Ikaal 4 - Uwumbɔr aagbaŋ

Moses aah nan sur Israel yaab ke bi li kpa limɔkiir pu na aabɔr

¹ Moses nan bui Israel yaab ke, “Ni pɔɔn nibaa ki kii tii ikaal i m bi mɔk nimi na, nima le ga cha ni li bi, ki ti gaa kitiŋ ki Uwumbɔr, u ye niyaajatiib Aawumbɔr na, ban u di tii nimi na.

² Ni taa di nibaa kpee ikaal ngbaan ni, ki taa nyan nibaa i ni. Ni kii tii Nidindaan Uwumbɔr aakaal i m joo tuk nimi na mbamɔm.

³ Ninimbigbaŋ kan Uwumbɔr aah nan ŋa pu Peor Aajool chee na. U nan kuln unii umɔk nan dooni liwaal Baal na;

⁴ le nimi bi nan dii Nidindaan Uwumbɔr na ma laa beenin bi limɔfal ni, ki nan saa din.

⁵ “M di ikaal ngbaan mɔmɔk mɔk nimi, ke Ndindaan Uwumbɔr aah bui mi ke m ŋa pu na. Ni yaa ti gaa kitiŋ ngbaan ki koo nima kan, ni li joo ikaal ngbaan mbamɔm.

⁶ Ni li joo i mbamɔm, le ŋinibol ŋiken ga kan naah kpa nlan pu na. Le bi yaa ŋun ikaal ngbaan aabɔr kan, bi ga bui ke, ‘Ba aalanboln, ni nnyim, linibokpaan limina kpa kina.’

⁷ “Linibokpaan liken aa bi ki kpa laawaa li bi bi chee baamukl ni ke Tidindaan Uwumbɔr aah bi ti chee pu na. Ti yaa bi limukl ni ki yin u kan, see u ter timi.

⁸ Linibokpaan liken aa bi ki kpa ikaal i ŋan ke maah di i mɔk nimi din wee na.

⁹ Ni li kii nibaa man. Ni yaa bi limɔfal ni ki ti saa buyoonn na kan, ni taa suln ninimbigbaŋ aah kan tiwan ni Uwumbɔr ŋa na. Ni tuk nimi aabim, ni niyaabitiib,

¹⁰ tiwan ni nan ŋa, bundaln ni nan sil Nidindaan Uwumbɔr aanimbiin ni, Sainai Aajool taab na. N‑yoonn ngbaan, u nan bui mi ke, ‘Kuun ni maanib ngbaan. M ban bi ŋun maah ga len pu na la, nima kan, bi ga li nyi baah ga kii maamɔb pu, ki ti saa baamɔfal aadoon na. Nima kan, bi ga mɔk baabim, aan bi mu li san mi ijawaan.’

¹¹ “Tuk nimi aabim naah nan sil lijool ngbaan aataab aan iŋmanyuu i bɔn sakpen na biin li pu, le mmii gaal ki fii ti pii kitaapaak pu na.

¹² Ni ki tuk bi Uwumbɔr aah nan len tibɔr mmii ngbaan ponn ni pu na; ni ŋun waah len pu na, ki mu aa waa waah bi pu na.

¹³ U nan tuk nimi naah ga ŋa pu aan ki li joo waah nan puu tipuur ti tii nimi na pu na; ke ni pɔɔn nibaa ki kii tii ikaal kipiik i u nan ŋmee paan ŋitakpal ŋilee pu na.

¹⁴ Uwumbɔr nan tuk mi ke m di ikaal ngbaan mɔmɔk mɔk nimi, aan ni li joo i mbamɔm, kitiŋ ki ni ban ni ti gaa ki koo ki ponn ni na.

Moses nan sur binib ngbaan ŋiwaa aabɔr pu

¹⁵ “N‑yoonn mu Uwumbɔr nan len ni chee tibɔr, mmii ni, Sainai Aajool pu na, naa nan waa u. Ni yaa ban ke ni li ŋan tii nimi kan, ni chuu nibaa

¹⁶ ki taa tun titunwanbir ke ni di tiwan nibaa ŋa liwaal tii nibaa, aan ni li naahn upii, bee uja,

¹⁷ bee ki di naŋ tiwakor, bee unyoon,

¹⁸ bee tiwanbaarkaan, bee ujan.

