Ikaal 6 - Uwumbɔr aagbaŋ

Nkaal kpaan

¹ “Ikaal imina le Nidindaan Uwumbɔr nan bui mi, ke m di i mɔk nimi. Naah chaa koo kitiŋ ki ponn ni, ke ni ti li bi nima na, ni ti li joo i mbamɔm.

² Nimi ni niyaabitiib aah ga li bi limɔfal ni ki ti saa n‑yoonn mu na, ni li pak Nidindaan Uwumbɔr ki li joo waakaal i m di mɔk nimi na mbamɔm, aan ki yunn kitiŋ ngbaan ni.

³ Nimi Israel yaab, li pel maah ban m di i mɔk nimi pu na, ki li joo i mbamɔm. Le tiwan mɔmɔk ga li ŋan tii nimi, le ni ga ŋa litimbokpaan, ki li koo kitiŋ ki kpa tiwakor aamoŋmɔpaan ni ŋisubil sakpen na ni, ke Uwumbɔr u ye tiyaajatiib Aawumbɔr na aah nan puu pu na.

⁴ “Israel yaab, teer man tibɔr tee. Tidindaan Uwumbɔr le ye timi Aawumbɔr. Ubaa aa ki bi.

⁵ Ni li gee Nidindaan Uwumbɔr nimi aasui mɔmɔk ni, ni nimi aawiin mɔmɔk, ni nimi aapɔɔn mɔmɔk.

⁶ Ni taa suln ikaal i m joo tuk nimi din wee na bɔr.

⁷ Ni di i mɔk nimi aabim. Ni yaa ka linampal, bee ni yaa nyan buen nsan, bee ni yaa ka fuur, bee ni yaa bi tun lituln kan, ni li len yaabɔr.

⁸ Ni di i gbin niŋaal pu, ki ŋmee i paan niyigbeer pu, aan ni li teer nimi.

⁹ Ni ŋmee i paan nimi aadir aabisamɔi pu, ni nimi aatiŋ aagon aabisamɔi pu.

Limɔyiir aasurm

¹⁰ “Nidindaan Uwumbɔr aah nan puu tipuur ti tii niyaajatiib Abraham, ni Aisak, ni Jakob pu na, u ga di kitiŋ ki kpa ntisakpem mu wiir, ki kpa liwangol, aan naa maa mu nibaa na, tii nimi.

¹¹ Ŋidichal ga li gbii tiwanyaan ni nimi nibaa aa di ŋa ŋi ponn ni na, inyunbun mu bi nima, ni mu aa ye nimi le gbii i, le ŋisubil aasui, ni olif aakpan aasui aasar ti nimi nibaa aa kon, kaa bun ti na, mu ga li bi nima. N‑yoonn mu Uwumbɔr ti di kitiŋ ngbaan tii nimi, aan ni kpa tijikaar ki ji babr na kan,

¹² ni li nyi ki taa suln Uwumbɔr u nyan nimi Ijipt yaab aaŋaal ni na, nin chee ni nan ye binaagbiib na, aabɔr.

¹³ Ni li pak Nidindaan Uwumbɔr, ki li dooni uma baanja, aan ki li puur nimi aapuur waayimbil baanja pu.

¹⁴ Ni taa ki doon liwaal libaa; ni taa doon binib bi mann goln nima na aawaal libaa.

¹⁵ Ni yaa dooni ŋiwaa kan, Uwumbɔr aaŋuul ga dan ni pu ke mmii na, ki nan kuln nimi kookoo, ba pu? Nidindaan Uwumbɔr u bi ni chee na aa ban ke waanib ki li dooni nibaa ki kpee u pu.

¹⁶ “Ni taa tɔŋ Nidindaan Uwumbɔr ke naah nan ŋa pu Masa aatiŋ ni na.

¹⁷ Ni li nyi ki li joo ikaal imɔk u di tii nimi na.

¹⁸ Uwumbɔr aah len ke ni li bi mbimbinyaan mu ni na, ni li ŋani kina man, le tiwan mɔmɔk ga li ŋan tii nimi. Nima le ga ŋmaa cha ni gaa kitinyanyaan ki Uwumbɔr nan puu ke u ga di tii niyaajatiib na.

¹⁹ Waah nan puu pu na, ni ga jenn nyan nimi aadim.

²⁰ “N‑yoonn mu choo na, nimi aabim yaa nan baa nimi ke, ‘Ba ŋa Tidindaan Uwumbɔr bui ke ti li joo waakaal ngbaan mɔmɔk kina?’ kan,

²¹ ni tuk bi ke, ‘Ti nan ye binaagbiib le ki bi Ijipt aabɔr aaŋaal ni, le Uwumbɔr di waapɔɔn sakpiin na nyan ni timi.

²² Tinimbil ni, le ti kan u ŋa iwaan, ni ijawaan aawan, ki daa Ijipt yaab, ni baabɔr, ni waayidam mɔmɔk aatafal.

²³ Uma le nyan ni timi Ijipt aatiŋ ni, ki tii timi lifuur, le ki joo ni timi do chee na; ki nan di kitiŋ kee tii timi, waah nan puu tipuur pu tii tiyaajatiib na.

²⁴ Uma Tidindaan Uwumbɔr bui timi ke ti li joo waakaal ngbaan mɔmɔk mbamɔm, ki li pak u, ke ti yaa ŋa kina kan, u ga li kii timi aatimbol, aan ki cha li li kpa tiwan mɔmɔk,

²⁵ ke ti yaa joo waakaal mɔmɔk mbamɔm, waah tuk timi pu na kan, usui ga li piin ti pu.’