Liifai Yaab 21 - Uwumbɔr aagbaŋ

Bitotoorb aakaal

¹ Uwumbɔr nan bui Moses ke u tuk Aaronn aajapɔtiib bi ye bitotoorb na ke,

² “Unii yaa kpo ki yaa kaa ye aana, bee aate, bee aajapɔɔn, bee aabisal, bee aakpel, bee aanaal,

³ bee aaninkpan u kaa kee mɔn uja na kan, utotoor taa ŋa waakpuul aawan nibaa ki bii ubaa.

⁴ Ni yaa ye uchootiib wɔb kan, u taa buen baakpuul ki bii ubaa.

⁵ “Utotoor ubaa taa kuu uyikpir, bee u chee ulangbaln, bee u gii uwon nibaa chee ke u wii ikpowiil.

⁶ U li bi chain aan ki taa jinn maayimbil inimɔɔn. Waah joo tijikaar aatork seer mmii ni tii mi na, ni ŋan ke u li bi chain.

⁷ Utotoor taa yoor upii u puun ye pateer na, bee upii u puun nyi uja na, bee upii u puun mɔn uja ki ki nyan u chee na, ba pu? utotoor bi chain la.

⁸ Binib mɔmɔk li nyi ke utotoor ye chain aanii la, ba pu? uma le joo tijikaar aatork tii mi. Min le ye Uwumbɔr, m bi chain la, le ki ŋa maanib chain.

⁹ Utotoor aabisal yaa ŋa ubaa udagoor kan, u jinn ute le inimɔɔn; ni see u mmii ki ku u.

¹⁰ “Utotoorninkpel ye unii u bi di nkpan kpir uyil pu na la, le min Uwumbɔr nyan u ke u tun waatuln ki li peeni bitotoorb aawanpeenkaan, nima pu na, u taa di uyikpir lii ke waan chaar ti, ki taa kar waawanpeenkaan, ke u bi wii ikpowiil la.

^11-12 Bi di u tii min Uwumbɔr la, le naa ŋan ke u bii ubaa. U taa nya Maabool ni ki ti li koo linikpol do, hali ni yaa ye ute, bee una kan, naa ŋan ke u bii Maabool.

¹³ U yoor upii u kaa nyi uja na.

¹⁴ U taa kpan ukpopii, ki taa yoor upii u nyan uchal chee na, ki taa yoor pateer mu. U yoor waanibol ponn ni aapii u kaa nyi uja na.

¹⁵ Ni yaa kaa ye kina kan, waabim bi ba ga li ye chain aabim na aan li bi chain. Min le ye Uwumbɔr ki nyan u ke u li ye Utotoorninkpel.”

¹⁶ Uwumbɔr nan ki bui Moses

¹⁷ ke u tuk Aaronn ke, “Aayaabitiib ponn ni aanii ubaa aawon yaa kaa ŋan ki kpa iween kan, u taa di tijikaar aatork tii mi. Nkaal ngbaan ga li bi kina le ki cha n‑yoonn mɔmɔk.

¹⁸ Uja umɔk aawon aa ŋan na taa ŋa ipiin ngbaan aatork; unii u ye ujoon, bee udeen, bee unii u aanimbil wɔb kpa kidaŋ na, bee unii u aawon kpa kidaŋ na,

¹⁹ bee unii u aaŋaal bee utaal faan na;

²⁰ bee unii u ye ugodaan, bee kinigengeŋ, bee unii u kpa inimbiween na, bee unii u kpa tiwon aaween na, bee uja u bi lee u na, taa ŋa kina aatork aatuln.

²¹ Aaronn u ye utotoor na aayaabitiib ponn ni ubaa yaa kpa tiwon aaween kina aaboln kan, u taa di tijikaar aapiin aatork tii min.

²² Unii kina aaboln ga ŋmaa ji tijikaar ti bi di tii min ti ye chain, ni chain chain aajikaar aatork na.

²³ U mu aah kpa tiwon aaween na, u taa duun ni chain aakekeln li bi di gii Libool ni na, ki taa duun ni kitork aabimbiln mu chee. U taa bii chain aawan nee mɔmɔk, ba pu? Min le ye Uwumbɔr le ki ŋa tiwan ngbaan chain.”

²⁴ Le Moses nan di tibɔr ngbaan tuk Aaronn, ni ujapɔtiib, ni Israel yaab mɔmɔk.