Josua 23 - Uwumbɔr aagbaŋ

Josua aah nan di kookoo aabɔr ti chɔi bi na

¹ Naah bi cha na, le Uwumbɔr tii Israel yaab linyaŋ baadim pu, le bi kan nsuudoon. N‑yoonn ngbaan Josua nan por pam,

² nima pu na, u nan yin ni Israel yaab mɔmɔk, bi nan ye bininkpiib, ni bisalolm, ni bibɔjirb, ni biyidam bi joo binib ngbaan na, le ki nan bui bi ke, “Dandana wee, m por pam.

³ Ni mɔmɔk kan Nidindaan Uwumbɔr aah ŋa ŋitimbol ŋimina mɔmɔk pu na. Nimi pu le u ŋa kina. Nidindaan Uwumbɔr le jaa ni pu.

⁴ M tii nimi ntim mu gur ke ni ga gaa, aan mu li ye nimi yaan na, le ki kpee ntim mu ti nyaŋ ki gaa, ki yoor Jɔɔdann Aamɔɔl mɔk, liwipuul wɔb, ki ti ker Kaasisik ni Aanyusakpem mɔk, liwilir wɔb na.

⁵ Nidindaan Uwumbɔr le ga cha nimi aadim san nimi ijawaan, ki ga jenn nyan bi, le ni ga gaa baatim ke uma Nidindaan Uwumbɔr aah puu tii nimi pu na.

⁶ Kina pu na, ni pɔɔn nibaa ki kii waamɔb, ki ŋa Moses aakaal aagbaŋ aah tuk nimi ke ni ŋa pu na. Ni taa yii nkaal ngbaan mubaa,

⁷ nima kan, naan di nibaa ŋmal biniyayam bi gur ki bi ni chee na ni, ki mu taa yin baawaa aayimbil, ki taa di ŋaayimbil puu tipuur, ki taa doon ŋiwaa ngbaan kpala, ki taa gbaan ŋinimbiin ni.

⁸ Ni tee li dii Uwumbɔr mbamɔm, ke naah gaa u ki kii ki nan saa dandana wee pu na.

⁹ Naah piin ki choo na, Uwumbɔr le cha ni nyaŋni ntikpaam, ni mpɔɔndam aanibol, ki nyani bi baatim ni, ubaa aa kee nyaŋ nimi.

¹⁰ Ni ponn ni unibaan ga ŋmaa nyaŋ binib lichur; ba pu? Nidindaan Uwumbɔr le nyaŋni bi tii nimi, ke waah nan puu pu na.

¹¹ Li nyi man, aan ki li gee Nidindaan Uwumbɔr.

¹² Ni yaa kaa si chob aan ki di nibaa kpaan ŋinibol ŋi gur na chee ki yoor bibisatiib kan,

¹³ ni li nyi ke Nidindaan Uwumbɔr aan jenn nyan ŋinibol ngbaan, naah tur koo bi ponn ni pu na. Bi ga tee li ye ntafadaan le ni pu, ki li ye gaawɔb, ni libuul tii nimi. Le baah ga ŋa nimi falaa u na ga li wu nipuwɔb ke mbambaan na la, ki ga ki li wu ke ikokon le aah saar ninimbil ni na. Le ni ga li bi kina hali ki ti saa buyoonn ni ponn ni ubaa aan ti ki gur kitinyaan kimina ponn ni, kitiŋ ki Nidindaan Uwumbɔr di tii nimi na.

¹⁴ “Dandana wee, ni ŋeer ke m kpo. Ni mɔmɔk nyi nisui ni, ni nimi aawiin ni, ke Nidindaan Uwumbɔr le tii nimi tiwanyaan nimɔk u puu ke u ga tii nimi na. Tipuur timɔk u puu na, u ŋa ti mɔmɔk; tibaa kina aa bee fam.

¹⁵ Waah cha tipuur ngbaan mɔmɔk gbiin na, kina le u ga cha tifaan ngbaan mɔmɔk mu gbiin.

¹⁶ Ni yaa kaa joo nkaal mu Nidindaan Uwumbɔr bui nimi ke ni li joo mu na, ki yaa dooni ŋiwaa kan, waaŋuul ga fii, le u ga daa nitafal, naan yunn le ni mɔmɔk ubaa kina aan ki gur kitinyaan ki u di tii nimi na ponn ni.”