Jeremia 12 - Uwumbɔr aagbaŋ

Jeremia aah baa Uwumbɔr mbaan pu na

¹ “Uwumbɔr, m yaa ban m ni sin kpak tibɔr pu kan, aa ga li kpa mbamɔn. Tɔ, m mu tee ga baa si ibamɔn aabɔr tibaa pu. Ni ŋa kinye aan bibiindam kani liwangol? Ni ŋa kinye aan beebeedam nya tibɔr ni n‑yoonn mɔmɔk?

² Sin le naan bi, le bi fii ki kpa inyaan; bi muuni le ki pɔr. N‑yoonn mɔmɔk kan, bi len aa pu tibɔnyaan la, le kaa tee dak aa pu kpala.

³ Tɔ, Uwumbɔr, aa nyi mi; aa kani maah tun pu na, ki nyi maah gee si pu na. Dar titunwanbirdam ngbaan ke ipiih na buen bi ti kɔr bi; li kii bi ki ti saa buyoonn bi ga ku bi na.

⁴ Timi aatiŋ ga li kuun kina ki ti saa bayoonn? Timoor ti bi ikpaakon ni na mu yɔl yɔl. Tiwakor ni inyoon kpoi timi aanib aatunwanbir pu la; bima le len ke, ‘Uwumbɔr aa kani taah tun pu na.’”

⁵ Le Uwumbɔr bui ke, “Jeremia, aa ni binib yaa san kpak aan aa bak kan, aa ga ŋa kinye aan aa ni itaan san kpak? Aa yaa kaan ŋmaa sil nteer pu kan, aa ga ŋa kinye ki koo Jɔɔdann aachook ni?

⁶ Hali aana aabim bi ye saadichal ni aanib na, le di si ti bii; bi kpee binib bi tak si na pu a. Bi ga li len aa chee kijɔtiik aabɔr, aa mu taa kii tii bi.”

Uwumbɔr aasui aah bii waanib pu pu na

⁷ Uwumbɔr len ke, “Ntafal aa ki bi Israel yaab ni, M yii maah nan lee litimbol li na. M di binib bi m gee bi na ŋa baadim aapɔɔn ni.

⁸ Binib bi m nan lee bi na fii sil m pu; bi ŋuuni m pu ke uchinn u bi kichook ni na la, kina pu le maa ki gee bi.

⁹ Maanib bi m lee bi na naahn unyoon u kaasaa mam mann gob u na la. Yin ni ipeel aan i mu nan ji njim ngbaan.

¹⁰ Biyidam bi ye biwɔwɔm na pam le bi maasubil aasaak ni; bi taa taa maajikaar bil kitiŋ; bi cha maatiŋ ki nan ŋan sakpen na kpaln nteersakpiin.

¹¹ Bi cha ki kpaln kipɔɔk la; ki gur dɔ nkuun la. Kitiŋ ngbaan mɔmɔk kpaln nteersakpiin, le ubaa aatafal aa ki bi ki ponn ni.

¹² Bijab nyan ni nteersakpiin aatim ni le ki nan jenn gaa maanib aawan. M tun ni butɔb le ke bu nan bii doo kitiŋ ngbaan mɔmɔk; ubaa aan kan lifuur nima.

¹³ Maanib nan bun imuul, le ki tee nan chee timoor; bi nan tun le kitotoŋ nyan, le kaa nan kan nibaa. Maaŋuusakpeln pu le baajikaar aa ŋa.”

Uwumbɔr aah nan puu tipuur ti tii binib bi ka Israel yaab chee na pu na

¹⁴ Uwumbɔr nan bui ke, “M kpa tibɔr tibaa m tuk binib bi ka maanib Israel yaab chee aan ki kuln kitiŋ ki m nan di tii bima Israel yaab na. M ga nyan bibiindam ngbaan baatim ni ke baah chuu ŋɔb busub pu na la, le ki gaa Juda aanib bi chee lii.

¹⁵ M yaa nyan bi buen kan, m ga san bi kinimbaak; m ga giin ni linibol mɔk nan kaan laatiŋ ni, laatiŋ pu.

¹⁶ Bi yaa gaa maanib aah dii nsan mu na, ni bisui mɔmɔk, ki puur tipuur ke, ‘Uwumbɔr u bi na’ pu, ke baah nan cha maanib puur tipuur tii liwaal Baal pu na kan, bi mu ga li bi maanib ponn ni ki ga kan liwangol.

¹⁷ Tɔ, litimbol li kaan kii maamɔb na kan, m ga ŋɔb li kookoo ki kuln li. Min Uwumbɔr le len kina.”