Ilahn 35 - Uwumbɔr aagbaŋ

Limeel li ban nterm na

¹ Uwumbɔr, kpak binib bi kpak mi na, ki jan binib bi tak mi na kijaak.

² Yoor saajaak aapeln ni libɔkul ki dan nan gaa mi lii.

³ Yoor saakpaatuŋ ni kichɔk ki kiir binib bi san dii mi na. Bui mi ke aa ga gaa mi lii.

⁴ Nyaŋ binib bi pɔɔni bibaa ke bi ku mi na ki jinn bi inimɔɔn. Cha binib bi kpokl m pu na aalan ŋmal, aan bi fenn bipuwɔb.

⁵ Uwumbɔr aatuun aah san dii bi pu na, Cha bi li bi ke kimook ki libuln daar joo cha na,

⁶ Uwumbɔr aatuun aah gbaa bi lir pu na, cha baasan li bɔɔn ki ŋar.

⁷ Maa ŋa bi nibaa, le bi tee pen mi gaawɔb, ki gbii libuul li nyoo na bil mi.

⁸ Le mbiin ga pii bi n‑yoonn mu baa nyi mubɔr na; bibaa aagaawɔb le ga chur bi, le bi lir ki kuln.

⁹ Le Uwumbɔr pu, nsui ga piir; waah gaa mi lii pu na, le m ga li kpa mpopiin.

¹⁰ M ga di nsui mɔmɔk bui Uwumbɔr ke, “Ubaa aa ki bi ke sin na. Aa kii bigiim, binib bi pɔɔ na chee, ki kii bifalaadam binib bi muk bi na chee.”

¹¹ Titunwanbirdam mɔnn inyamɔn paani mi, ki galni mi taani u pu maa nyi na.

¹² Bi joo mbiin le pa mi maaŋann pu, le nsuubiin joo mi sunni cha taab.

¹³ Le baah nan bun na, maa nan kpa mpopiin, le ki yii tijikaar; m nan tim n‑yil taab le ki mee Uwumbɔr bi pu,

¹⁴ ke maah ba ga mee pu tii njɔ, bee nna aabo na. M nan chuun tii n‑yil le ki wii ikpowiil, ke unii aana aah kpo kan, u wii likpuul pu na.

¹⁵ Le mma aah nan bi tibɔr ni na, bisui piir, le bi kuun ke bi ŋa mi mbɔnyun; biwɔwɔm gbaa mi, ki ki gbaa mi.

¹⁶ Bi laa mi ki saan mi la, kinanaŋ pu le bi ŋmɔ ŋinyin m pu.

¹⁷ Uwumbɔr, aa ga li ka lik kina ki ti saa bayoonn? Nyan mi baah tak mi pu na ni; gaa maamɔfal ichinn yee chee lii.

¹⁸ Le m ga doon si saanib mɔmɔk aah kuun nin chee na, m ga pak si bi mɔmɔk aanimbil ni.

¹⁹ Taa cha maadim aasui piir maalirm pu; bi ye binyamɔndam la. Taa cha binib bi nan mi fam na laa mi, maasuubiin pu.

²⁰ Baabɔlen aa ŋan, le bi mɔnn inyamɔn mɔk aabɔŋ paani binib bi gee nsuudoon aabɔr na.

²¹ Bi galni mi, ki tar ke, “Ti kan saah tun pu na.”

²² Uwumbɔr, le aa kan ni. Uwumbɔr, kina pu na, taa li ŋmin; taa li daa m chee.

²³ Uwumbɔr, fii sil, ki sil mpuwɔb; Maawumbɔr, fii sil, ki len maabɔr tii mi.

²⁴ Uwumbɔr, aa ji binib tibɔr mbamɔm la, kina pu na, bui ke maabɔr ŋan; taa cha maadim aasui piir maafalaa pu.

²⁵ Taa cha bi bui bibaa ke, “Ti doo u a, taah ban pu na le na.”

²⁶ Cha binib bi aasui piir maafalaa pu na aalan ŋmal aan bi lir kookoo; Cha binib bi len ke bi soor mi na kpaln inimɔɔn aanib.

²⁷ Cha binib bi ban ke bi kan ke m nyan tibɔr ni na li tar mpopiin pu ki len, ki ki gir len ke, “Uwumbɔr aapɔɔn nyaŋ a. Usui piir waatutunn aah kan linyaŋ pu na pu.”

²⁸ Le m ga moon saatunyaan aabɔr ki li pak si nwiin ni mu aalirm.