Inandalahn 1 - Uwumbɔr aagbaŋ

Jerusalem aapombiin

¹ Jerusalem, kitiŋ ki nan gbii binib na gur ŋmin chii la. Dulnyaa mɔmɔk aanib nan pak kima la, le ki gur naahn ukpopii; kitiŋ ki nan kpa liyimbikpaan na aanib kpaln binaagbiib.

² Kinyeek ni kitaak aawoln pu, kaanib wii la; le tinyunyunn puu dii bitakpin. Ubaa aa ki bi kijɔtiib mɔmɔk ponn ni ki ga sɔŋ kisui. Kimaantɔtiib di ki kooh a, le bi mɔmɔk gur ye kaadim.

³ Juda aanib gur ye binaagbiib bi kaa kpa nterm na la, le bi jenn nyan bi bido. Bi gur koo ntiyayam ponn ni la, kaa kpa nin chee bi ga yin ke baatiŋ na. Baadim le mann goln bi, le baa ki kpa nin chee bi ga dii nya ki ŋmar na.

⁴ Ubaa aa ki koo Uwumbɔr Aadichal ni ke u nan doon Uwumbɔr njim daal. Bisapɔm bi nan gaa ilahn nima na ji falaa la, le bitotoorb ker idun ŋmeen la. Kitiŋ aagoln aabisamɔi ni gur ye nkuun la, le Sionn aatiŋ aanib bi iween sakpen ni.

⁵ Kaadim nyaŋ ki; ki gur bi baapɔɔn ni la. Uwumbɔr le cha ki jin falaa kaatunwanbir sakpenn pu; Bi chur kaabim ki di bi buen a.

⁶ Jerusalem aanyaan gur ye n‑yaayoonn na aawan la. Kaayidam gur naahn ipeeman i nkon joo i na la, i san ke i ŋmar bikpam chee, le yaapɔɔn mɔmɔk ti doo.

⁷ Jerusalem aatiŋ teer kaayaayoonn na aanyaan bɔr, le ki gur ber ki dɔ suuna. Kaah nan lir kaadim aaŋaal ni na, ubaa aa nan bi ki ter ki. Le binib bi nan nyaŋ ki na laa, kaah nan lir pu na.

⁸ Kaanyuŋ doo a; ki gur nkuun la, le bi gur lik ki fam. Ki ker idun le ki bɔrni inimɔɔn pu. Jerusalem aatiŋ di titunwanbir le ŋa kibaa tijɔŋ.

⁹ Kaajɔŋ aa nan bɔr, le kitafal aa nan bi ntafadaan mu ga pii ki na ni. Kaalirm nan nyaŋ a; ubaa aa ŋmaa sɔŋ kisui. Kaadim nyaŋ ki; le kaanib wii ke Uwumbɔr san bi kinimbaak.

¹⁰ Kaadim nan sun kaawangol mɔmɔk; kaanib nan kan baah koo Uwumbɔr Aadichal ponn ni pu na. Uwumbɔr aa tii nsan ke binib bi kaa ye Israel yaab na koo nima chee.

¹¹ Kaanib bi ban tijikaar; le ki ker idun. Bi joo baawangol le kpenni tijikaar ki ji ke bi ŋmar. Kitiŋ ngbaan wii le ke, “Uwumbɔr, lik maah bi pu na; lik mi, maanimbaak ni.”

¹² Unii umɔk jer na kan, ki wii le ki len ke, “Lik maah bi pu na. Ubaa aa kee kan iween i aaboln m kan na, Uwumbɔr aaŋuul yoonn le u di kina aaween tii ni mi.

¹³ U cha mmii mu wu nwon ni na nyan ni paacham ki dan m pu. U pen mi gaawɔb ki cha m lir kitiŋ. Le u siir cha mi ki di iween ŋmeen tii mi.

¹⁴ U ŋmee maatunwanbir mɔmɔk bil le ki buu ti mɔmɔk kpaan tɔb ni. U nan di ti leen nneen ni, le taanyunyuun nyii mi bil kitiŋ. Uwumbɔr di mi tii maadim, le maa nan kpa mpɔɔn mubaa bi chee.

¹⁵ Uwumbɔr nan yuul maajab bi kaar na. U nan tun ni bijab le bi nan kuln maanachipɔm. U nan muen muen maanib ke baah mueni ndaan aasubil pu na la.

¹⁶ Kina pu le tinyunyunn nya nnimbil ni ki puu lir. Ubaa aan ŋmaa sɔŋ nsui, ubaa aan ŋmaa pɔɔk ntaakpab. Bidim nyaŋ mi, bi yoor maanib aawan mɔmɔk a.

¹⁷ M taln ŋŋaal le ubaa aan ter mi. Uwumbɔr yin bidim bi nyan ŋipepel mɔmɔk na nan lii m pu. Le bi ŋani mi ke maah ye tijɔŋ aawan nibaa le na.

¹⁸ Tɔ, Uwumbɔr kpa mbamɔn, min le yii waamɔb. Ŋipepel mɔmɔk aanib, li pel m chee man, lik maah bi iween i ponn ni na man. Bi chur maanachipɔm ni bipiisapɔm tinaagbiir.

¹⁹ M yin mmaantɔtiib, le bi yii, kaa dan nan ter mi. Le bitotoorb ni biyidam bi ban tijikaar, kaa kan, ki ti kpoi kitiŋ ponn ni.

²⁰ Uwumbɔr, lik maah bi ntoton mu ponn ni na. Maatunwanbir bii nsui mɔmɔk doo. Bi ku binib kitiŋ ponn ni, hali tidir mu ni, bi ku binib la.

²¹ Li pel maah ker idun pu na; ubaa aa bi ki sɔŋ nsui. Saah di tibɔbir tii ni mi na, le maadim aasui piir. Cha saah nan puu ke nwiin mu ga dan na fuu ni; cha maadim mu ji maah jin falaa u na.

²² Cheer bi baabiin na mɔmɔk pu. Daa bitafal ke saah daa ntafal maatunwanbir pu pu na. Falaa ponn ni le m ker idun, le ni ye nsui ni iween.”