Josua 22 - Uwumbɔr aagbaŋ

Josua aah nan cha liwipuul wɔb aanibol gir kun pu na

¹ Josua nan yin Rubenn ni Gad aanibol, ni Manase aanibol ligeln, ŋi ye liwipuul wɔb yaab na, nan kpaan ubaa chee.

² U nan bui bi ke, “Uwumbɔr aatutunn Moses aah nan bui ke ni ŋa pu na, ni kii waamɔb ki ŋa ni mɔmɔk doo a, le ki kii maah bui ke ni ŋa pu na mɔmɔk.

³ N‑yoonn mumina mɔmɔk, naa san cha nido yaab Israel yaab kpala. Ni pɔɔn nibaa ki kii tii Nidindaan Uwumbɔr mbamɔm.

⁴ Dandana wee, waah nan puu pu na, Nidindaan Uwumbɔr tii niŋeen aatɔtiib Israel yaab biken nsuudoon a. Kina pu na, gir kun kitiŋ ki pu ni nan gaa ki ye nimi yaan na, kitiŋ ki bi liwipuul, Jɔɔdann aamɔɔdapuul wɔb na, kitiŋ ki Uwumbɔr aatutunn Moses nan di tii nimi na.

⁵ Ni chuu nibaa man, ki kii, ki li joo ikaal i Moses nan di mɔk nimi na: ni li gee Nidindaan Uwumbɔr, ki ŋa waageehn, ki kii tii waakaal, ki li joo waasan mbamɔm, aan ki li dii u nisui ni, ni nimi aawiin mɔmɔk.”

^6-8 Josua nan mee Uwumbɔr aanyoor ŋa bi pu, le ki cha bi gir kun, le ki di tibɔr tee sur bi, “Ni joo liwangol le ki gir chaa kun: tiwakor, ni tikunabr, ni salmaa, ni tikumann, ni tikur, ki kpee tiwanpeenkaan pam. Naah gaa tiwan ni nimi aadim chee na, ni ti yakr ni tii niŋeen aatɔtiib biken.” Le bi siir buen. Moses le nan di kitiŋ ki bi liwipuul, Jɔɔdann Aamɔɔdapuul wɔb na tii Manase aanibol ligeln. Josua mu nan ban kitiŋ Jɔɔdann Aamɔɔl aawilir wɔb, ki tii Manase aanibol ligeln li gur na, ŋinibol ŋiwae na chee.

⁹ Kina le Rubenn ni Gad aanibol, ki kpee Manase aanibol ligeln liken na, gir kun. Bi nan buen ki cha Israel yaab bi gur na, le bi gaar Silo aatiŋ ki bi Kanaann ni na, le ki chaa kun baatiŋ ni, bi yin ki ke Gilead. Kitiŋ ngbaan le Uwumbɔr nan bui Moses ke u di tii bi.

Kitork aabimbiln li bi nan maa Jɔɔdann Aamɔɔl chee na

¹⁰ N‑yoonn mu Rubenn ni Gad aanibol, ki kpee Manase aanibol ligeln, bi ye liwipuul wɔb yaab na nan ti fuu Gelilof aatiŋ ni, ki nan bi Jɔɔdann Aamɔɔl aawilir wɔb na, le bi maa kitork aabimbiln sakpeln nyanyaan libaa, limɔɔl chee nima.

¹¹ Tɔ, binib bibaa nan tuk Israel yaab biken na ke, “Li pel man, Rubenn ni Gad aanibol, ni Manase aanibol ligeln maa kitork aabimbiln sakpeln libaa Gelilof aatiŋ ni, ni bi timi aapepel wɔb, Jɔɔdann Aamɔɔl chee.”

¹² Israel yaab biken na aah ŋun kina na, le bi mɔmɔk kuun dan Silo aatiŋ ni, ke bi buen ti to ŋinibol ngbaan butɔb.

¹³ Le Israel aanib ngbaan nan tun Eleasar aajapɔɔn u bi yin u ke Fineas na, ke u buen Rubenn ni Gad aanibol, ni Manase aanibol ligeln na aanib chee, Gilead aatiŋ ni.

¹⁴ Israel yaab aaninkpiib bi nan ye bisalolm na kipiik le nan kpee Fineas pu, bi nan nyan liwilir wɔb aanibol aaninkpiib ni la, le bi mɔmɔk nan ye biyidam, baataŋaal ponn ni.

¹⁵ Le bi ti fuu Gilead aatiŋ ni, Rubenn ni Gad aanibol, ni Manase aanibol ligeln bi bi liwipuul wɔb na chee.

¹⁶ Baah nan kpaan ki ye Uwumbɔr aanib aasalolm pu na, le bi bui bi ke, “Ba ŋa ni ŋa titunwanbir timina aaboln timi Israel yaab Aawumbɔr aanimbiin ni? Ni yii Uwumbɔr aamɔb, le ki maa kitork aabimbiln limina tii nibaa, kaa di li tii Uwumbɔr.

¹⁷ Ni teer taah nan tun titunwanbir ti Peor aatiŋ ni na; n‑yoonn ngbaan Uwumbɔr nan daa timi waanib aatafal ki cha iween lir ti pu, kina pu na, ti laa beenin ji kina aafalaa. Timi aatunwanbir ngbaan aa ŋeer aa?

