ki taa ker ŋisubil nimi aasui i naa toor i na pu; libiln ngbaan ye lifuur aabiln le tii kitiŋ ngbaan.

⁶ Mbamɔn, naan ko kitiŋ ngbaan libilolole ni, ki mu ga ŋa tijikaar, aan nimi, ni nimi aanaagbiib, ni nimi aatutum, ni biwɔwɔm bi koo ni chee na,

⁷ ni nimi aawakor, ni ipeel i bi timoor ni ki bi nimi aatiŋ ngbaan ni na kan ki ji. Tijikaar ti kitiŋ ngbaan ga ŋa na, ni ga ŋmaa ji ti.

Giintii aabiln

⁸ Ni kahn ŋibin ŋilole ki ti saa nfum mulole, ni ga kpaan saa ŋibin imonko ilee ni ŋiwae la.

⁹ Libiln ngbaan ni, ŋmalole aawiin kipiik daal le ye titunwanbir aachapinn aatork aawiin, tun uja ubaa u chuun ki pii kakaan kitiŋ ngbaan mɔmɔk ni.

¹⁰ Ni di libipiiŋmu aabiln siin gaa‑mbaa‑lii, ki tii kitiŋ ngbaan ni aanib mɔmɔk. Libiln ngbaan ni, unii yaa nan daa uken aakpaakon n‑yoonn mu jer na kan, u giin mu tii uwandaan, bee waamaal; bi yaa nan di unii ubaa kooh aan u ye unaagbiija kan, di u lii, u gir kun udo yaab chee.

¹¹ Ni taa bu nibaa nimi aasar ni, bee ni chee tijikaar ti punn tibaa pu na, bee ni ker ŋisubil nimi aasui i naa toor i na pu.

¹² Ni ŋa maah len pu na, ki ji kitiŋ ngbaan aah ŋa tijikaar ti na. Libiln ngbaan ga li ye chain ki tii nimi.

¹³ Libiln ngbaan ni kan, binib bimɔk nan daa ikpaakon, bee ŋidichal, n‑yoonn mu jer na, bi giin ni tii biwandam.

¹⁴ Nima pu na, aa yaa kooh, bee aa ti ki daa kitiŋ aaŋeen aatɔ Israel aanii chee kan, ni taa ji tɔb.

¹⁵ Ni siin tipar aan ni ŋeer unii u daa kitiŋ ngbaan na aah ga ŋmaa kan tijikaar ki ti saa libiln li u ga giin ki tii uwandaan na.

¹⁶ Ŋibin ngbaan yaa wiir kan, tipar mu li wiir. Ŋibin mu yaa kaa wiir kan, tipar mu taa li wiir, ba pu? kitiŋ ngbaan aah ga ŋmaa ŋa tijikaar pu na le aa ga di pa ki pu.

¹⁷ Ni li san Nidindaan Uwumbɔr ijawaan ki taa ji niŋeen aatɔ Israel aanii pem pem.

Libilolole aabɔr

¹⁸ Ni kii tii Uwumbɔr aakaal, ni waah bui ke ni ŋa pu na mɔmɔk, nima kan, ni ga ŋmaa li bi kitiŋ ngbaan ni, ki kan lifuur.

¹⁹ Kitiŋ ngbaan ga ŋa kaajikaar, le ni ga li kpa naah ban pu na mɔmɔk, ni ji, aan ki li kpa nsuudoon.

²⁰ Nibaakan, ubaa ga baa ke, “Libilolole ni, ti yaa kaa kon ki mu aa chee kan, ti ga ji ba?”

²¹ Tɔ, Uwumbɔr ga ŋa kitiŋ ngbaan tinyoor ki cha ki ŋa tijikaar libiloloob ponn ni, aan ni ji ti ŋibin ŋilee.

²² Le ni yaa kon ki bun nimi aasar ni njikaabim libininiin ni kan, ni ga li beenin kpa libiloloob aabiln aajikaar ki ji, ki ti saa tijikaar ti ni kon libiln ngbaan ni na aan ki nin chee ti.

Giintii aabɔr

²³ Ni taa di nimi aatiŋ kooh tii ubaa u li joo ki kookoo, ba pu? nimi le aa yeh kitiŋ ngbaan, Uwumbɔr le yeh ki. Ni naahn biwɔwɔm la, le u di ki tii nimi, ni li ko ki ji.

²⁴ Ni yaa kooh kitiŋ nibaa chee kan, ni li nyi ke utindaan ga nan ki gir daa ki, unii u nan daa na chee.

²⁵ Igiin yaa chuu Israel aanii ubaa aan u di waatiŋ kooh kan, waamaal ni aanii ubaa ki gir daa ki tii u.

²⁶ Utindaan yaa kaa kpa kina aanii kan, nibaakan, u mu ga nan kan ŋimombil, ki mu nan ki gir daa waatiŋ ngbaan, unii u nan daa ki na chee.

²⁷ U yaa ga ki gir daa ki kan, u pɔɔn ubaa ki pa ŋimombil ŋi ga fuu libiln li unii u puen daa kitiŋ na ba ga nan giin kitiŋ ngbaan tii u na aayoonn, aan ki li nyi ke u ba ga nan ki gir gaa ki Giintii aabiln ni.

²⁸ U yaa kaa kpa ŋimombil ŋi ŋeer u pa gaa ki na kan, unii u nan daa ki na li beenin joo ki, aan ni ti saa libiln li u ga nan giin ki tii uwandaan na. Libiln ngbaan ni kan, u giin ki tii uwandaan.

²⁹ Uja yaa di waadichal li bi kitiŋ ki bi maa ligoln gob ki na ni kooh kan, u kpa nsan ke libiln yaa nan saa buyoonn u nan kooh li na kan, u ki gir daa li.

