Ilahn 109 - Uwumbɔr aagbaŋ

Uja u bi limukl ni na aabɔr

¹ Uwumbɔr, m pak si la, taa li ŋmin.

² Bibiindam ni binyamɔndam tak mi la, bi gee inyamɔn paani mi la,

³ le ki len tibɔr ti kaa ŋan na m pu; maa nyi tiwan ni pu bi tak mi na.

⁴ M gee bi, ki mee Uwumbɔr tii bi, le baa lik waa kina, ki galn mi.

⁵ Bi joo mbiin le pa mi maaŋann pu, ki joo kinanaŋ pa mi maah gee bi pu na.

⁶ Nyan ubeebeedaan ubaa aan u ji maadin tibɔr, ki cha waadin ubaa galn u.

⁷ Cha bi ji u tibɔr ki len ke waabɔr bii; cha waameel li ye tibɔbir aa chee.

⁸ Cha waamɔfal kuln dandana; cha uja uken gaa waatuln.

⁹ Cha waabim kpaln nkpobim, ki cha upuu kpaln ukpopii.

¹⁰ Cha waabim kpaln biwanmeeb bi kaa kpa do na; Cha bi jenn nyan bi baah koo tilangbenn ti ponn ni na.

¹¹ Cha waah joo binib bi aapɔln na gaa waawangol mɔmɔk, ki cha biwɔwɔm gaa waah tun ki kan tiwan ni mɔmɔk na.

¹² Taa cha ubaa li kpa u pu tiŋann, ki taa cha ubaa kpiin waakpobim bi gaar puwɔb na.

¹³ Cha uyaabitiib mɔmɔk kpo, ki cha n‑yoonn mu choo na yaab suln waayimbil bɔr.

¹⁴ Uwumbɔr, teer uyaajatiib aatunwanbir bɔr, ki taa cha una aatunwanbir pinn u kpala.

¹⁵ Cha Uwumbɔr li teer baatunwanbir bɔr n‑yoonn mɔmɔk, ki tee cha ubaa taa ki teer bima bɔr kpala.

¹⁶ Uja ngbaan aa dakl daalbaadaal ke u ŋa binib tiŋann; u nan muk binib le ki ku bigiim ni bifalaadam, ni binib bi kaa kpa nterm na.

¹⁷ U nan gee timɔpur, kina pu na, cha bi puun timɔpur lii u pu. Waa nan gee ke u mee Uwumbɔr aanyoor ŋa ubaa pu, kina pu na, ubaa mu taa mee Uwumbɔr aanyoor ŋa u pu.

¹⁸ U nan puuni timɔpur ke waah peeni tiwan pu na la; cha ubaa aamɔpur gir ni u pu ke nnyun aah sɔŋni tiwan pu na, ki koo waakpab ni ke nkpan na.

¹⁹ Cha ti biin u pu ke tiwanpeenkaan na, ki mann goln u ke waah buu ligbapapaln le na.

²⁰ Uwumbɔr, daa maadim bi len tibɔbir m pu na aatafal kina.

²¹ Ndindaan Uwumbɔr, tee ter mi ke saah nan puu ke aa ga ŋa pu na, ki gaa mi lii saageehm nyaan sakpem pu.

²² M ye ugiin le kaa kpa nibaa, maamuk ti dɔ nsui ni taab taab la.

²³ M bi ke kijook aajunjuŋ na la, le ki ban m wɔŋ; libuln daa mi buen ke unaaduun na la.

²⁴ Maah kaa ki ji tijikaar na, le ntaaŋaayil yɔl, m gur ye igban ni ikpab ŋmeen la,

²⁵ Binib yaa kan mi kan, bi laa mi la, le ki ŋani mi mbɔnyun ki gbakr biyil.

²⁶ Ndindaan Uwumbɔr, ter mi; saageehm mu bi n‑yoonn mɔmɔk na pu, gaa mi lii,

²⁷ Cha maadim bee ke sin le gaal mi lir.

²⁸ Bi ga li puuni timɔpur lir m pu, le aa ma ga li ŋani saanyoor ŋani m pu. Cha binib bi muk mi na lir, ki cha min, saatutunn, kan mpopiin.

²⁹ Cha maadim kpaln inimɔɔn aanib; cha inimɔɔn li ye baawanpeenkaan.

³⁰ M ga doon Uwumbɔr mpɔɔn pu; m ga pak u binib aah kuun nin chee na,

³¹ ba pu? uma le kii ugiin ki gaal u binib bi siin ke bi ku u na chee lir.