Liifai Yaab 22 - Uwumbɔr aagbaŋ

Kitork aakaal aabɔr

¹ Uwumbɔr nan bui Moses

² ke u tuk Aaronn ni ujapɔtiib ke, “Ni li joo ipiin i Israel yaab di tii mi i bi chain na mbamɔm, aan ki taa jinn maayimbil li bi chain na inimɔɔn. Min le ye Uwumbɔr.

³ Saamaal ponn ni aanii ubaa yaa kaa bi chain kan, u taa duun ni ipiin i bi chain aan Israel yaab di tii mi na chee, u yaa kaa bi chain ki ŋa kina kan, waan ki ŋmaa tun lituln kitork aabimbiln taab. Nkaal ngbaan ga li bi kina le cha n‑yoonn mɔmɔk. Min le ye Uwumbɔr.

⁴ “Aaronn aayaabitiib ponn ni ubaa yaa kpa tiwon aaween i bir na, bee tinar yaa nya uwon pu kan, u taa ji ipiin i bi chain na aatork aajikaar, see bi toor u, u ŋa chain. Utotoor umɔk meeh tiwan ni meeh utekpiir kaa bi chain na, bee tijar nya u ni,

⁵ bee u yaa ti ki meeh kiwakork ki kɔ na, bee unii u kaa bi chain na kan, waa ki bi chain.

⁶ Utotoor u kaa bi chain na aan li bi chain ki ti saa kijook wɔb, kaan ŋmaa ji ipiin i bi chain na aatork aajikaar mu, see u fu nnyun.

⁷ Nwiin yaa lir aan u fu nnyun kan, le u ga ŋa chain ki ŋmaa ji ipiin i bi chain na aatork aajikaar ti ye uyaan na.

⁸ U taa ji kiwakork ki kpo kibaa pu, ni upeel aah chuu kiwakork ki ki ŋman gur kaanann na; ni ga cha waan ki li bi chain. Min le ye Uwumbɔr.

⁹ “Bitotoorb mɔmɔk li joo ikaal ngbaan ke maah di i tuk nimi pu na. Bi yaa kaa joo i kan, baabɔr ga bii, le bi ga kpo, ba pu? bi yii maakaal i bi chain na. Min le ye Uwumbɔr le ki ŋa bi chain.

¹⁰ “See unii u ye utotoor aamaal ni aanii na le ga ŋmaa ji ipiin aatork aajikaar ti bi chain na; unii yayan aan ŋmaa ji ti, hali unii yaa ye uchaan le ki koo utotoor chee, bee waatutunn kan, waan ŋmaa ji ti.

¹¹ Unii mu yaa ye utotoor aanaagbiija le u di waamombil daa u, bee bi ma udaan ngbaan waachiln ni kan, u ga ŋmaa ji tijikaar ngbaan.

¹² Utotoor u aabisal mɔn uja u kaa ye utotoor na kan, waan ki ŋmaa ji ipiin aatork ki bi chain na aajikaar ngbaan.

¹³ Tɔ, utotoor aabisal u ye ukpopii, bee u nyan uchal do kaa kpa ubo, ki gir kun ni ute u ye utotoor na do, ki ji waamaal chee na, uma le ga ŋmaa ji ute aah gaal utotoor aajikaar ti na. Utotoor aamaal ŋmeen aanii le ga ŋmaa ji tijikaar ngbaan.

¹⁴ “Unii yayan u kaa ye utotoor aamaal ni aanii, ki yaa peln jin ipiin aatork ngbaan aajikaar kaa nyi kan, see u gir ban kina aajikaar ki ki ban tiken kpee ti pu, ki pa tii utotoor ngbaan.

¹⁵ Bitotoorb taa lik seen kitork aajikaar ngbaan

¹⁶ ki cha unii u kaa ŋeer ke u ji ti na ji ti, kina aabimbin ga bii waabɔr, le udaan ngbaan ga kan ntafadaan. Min le ye Uwumbɔr le ki ŋa ipiin aatork aajikaar ngbaan chain.”

¹⁷ Uwumbɔr nan ki bui Moses

¹⁸ ke u tuk Aaronn ni ujapɔtiib, ni Israel yaab mɔmɔk ikaal imina aabɔr: N‑yoonn mu Israel aanii, bee biwɔwɔm bi koo ni chee na, yaa ti ban u toor kitork ki bi joo seer mmii ni, ki pa lipɔln, bee u ban u tii ngeehn aapiin kan, u cha kiwakork ngbaan li ŋan ki taa li kpa iween.

¹⁹ Udaan yaa ban ke Uwumbɔr gaa waapiin aatork kan, u cha ki li ye kijak ki mu taa li kpa iween.

²⁰ Ni yaa di kiwakork ki kaa ŋan na toor kitork tii Uwumbɔr kan, waan gaa ki.

²¹ Ni yaa ti ban ni tii Uwumbɔr kimɔbaan aapiin, bee ni ye lipɔln, bee ni ban ni tii nibaa aageehn aapiin, ki ban ke Uwumbɔr gaa ipiin ngbaan kan, ni cha kiwakork li ŋan.

²² Ni taa di kiwakork ki jɔb na, bee ki deeni na, bee ki kpa kidaŋ, bee mbuun mu nya kinyuŋ na, bee kiwon pu kpa ligbaln, bee libukakl na, tii Uwumbɔr ipiin. Ni taa di kiwakork kina aaboln toor tijikaar aatork libimbiln pu.

²³ Ni yaa ye ngeehn aapiin le ni ban ni tii kan, ni ga ŋmaa di kiwakork ki ni gee na ŋa kina aapiin; ni yaa ye tipuur aapɔln aapam kan, naan ŋmaa ŋa kina.

²⁴ Ni taa di baah kpaa kiwakork ki na, bee ki lee na, ki di toor kitork tii Uwumbɔr. Nsan aa bi ke ni ŋa kina nimi aatiŋ ni.

²⁵ Ni taa daa, ki taa gaa uwɔwɔnja chee kiwakork kina aaboln ki di toor tijikaar aapiin aatork ki tii Uwumbɔr. Tiwakor kina aaboln aa ŋan, le Uwumbɔr aan gaa kitork ngbaan.

^26-27 Unaa, bee upiih, bee uŋoob yaa ma kan, ni taa kpaan dabr ubo ngbaan ki nan di toor kitork, ni cha ubo ngbaan saa iwiin ilole, u yaa jer iwiin ngbaan kan, ni ga ŋmaa di u toor tijikaar aapiin aatork.

²⁸ Ni taa di unaaninkpel ni waanaabo, bee upihninkpel ni waapihbo, bee uŋoninkpel ni waaŋobo kpaan toor kitork liwinbaal.

²⁹ Ni yaa ban ni toor idoon aatork ki tii Uwumbɔr kan, ni li dii ikaal ngbaan, le Uwumbɔr ga gaa nimi aapiin ngbaan.

³⁰ Ni ŋmɔ kitork ngbaan aawakork aanann liyaadaal ngbaan ki taa cha ti woln kitaak.

³¹ Uwumbɔr nan ki bui ke, “Ni kii tii maah len pu na mɔmɔk; min le ye Uwumbɔr.

³² Ni taa joo ni inimɔɔn maayimbil li bi chain na pu; ni ŋan ke Israel aanib mɔmɔk bee ke m bi chain la. Min le ye Uwumbɔr le ki ŋa ni mu chain,

³³ le ki nyan ni nimi Ijipt aatiŋ ni, ke m li ye nimi Aawumbɔr. Min le ye Uwumbɔr.”