¹⁹ Ni taa cha nibaa tɔŋ nimi aan ni li dooni tiwan ni ni waa kitaapaak, ni ye nwiin, ni uŋmal, ni iŋmabi na. Nidindaan Uwumbɔr le di tiwan nimina mɔmɔk tii binib bi mɔmɔk bi dulnyaa wee ni na.

²⁰ Nimi ma kan, uma le nyan nimi Ijipt yaab aamuk ni. U nyan ni nimi ke u di nimi ŋa waanib, ke naah ye waanib din wee pu na.

²¹ Nimi pu le Nidindaan Uwumbɔr aaŋuul nan fii m pu, le u puu ke waan cha m puur Jɔɔdann Aamɔɔl ki koo kitinyanyaan ki u ban u di tii nimi na ni.

²² Mma kan, m ga kpo kitiŋ kee ni, kaan puur limɔɔl ngbaan daalbaadaal. Le ni ma ban ni puur ki ti gaa kitinyanyaan ngbaan.

²³ Ni pɔɔn nibaa, ki taa suln tipuur ti Nidindaan Uwumbɔr nan puu tii nimi na. Ni kii waamɔb, ki taa naan liwaal libaa tii nibaa.

²⁴ Ba pu? Nidindaan Uwumbɔr bi ke mmiigaal na la, le kaa ban ke unibɔn ki dii tiwan nibaa ki kpee u pu.

²⁵ “Hali ni yaa bi kitiŋ ngbaan ni ki ti saa n‑yoonn mu na, ki ma mbim ni yaabitiib kan, ni taa tun titunwanbir ki naan liwaal, ki di naŋ tiwan nibaa. Kina aatun aa ŋan Uwumbɔr chee, le ki ga cha u gee liŋuul ni pu.

²⁶ Ni yaa yii maah tuk nimi pu na kan, paacham ni kitiŋ le ye maaseeraadam din wee, ni ga kpo doo kitiŋ ngbaan pu. Le kina aan cha ni li bi ki yunn, naah ban ni puur Jɔɔdann Aamɔɔl ki ti gaa kitiŋ ki na ni. U ga kuln nimi doo.

²⁷ Uwumbɔr ga cha ni yaa buen ŋinibol yayan aatim ni, le nimi siib kina le ga ti gur ki ŋmar.

²⁸ Nima chee le ni ga ti li dooni unibɔn aah di uŋaal ŋa idɔ ni ŋitakpal aawaa ŋi na. Ŋiwaa ngbaan aa waa, kaa ŋun, kaa ŋmaa ji, kaa ŋun nnun.

²⁹ Nima chee le ni ga lik ki ban Nidindaan Uwumbɔr, le ni yaa di nisui mɔmɔk ban u kan, ni ga kan u.

³⁰ N‑yoonn mu ni ti kan limukl, aan tiwanbir ngbaan mɔmɔk pii nimi na, le ni ga fenn ban Uwumbɔr ki kii tii u.

³¹ Uma le ye Uwumbɔr u kpa linimbaasaln na. Waan di nimi lii, ki mu aan kuln nimi doo, waan suln tipuur ti u nan puu tii niyaajatiib na.

³² “Ni baa n‑yoonn mu jer na aabɔr, n‑yoonn mu jer aan bi nin ma nimi na, buyoonn Uwumbɔr nan naan unibɔn dulnyaa wee ni na ki ti saa dandana na aabɔr. Ni baa dulnyaa aapepel mɔmɔk ni. Tiwansakpenn kina aaboln kee ŋa aa? Unii ubaa kee ŋun tiwan kina aaboln pu uu?

³³ Binib bibaa kee ŋun Uwumbɔr len tibɔr mmiigaal ni kina, ki beenin fu uu?