¹⁸ Ni yaa yii Uwumbɔr aamɔb din wee kan, u ga gee liŋuul Israel yaab mɔmɔk pu.

¹⁹ Ni yaa kaan ŋmaa doon Uwumbɔr nimi aatiŋ ni kan, puur dan ti chee man, nin chee Uwumbɔr Aabool bi na, ki nan gaa timi aatim ngem. Ni taa yii Uwumbɔr aamɔb, ki taa nya tipuwɔb ki nan ki maa kitork aabimbiln liken ki kpee Tidindaan Uwumbɔr yaan pu.

²⁰ Ni teer Sera aajapɔɔn u bi nan yin u ke Akann na bɔr, u nan yii Uwumbɔr aamɔb le ki yoor tiwan ni ye Uwumbɔr yaan na, le Uwumbɔr nan daa Israel yaab mɔmɔk aatafal, naa nan ye Akann baanja le nan kpo titunwanbir ngbaan pu.”

²¹ Le Rubenn ni Gad aanibol, ni Manase aanibol ligeln aanib nan giin bui liwilir wɔb aanibol aaninkpiib ke,

²² “Uwumbɔr le ye Mpɔɔndaan. Uma le ye Uwumbɔr. Uwumbɔr le ye Mpɔɔndaan. Uma le ye Uwumbɔr. Uma le nyi tiwan ni pu ti ŋa kina na, le ti ban ni mu bee ni. Ni yaa ye ke ti tun titunwanbir Uwumbɔr chee, kaa kii waamɔb kan, ku timi man, ki taa cha ti ki li bi man.

²³ Ni yaa ye ke ti yii Uwumbɔr aamɔb, le ki maa kitork aabimbiln ke ti li seer njikaabim aapiin, bee kimɔbaan aapiin kan, cha Uwumbɔr ubaa daa titafal.

²⁴ Aayii. Tiwan ni cha ti ŋa kina na le ye ke ti san ijawaan ke n‑yoonn mu choo na, niyaabitiib ga nan bui timi yaab ke, ‘Nimi aa ye Israel yaab Aadindaan Uwumbɔr aanib, ba ŋa ni dii u?

²⁵ U di Jɔɔdann aamɔɔl le siin timi aatiŋ, ni nimi bi ye Rubenn, ni Gad aanibol yaab na aatiŋ mɔk. Naan ŋmaa dii Uwumbɔr.’ Nibaakan niyaabitiib ga bui tiyaabitiib kina, ki cha bi taa ki dii Uwumbɔr.

²⁶ Nima pu le ti maa kitork aabimbiln ngbaan, naa ye ke ti ban ti see kitork ki tii ipiin li pu la,

²⁷ ti ŋa kina ke ni li ye limɔkl ki tii nimi aanib, ni timi yaab, ki ki tii binib bi paa ni ti pu na, aan nima kan, timɔk kpaan ki li dooni Uwumbɔr, Waabool baan ni, ki li toor libimbiln baan pu kitork ki bi joo seer mmii ni na, ni kitork kiken, ni kimɔbaan aatork. Nimina le ga kiir niyaabitiib, bi taa len ke tiyaabitiib aan ŋmaa dii Uwumbɔr.

²⁸ Ti dak le ke ni yaa dan kina kan, tiyaabitiib ga ŋmaa bui ke, ‘Lik man, tiyaajatiib mu maa kitork aabimbiln li naan Uwumbɔr yaan na la. Baa maa li ke bi li seer kitork ki tii ipiin li pu, ni ye limɔkl le ki tii nimi ni timi aamaal.’

²⁹ Mbamɔn, taan ŋmaa yii Uwumbɔr aamɔb, ki mu aan yii ke taan ki dii u, ni mu aa ye ke ti maa libimbiln ti li toor kitork ki seer mmii ni, bee kitork kiken, bee njikaabim aatork li pu la. Taan ki maa kitork aabimbiln liken kpee Tidindaan Uwumbɔr aabimbiln li si Waabool aanimbiin ni na.”

³⁰ Le Fineas u nan ye utotoor na, ni bijab kipiik bi ye ŋinibol ŋi bi Jɔɔdann aawilir wɔb na aayidam na ŋun Rubenn ni Gad aanibol, ni Manase aanibol ligeln na aah len pu na, le ni mɔɔr bi.

³¹ Le utotoor Eleasar aajapɔɔn Fineas nan bui ke, “Dandana wee, ti bee ke Uwumbɔr bi ti chee. Naa yii waamɔb, kina pu le ni nyan Israel yaab mɔmɔk Uwumbɔr aatafadaan ni.”

³² Le Fineas ni biyidam ngbaan nan nyan Gilead aatiŋ ni, Rubenn ni Gad aanibol chee, ki gir buen Kanaann aatiŋ ni, ki buen Israel yaab biken chee, le ki ti ŋeer tibɔr ngbaan mɔmɔk tuk bi.

³³ Le ni mɔɔr Israel yaab mɔmɔk, le bi pak Uwumbɔr. Baa nan ki dak ke bi ga buen ti to Rubenn ni Gad yaab butɔb.

³⁴ Rubenn ni Gad yaab nan bui ke, “Libimbiln lee ye seeraa ke Uwumbɔr le ye Tidindaan.” Kina pu le bi nan yin libimbiln ngbaan ke, “Seeraa.”