Ilahn 38 - Uwumbɔr aagbaŋ

Falaadaan aameel

¹ Uwumbɔr, taa di liŋuul daa ntafal.

² Saapiin tii mi titotonn; aa faa mi lii kitiŋ.

³ Saaŋuul pu, le m bi iween sakpiin ni; maatunwanbir pu le nwon mɔmɔk kpaln iween ŋmeen.

⁴ M bi beer maatunwanbir ti wiir ke nwam na ponn ni la; ti ye lituln li nyuun sakpen na le ki tii mi.

⁵ Maajɔrk pu, le maabuun bur ki nu.

⁶ M gur boo la, m lir kookoo a; m wii le nwiin ti lir.

⁷ Nwon mɔmɔk ton sakpen la, le maa ki daa nkun.

⁸ Nwon mɔmɔk kpo, le m lir kookoo, nsui mɔmɔk bii a, le m ker iween aadun.

⁹ Uwumbɔr, aa nyi maah ban ni na; aa ŋun maadun mɔmɔk pu.

¹⁰ Mpobil gbaa la, le maapɔɔn mɔmɔk doo, le nnimbil aa ki waa chain.

¹¹ Maabuun pu, njɔtiib, ni binib bi koo gbɔk mi na aan ki duun ni mi; hali maachiln ni yaab gur daa mi la.

¹² Binib bi ban bi ku mi na pen mi gaawɔb mam la, le binib bi ban bi tii mi titotonn na pɔɔni bibaa ke bi doo mi; n‑yoonn mɔmɔk bi kpokl ban mi la.

¹³ M gur naahn utafakpaa la, le kaa ki ŋun, ki naahn ubir kaa ki ŋmaa len.

¹⁴ M bi ke uja u kaa ŋun, kaa gar na la.

¹⁵ Uwumbɔr, le m tii sin ma naadii. Ndindaan Uwumbɔr, le sin ma ga gar mi.

¹⁶ Taa cha maadim aasui piir maasuubiin pu; taa cha bi li kpa kipupuk maalirm pu.

¹⁷ Nwon wu n‑yoonn mɔmɔk la, le m ban m lir.

¹⁸ M kpiir maatunwanbir ti tii mi nsuubiin na la.

¹⁹ Maadim kpa laafee le ki pɔɔ; binib pam le nan mi fam.

²⁰ Binib bi joo mbiin pa tiŋann na bii maayimbil buyoonn m pɔɔni mbaa ke m li ŋani ni ŋan na.

²¹ Uwumbɔr, taa siir cha mi; Maawumbɔr, taa li daa mi.

²² Uwumbɔr u gaal mi lir na, ter mi dandana wee.