Ilahn 78 - Uwumbɔr aagbaŋ

Uwumbɔr ni waanib

¹ Maanib, li pel maamɔkm man, ki pel maah ban m len pu na mbamɔm.

² M ban m di nlan aabɔr le len ki kpiir tuk nimi n‑yaayoonn na aabɔbɔrkaan,

³ tibɔr ti ti ŋun ki nyi ti na, tibɔr ti tiyaajatiib tuk timi na.

⁴ Ti ga cha timi aabilb li nyi ti. Ti ga bui tiyaabitiib Uwumbɔr aah kpa mpɔɔn ki tun liyimbil aatun ŋi na, ni iwaan aatun ŋi u tun na.

⁵ U tii Jakob aayaabitiib, Israel yaab, ŋikoobil ni ikaal. U nan bui tiyaajatiib tibɔr ke bi mɔk baabilb waakaal,

⁶ aan biyaabitiib mu ga nan ŋmaa bee i ki mu nan di i mɔk baabilb.

⁷ Bi yaa ŋa kina kan, bi mu ga nan kii tii Uwumbɔr, kaan suln waah tun pu na; bi mu ga tee li ŋani waakaal aah len pu na n‑yoonn mɔmɔk.

⁸ Baan li bi ke biyaajatiib na, kaan li ye binib bi yii Uwumbɔr aamɔb ki nyan upuwɔb na. Baan li ye binib bi kaa gaa Uwumbɔr ki kii mbamɔm, kaan ŋmaa nyii u pu ki sil n‑yoonn mɔmɔk na.

⁹ Efraim yaab nan joo itɔi ni ipiin, le ki nan tee san butɔb daal.

¹⁰ Baa nan joo tipuur ti bi nan puu tii Uwumbɔr na; bi yii, kaa joo waakaal.

¹¹ Bi suln waah tun pu na, iwaan aatun ŋi u nan tun aan bi kan na, bi suln ŋibɔr.

¹² Biyaajatiib nan si lik, le Uwumbɔr tun iwaan aatun Soann aapaan mu bi Ijipt aatiŋ ni na.

¹³ U nan yakr nnyusakpem nfum mulee pu, ki di bi dii mu ni jer; u nan cha nnyun fii sil ke ŋigon na.

¹⁴ Nwiin pu kan, u nan loln bi pu nsan, ntaalangbam ponn ni la, le ki ye mmii ki wiin ki loln bi pu nsan kinyeek, ni kitaak aah ga ti woln pu na.

¹⁵ U bɔɔl ŋitakpal nteersakpiin ni, ki cha nnyun nyan ni nin chee nyoo na ki tii bi, bi nyun.

¹⁶ U cha nkpen puu nyan ni litakpal ni, ki cha nnyun puu ke limɔɔl na,

¹⁷ le bi yii, ki beenin tun Uwumbɔr titunwanbir, le ki yii uma Uwumbɔr u kaa kpa ŋeen aatɔ na aamɔb, nteersakpiin ngbaan ni.

¹⁸ Bi nyi le ki tɔŋ Uwumbɔr ki bui ke u tii bi tijikaar ti bi ban na.

¹⁹ Bi nan len Uwumbɔr le ki bui ke, “Uwumbɔr ga ŋmaa tii timi tijikaar nteersakpiin ni ii?

²⁰ Ni ye mbamɔn ke u faa litakpal, le nnyun puu nyan ni ke nwam na; tɔ, u ga ŋmaa tii timi tijikaar aa? u ga ŋmaa tii timi waanib tinann mu uu?”

²¹ Uwumbɔr aah ŋun waanib len kina na, le waaŋuul fii, le u di mmii tak bi, le waaŋuul moo fii bi pu,

²² ba pu? baa nan gaa Uwumbɔr ki kii kaa tii naadii ke u ga ŋmaa gaa bi lii.

²³ Le u len kitaapaak chee tibɔr ki bui ke kaabisamɔi chuu piir;

²⁴ le ki tii bi njikaabim mu nyan ni paacham na, ki cha tijikaar ti bi yin ti ke mana na lir ni ke bi ji.

²⁵ Kina pu le bi nan jin Uwumbɔr aatuuntiib aajikaar, le Uwumbɔr tii bi baah ban pu na mɔmɔk.

²⁶ U nan ki cha liwipuul wɔb aabuln daa, ki cha waapɔɔn fiin ŋŋangii wɔb aabuln,

²⁷ ki cha inyoon lir ni kitiŋ ki wiir ke limɔɔtambol na, le waanib chur i;

²⁸ i nan lir baakakaa chee, baah doo nin chee na.

²⁹ Le binib ngbaan nan jin ki ŋman ki bab; Uwumbɔr nan tii bi baah ban pu na.

³⁰ Tɔ, baakpeek aa nan kee doo; bi nan beenin ji,

³¹ le Uwumbɔr aaŋuul nan fii bi pu, le u ku baajab bi pɔɔ sakpen ki ye Israel yaab aanachipɔm na.

³² Nimina mɔmɔk aapuwɔb, binib ngbaan nan beenin tun titunwanbir; Waajinjiir aatun na mɔmɔk aapuwɔb na baa nan beenin tii u naadii.

³³ Le u kuln baawiin ke kifuurk kibaa na, ki di tibɔbir kuln baamɔfal.

³⁴ Buyoonn u ti ku bi ponn bibaa na, le bi gur na tee fenn gir ni u chee, ki yii titunwanbir ki di bisui mɔmɔk mee u.

