Ilahn 49 - Uwumbɔr aagbaŋ

Aa yaa di naadii tii liwangol kan ni ye kijɔrk la

¹ Ni mɔmɔk li pel man tibɔr tee, binib bi mɔmɔk bi ni kookoo na,

² binikpaam ni biwaatiib mɔmɔk, biwankpadam ni bigiim mɔmɔk, li pel man.

³ Nsui ga li nyoo pam; m ga len nlan aabɔr.

⁴ M ga labr koo ŋiyataŋak ni la, le ki di kibeek gbaa kpiir ŋaatataa.

⁵ Linimaln ni, buyoonn maadim mann goln mi na kan, maa san ijawaan;

⁶ kaa san titunwanbirdam bi di naadii tii baawangol, ki puur tipupuur baawankpal sakpeln ngbaan pu na ijawaan.

⁷ Unii aan ŋmaa pa ki gaa ubaa aamɔfal; waan ŋmaa pa Uwumbɔr waamɔfal pu,

⁸ ba pu? unibɔn aamɔfal aadaak pɔɔ sakpen a. Waah ga di tiwan ni pa na ga li par

⁹ ke ni taa cha u koo likaakul ni, ki tii u limɔfal li kaa kpa ndoon na.

¹⁰ Unii mɔk kani ke binib bi kpa nlan na mu kpoi, ke bijɔrb ni bilatiirb na la. Bi mɔmɔk kpoi le ki cha baawangol siini biyaabitiib.

¹¹ Baakaakul ga li ye bido ki ti saa n‑yoonn mu kaa kpa ndoon na; nima chee le bi ga li bi n‑yoonn mɔmɔk, bi mu nan tee kpa bibaa aatim n‑yoonn mubaa.

¹² Unii aawangol aan ŋmaa nyan u nkun ni; u ga nan kpo ke kiwakork na la.

¹³ Lik man tiwan ni ŋani binib bi tii bibaa naadii na, lik man binib bi bui ke bi bab liwangol na aadoon,

¹⁴ bi ga nan kpo ke ipiih na la, nkun le ga nan li ye u kpaa bi na. Binib bi aabimbin ŋan na ga laa bi, buyoonn biwon bi bur kitekpiitiŋ ki daa bido na ni.

¹⁵ Le Uwumbɔr ga gaa mi lii, u ga nyan mi nkun aapɔɔn ni.

¹⁶ Unii yaa kan liwangol kan, taa cha aasui bii, hali ki ti saa buyoonn waawangol ngbaan moo kpee na;

¹⁷ U yaa nan kpo kan, waan ŋmaa yoor li buen ubaa chee; waawangol aan dii u koo likaakul ni.

¹⁸ Hali unii yaa bui ke nibaa aa muk u aan binib pak u kina pu kan,

¹⁹ u ga nan ti pii uyaajatiib nkun ni, nin chee mbɔmbɔɔn aan doo na.

²⁰ Unii aawangol aan ŋmaa nyan u nkun ni, u ga nan kpo ke kiwakork na la.