Ilahn 39 - Uwumbɔr aagbaŋ

Falaadaan aah kpiir waatunwanbir pu na

¹ M len ke, “M ga chuu mbaa maatuln chee, ki taa cha nlambil di mi koon titunwanbir ni. Buyoonn titunwanbirdam bi m chee na kan, maan len tibaa.”

² M nan ŋmin suuna, kaa len tibaa, hali maa len litunyaan libaa aabɔr. Le maafalaa moo kpae,

³ le maalandak ban i ku mi. M yaa moo dak ilandak kan, le ni moo muk mi; le m nan baa ke,

⁴ “Uwumbɔr, maamɔfal fɔk kinye? Bayoonn aan m ga kpo? Bui mi maamɔfal aah ga kuln n‑yoonn mu na.”

⁵ Aa kuln maamɔfal mala. Aa chee kan, maamɔfal aayoonn aa ye nibaa. Mbamɔn, unibɔn aamɔfal aa jer litakpiln libaa aabuln,

⁶ li ye kijunjuŋ la. Waatuln mɔmɔk ye fam la; u ban liwangol bilni, kaa tee nyi u ga li yeh li na.

⁷ Uwumbɔr, ni ki ye ba aan m ga mak ni pu? M mak sin pu la.

⁸ Nyan mi maatunwanbir mɔmɔk ni, ki taa cha bijɔrb laa mi.

⁹ M ga li ŋmin, kaan len tibaa, ba pu? Sin le cha m ji falaa wee.

¹⁰ Taa ki daa ntafal kpee; saagbar ban ti ku mi la.

¹¹ Saah ga kae unii pu na, le aa joo dar utafal waatunwanbir pu, le ki bii waah gee tiwan ni na ke ŋipandakur aah bii likekeln pu na. Mbamɔn, unibɔn aa jer litakpiln libaa aabuln.

¹² Uwumbɔr, ŋun maameel, ki ŋun maawiil; m yaa wii kan, dan ki nan ter mi. Aa chee, m yunn siib ke uchaan na le dulnyaa wee ni, ke n‑yaajatiib aah nan bi pu na la.

¹³ Di cha mi suuna aan m kan mpopiin siib waahr aan m nin buen ki taa ki gir ni.