Liifai Yaab 10 - Uwumbɔr aagbaŋ

Nadab ni Abihu aatunwanbir aabɔr

¹ Nadab ni Abihu bi nan ye Aaronn aajapɔtiib na, nan yoor tiwan ni bi seer tulalee aayon mmii ni ponn ni na, ki ban mmiisakɔl ŋa ni ponn ni, le ki ban tulalee aayon paan ŋi pu ki di tii Uwumbɔr. Tɔ, mmii ngbaan aa nan ye chain aamii, ba pu? Uwumbɔr aa nan tii bi nsan ke bi ŋa kina.

² Baah ŋa kina na, libuul ngbaan ni, le Uwumbɔr cha mmii dan le ki nan ku bi, unimbiin ni.

³ Moses nan bui Aaronn ke, “Kina pu le Uwumbɔr len ki bui ke, ‘Binib bimɔk tun maatuln na, ni ŋan ke bi li pak maah bi chain pu na; le m ga kpiir mɔk maanib maah nyuun sakpen pu na.’” Le ni gar Aaronn; waa ki ŋmaa len tibɔr tibaa.

⁴ Le Moses yin ni Misael ni Elsafann bi nan ye Aaronn aaweeja Usiel aajapɔtiib na, ki nan bui bi ke, “Dan do man ki nan yoor ninaabitiib nya Uwumbɔr Aabool ni, ki di buen lipaal.”

⁵ Moses aah mɔk bi pu na, le bi dan nan chuu baawanpeenkaan ki di bi nyan lipaal.

⁶ Moses nan ki bui Aaronn ni ujapɔtiib bilee bi gur ki bi, aan bi yin bi ke Eleasar ni Itamar na ke, “Ni toor nimi aayikpir, ki taa kar nimi aawanpeenkaan, ki taa cha nisui bii ninaabitiib ngbaan pu. Ni yaa cha nisui bii bi pu kan, ni mu ga kpo; le Uwumbɔr ga gee liŋuul ŋa Israel yaab mɔmɔk pu. Tɔ, nido yaab Israel yaab bi gur na wii baakpuul, Uwumbɔr aah cha mmii ku ninaabitiib na pu.

⁷ Nima taa nya Libool ngbaan ni, ni yaa ŋa kina kan, ni ga kpo, ba pu? bi di Uwumbɔr aakpan kpir niyil pu ki di nimi tii uma Uwumbɔr a.” Le bi ŋa Moses aah tuk bi pu na.

Bitotoorb aakaal

⁸ Uwumbɔr nan bui Aaronn ke,

⁹ “Aa ni aajapɔtiib yaa nyun ŋisubil aadaan, bee ndaan muken na kan, ni taa koo ni Maabool ponn ni; ni yaa ŋa kina kan, ni ga kpo. Aa ni saamaal li joo nkaal mue kina cha n‑yoonn mɔmɔk.

¹⁰ Ni pɔɔn nibaa ki li nyi tiwan ni ye min Uwumbɔr aatuln aawan na, ni ni kaa ye maatuln aawan na, ni tiwan ni ye chain na, ni ni kaa ye chain na.

¹¹ Maah di ikaal imɔk tii Moses aan u di mɔk si na, aa di i mɔk Israel aanib mɔmɔk.”

¹² Moses nan ki bui Aaronn, ni ujapɔtiib Eleasar ni Itamar bi gur na ke, “Ni di njikaabim aatork ti gur ki nyan ni tijikaar aatork ponn ni, aan ni di tii Uwumbɔr na, ki ŋa boroboro u kaa kpa boroboro aanyɔk na, ki ŋmɔ u kitork aabimbiln chee, ba pu? ipiin ngbaan ye i bi chain na la.

¹³ Ni ŋmɔ u chain aapepel ni; tijikaar aapiin ngbaan ye tijikaar ti bi di tii Uwumbɔr aan u mu di tii nimi na la. Uwumbɔr aah tuk mi pu na le na.

¹⁴ Aa ni saamaal ga ŋmaa ŋmɔ libingbaal ni litaajal aanann ti ye ipiinkpaan ni tootookpaan aan bi di tii Uwumbɔr, aan u mu di tii bitotoorb na. Ni ga ŋmaa ji tijikaar ngbaan ŋipepel ŋi ye chain na ni. Israel yaab aah di kimɔbaan aapiin i tii Uwumbɔr na, le u mu di tii aa ni saamaal mu ipiin.

¹⁵ N‑yoonn mu bi ti ban bi di nkpan see mmii ni ki tii Uwumbɔr aan ni ye tijikaar aatork na, bi li joo ni litaajal ni libingbaal mu. Uwumbɔr aah mɔk pu na, aa ni saamaal le yeh litaajal ni libingbaal aanann, ki cha n‑yoonn mu kaa kpa ndoon na.”

¹⁶ Tɔ, Moses nan baa bi uŋoob u bi di toor titunwanbir aatork na aabɔr, le ki bee ke bi di u see mmii ni a. Le waaŋuul fii Aaronn aajapɔtiib Eleasar ni Itamar pu, le u baa bi ke,

¹⁷ “Ba ŋa naa jin titunwanbir aatork ngbaan aajikaar chain aapepel ni? Kitork ngbaan ye chain aatork la, le Uwumbɔr di tii nimi ke ki nyan Israel yaab mɔmɔk baatunwanbir ni.

¹⁸ Naah kaa di kiwakork ngbaan aasin buen Uwumbɔr Aabool ponn ni na, ni ba ga ŋmɔ tinann ngbaan nima, ke maah tuk nimi pu na.”

¹⁹ Le Aaronn giin bui Moses ke, “Bi toor titunwanbir aatork, ni kitork ki bi joo seer mmii ni na aapiin din wee, ki tii Uwumbɔr, le tibɔbir tee aaboln dan m pu. M yaa ba ŋman titunwanbir aatork aanann ngbaan kan, ni ba ga li mɔ Uwumbɔr aa?”

²⁰ N‑yoonn mu Moses ŋun kina na, le ni piir usui.