³⁵ Bi nan teer ke Uwumbɔr le ye baakikiir, ki teer ke uma Uwumbɔr u kaa kpa ŋeen aatɔ na le ter bi.

³⁶ Tɔ, baamɔbon tee ye inyamɔn la; baabɔr mɔmɔk aa gbiini.

³⁷ Baa nan dii waah len pu na; baa nan joo baah nan puu tipuur ti tii u na.

³⁸ Le Uwumbɔr ma nan san waanib kinimbaak. U nan di cha pinn bi baatunwanbir kaa kuln bi. N‑yoonn n‑yoonn pam le waa di waaŋuul tun lituln, ki chuu waaŋuusakpeln.

³⁹ U nan teer ke bi ye binibɔm la, ki naahn libuln li daar jer cha na la.

⁴⁰ N‑yoonn mɔmɔk ni, bi nan yiil waamɔb nteersakpiin ni la; N‑yoonn mɔmɔk bi nan bii usui la.

⁴¹ Bi tɔŋni Uwumbɔr, ki ki gir tɔŋni u, ki cha uma Israel yaab Aawumbɔr u bi chain na aasui bii.

⁴² Bi suln waapɔɔnsakpiin bɔr, ni nwiin mundaal u nan gaa bi baadim chee lii na,

⁴³ ni bundaal u nan tun waatukpaan Soann aapaan mu bi Ijipt aatiŋ ni na bɔr.

⁴⁴ U nan cha ŋimɔɔ kpaln nsin, le Ijipt yaab aa nan ki kpa nnyun bi nyu.

⁴⁵ U nan tun ni tisibir nan lii bi pu, le ti muk bi, ni ŋipulaatal ŋi bii baatiŋ na.

⁴⁶ U cha itoon dan nan di baajikaar ŋman ki bii baakpaakon doo.

⁴⁷ U cha ŋitaatakpal lir ki kool baadaan aasubil, ni baasubil ŋiken aasui.

⁴⁸ U cha ŋitaatakpal le ku baanaa ki cha utaal aah moor pu na ku tiwakor ti gur na.

⁴⁹ Waaŋuusakpeln ponn ni le u nan cha nkun aatuuntiib dan ki nan bii bi pam.

⁵⁰ Waa ki chuu waaŋuul, kaa di cha baamɔfal; u cha iween ku bi.

⁵¹ U nan ku bima Ijipt yaab aadichadaan mɔk aajan aabijabim,

⁵² le ki nin cheen waanib nyan ke upihdaan na, ki mɔk bi nsan, nteersakpiin ni.

⁵³ U nan cheen bi mbamɔm, le ijawaan aa nan joo bi; u cha nnyusakpem nan biin baadim pu, ki di bi buen.

⁵⁴ U nan di bi nan fuu waatiŋ ki bi chain na pu, u di bi nan fuu ŋijoo ŋi pu uma ubaa nan jan ki gaa ŋi na.

⁵⁵ Waanib aah tur koo ni pu na le u jenn ntim ngbaan aanib le ki yakr baatim tii Israel aanibol ki di bido tii waanib ngbaan.

⁵⁶ Le bi tee nyan Uwumbɔr u kaa kpa ŋeen aatɔ na aapuwɔb, ki tɔŋ u; baa nan joo waakaal;

⁵⁷ bi tee nyan upuwɔb kaa dii waah len pu na ke biyaajatiib na, kaa si chob ke mpiin mu gɔr na.

⁵⁸ Bi nan cha waaŋuul fii baah dooni ŋiwaa nin chee na pu, ki cha usui fii baawaa ngbaan pu.

⁵⁹ Uwumbɔr aah kan kina na, le waaŋuul fii, le u yii waanib kookoo.

⁶⁰ U nan nyan cha Waabool li nan bi Silo aatiŋ ni ki nan ye Waadichal li ponn ni u nan koo tikaasisik ni na.

⁶¹ U nan cha timi aadim nyaŋ timi ki gaa Nkaal Aadakaa u ye waapɔɔn ni kipak aamɔkl na.

⁶² Waaŋuul nan fii waanib pu pam, le u cha baadim ku bi.

⁶³ Binachipɔm nan kpoi butɔb ni le bipiisapɔm aa ki kan ubaa bi mɔn.

⁶⁴ Bitotoorb nan kpoi mpɔɔkun la, le baakpopiib aa nan kpa nsan ke bi wii baakpuu.

⁶⁵ Nee aapuwɔb le Uwumbɔr nan fii ke waah finn ngeen pu le na; u nan bi ke unachipɔɔn u nyun ndaan aan ni mɔɔr u na.

⁶⁶ U nan jenn waadim giin inimɔɔn aalirm mu kaa kpa ndoon na ni.

⁶⁷ U nan tee yii Josef aayaabitiib; waa nan lee Efraim aanibol.

⁶⁸ U nan tee lee Juda aanibol, ni Sionn Aajool li u gee mbamɔm na la.

⁶⁹ Nima chee le u maa Waadichal ke udo ni bi paacham na; u nan cha li nyal sil ke kitiŋ kibaa aah si chob pu aan nibaa aa ŋmaa ŋa ki, ki ti saa n‑yoonn mu kaa kpa ndoon na la.

⁷⁰ U nan lee waatutunn David la. U nan ti nyan ni u kinaakpaamook ni,

⁷¹ nin chee u bi kpaa waapiih na, le ki di u ŋa Israel yaab aabɔr, Uwumbɔr aanib aapihdaan.

⁷² David nan di lineen le ki joo bi, ki loln bi pu nsan, ki nan kpa nlan.