³⁰ U yaa kaa ŋmaa daa li n‑yoonn ngbaan kan, waa ki kpa nsan u ki daa li, le lidichal ngbaan gur ye unii u daa li na yaal la, li ga ŋa u ni waamaal yaan la. Waan ki giin li tii u libiln li bi giini biwandam aawan tii bi na.

³¹ Tɔ, ŋidichal ŋi kaa bi ŋigon aatim ni, ki bi itingbaan ni na, ŋi bi le ke tikpaasar na, uwandaan kpa nsan ke u ki gir daa lidichal ngbaan n‑yoonn mu u gee na. Giintii aabiln yoonn ma kan, see bi giin ŋi tii biwandam.

³² Liifai yaab ma kpa nsan ke bi ki gir daa baawan mɔmɔk ntim mu bi di tii bi na ni, n‑yoonn mu bi gee na.

³³ Ŋidichal ŋi bi ntim ni Liifai yaab yeh ŋi aan ki di kooh na, bi yaa kaa ki ŋmaa gir daa ŋi kan, Giintii aabiln yoonn yaa fuu ni kan, ni giin ŋi tii bi, ba pu? Liifai yaab aadichal ŋi bi ntim ni na ye biyaan le n‑yoonn mɔmɔk, Israel yaab ni.

³⁴ Tɔ, kimoŋmɔpɔɔk kimɔk mann goln Liifai yaab aatim na, bi taa di mu kooh, ni ye baafaal le ki cha n‑yoonn mu kaa kpa ndoon na.

Baah ga pinn ŋimombil tii bigiim pu na aabɔr

³⁵ Nimi Israel aanii ubaa yaa ŋa ugiin kaa ki ŋmaa lik ubaa kan, waah bi gbɔk udo yoo u na pɔɔn ubaa ki li lik u ni waadichal, ke waah lik upaaja pu na, nima kan, u ga li beenin koo ni chee.

³⁶ Ni li san Uwumbɔr ijawaan ki taa cha u pa tiwan ki jer saah pinn pu tii u na, aan nima kan, u ga ŋmaa li koo ni chee.

³⁷ Aa yaa pinn ŋimombil tii u kan, taa cha u pa jer saah pinn u pu na, ki mu taa cha u pa jer saah kooh tijikaar ngbaan tii u pu na.

³⁸ Nidindaan Uwumbɔr aakaal le na, uma le nyan ni nimi Ijipt aatiŋ ni, ke u di Kanaann aatiŋ tii nimi, aan ki li ye nimi Aawumbɔr.

Baah ga di binaagbiib lii pu na aabɔr

³⁹ Nimi Israel aanii ubaa yaa ŋa ugiin kaa ki ŋman u lik ubaa, ki di ubaa kooh tii uken kan, sin u daa u na taa cha u tun lituln ke unaagbiija na.

⁴⁰ Cha u li koo aa chee ke upaaja bee uchaan na, ki li tun tii si ki ti saa Giintii Aabiln yoonn.

⁴¹ N‑yoonn ngbaan kan, u ni waabim gir kun waamaal chee ki ti gaa uyaajatiib aakpaakon.

⁴² Israel aanib ye Uwumbɔr aanaagbiib la, le u nyan ni bi Ijipt aatiŋ ni; ni taa di bi ŋa binaagbiib.

⁴³ Ni li san Uwumbɔr ijawaan, ki taa li ŋani bi mbiin.

⁴⁴ Ni yaa ban binaagbiib kan, ni ga ŋmaa buen ŋinibol ŋi mann goln nimi aatim na, ki ti daa bi.

⁴⁵ Ni ga ki ŋmaa daa biwɔwɔm bi koo ni chee na aabim, aan bi li ye nimi aawan.

⁴⁶ Le bi ga li tun tii nimi, ni nimi aabim, ki li ye nimi aafaal ki ti saa baamɔfal mɔk. Nido yaab Israel aanib ma kan, ni taa ŋa bi mbiin.

⁴⁷ Biwɔwɔm bi koo ni chee na ubaa yaa ŋa uwankpadaan, le Israel aanii ubaa yaa ŋa ugiin ki di ubaa kooh tii u, bee uwankpadaan ngbaan aadoyoo ubaa, ki ŋa waanaagbiija kan,

⁴⁸ nee aapuwɔb, ni ga ki ŋmaa gir daa u uwɔwɔnja ngbaan chee. Ni cha una aabo,

⁴⁹ bee utewaa, bee uweeja, bee baabim ni ubaa, bee waamaal ni aanii ubaa, gir daa u, bee uma ubaa yaa kan ŋimombil kan, u gir daa ubaa uwɔwɔnja ngbaan chee.

⁵⁰ U pɔɔn ubaa ki kan uwɔwɔnja u nan daa u na, aan bi piin ki kahn libiln li u nan daa u na ki ti saa Giintii Aabiln, ki siin tipar ni ŋeer ututunn aah ga gaa waapar pu na.

^51-52 U ki pa ŋibin ŋi gur na aamombil,

⁵³ aan ni li bi ke waah tun lituln tii u libiln le na. Ni taa cha waaninkpel ŋa u mbiin.

⁵⁴ Hali, u yaa kaa ŋmaa ŋa kina ki gaa ubaa lii kan, Giintii Aabiln li paa na ni, unii u daa u na di u ni waabim lii.

⁵⁵ Naa ŋan ke Israel aanii li ye unaagbiija kina ki cha, ba pu? Israel yaab ye Uwumbɔr aanaagbiib la. Uma le nyan ni bi Ijipt aatiŋ ni, ki ye Bidindaan Uwumbɔr.