³⁴ Liwaal libaa kee buen litimbol yayan ni, ki ti nyan ni binib, ki di bi ŋa laanib, ke Nidindaan Uwumbɔr aah ŋa nimi pu Ijipt aatiŋ ni pu na aa? Ninimbil ni, le u nan di waapɔɔn sakpiin tun, ki joo ni iween, ni butɔb, ki ŋa iwaan, ni lijinjiir aatun, ki cha ijawaan aawan ŋa.

³⁵ Uwumbɔr ubaa le mɔk nimi kina, ke u kpiir mɔk nimi ke uma Uwumbɔr baan baanja le bi, ubaa aa ki bi ki kpee u pu.

³⁶ U nan cha ni ŋun waaneel pu paacham, ke u mɔk nimi tiwan, ki cha ni kan waamii mu bi chain na dulnyaa wee ni, le u len ni chee tibɔr, mmii ngbaan ponn ni.

³⁷ Waah gee niyaajatiib pu na, le u lee nimi, ki di waapɔɔn sakpiin na nyan ni nimi Ijipt aatiŋ ni.

³⁸ Naah tur koo binib ngbaan ponn ni na, le u nyaŋni ŋinibol ŋi kpa mpɔɔn jer nimi na, ke u di baatim tii nimi, le kitiŋ ngbaan laa beenin ye nimi yaan ki nan saa din wee.

³⁹ Nima pu na, teer din wee man, ki taa suln kpala ke Uwumbɔr le ye Uwumbɔr u joo paacham ni kitiŋ kee na. Uwumbɔr uken aa ki bi.

⁴⁰ Ni li joo waakaal imɔk m di tuk nimi din wee na, le tiwan mɔmɔk ga li bi mbamɔm tii nimi, ni niyaabitiib. Nima kan, ni ga li bi kitiŋ ki Nidindaan Uwumbɔr ga di tii nimi na pu, ki li ye nimi yaan ki cha n‑yoonn mu kaa kpa ndoon na.”

Mbɔbɔryaan aatim mu bi Jɔɔdann aawipuul wɔb na aabɔr

⁴¹ Moses nan nyan ntim mutaa Jɔɔdann aamɔɔl aawipuul wɔb siin,

⁴² ke unii yaa peln ku uken kaa nyi kan, u san buen nima chee ki ŋmar. U yaa san buen ntim ngbaan kibaa ponn ni kan, baan ki ku u.

⁴³ Moses nan nyan Beser aatiŋ ki bi nteersakpiin aajool li bi taar na pu le siin Rubenn aamaal yaab; le ki nyan Ramof aatiŋ ki bi Gilead aapepel ni na siin Gad aamaal yaab; ki nyan Golann aatiŋ ki bi Basann aapepel ni na siin Manase aamaal yaab.

Moses aah nan piin ki mɔk bi Uwumbɔr Aakaal pu na

⁴⁴ Moses nan di Uwumbɔr aakaal, ni waamɔkm, tuk Israel aanib ngbaan.

^45-46 Baah nan nyan ni Ijipt aatiŋ ni, ki nan fuu Jɔɔdann Aamɔɔl, liwipuul wɔb, kifataŋ ki dɔ tok Bef Peor aatiŋ na aapuwɔb, le u nan di ikaal ngbaan mɔk bi. Ni nan ye Amor yaab aabɔr u bi nan yin u ke Sihonn na aapepel ni la, uma le nan bi Hesbonn aatiŋ ni ki joo waanib. Moses ni Israel yaab aah nan nyan ni Ijipt buyoonn na, le bi nan nyaŋ u.

⁴⁷ Bi nan gaa waatiŋ ngbaan, ki kpee ubɔr Og u nan joo Basann aatiŋ na, u mu nan ye Amor yaab aabɔr, le ki bi Jɔɔdann aawipuul wɔb.

⁴⁸ Kitiŋ ngbaan nan yoor kina le ki ti ker Aroer aatiŋ ki bi Anonn Aamɔɔl aagbaan na, le ki yoor kina ti saa Sirionn Aajool chee, ŋŋangan wɔb, bi nan ki yin lijool ngbaan ke Hemonn la.

⁴⁹ Kitiŋ ngbaan nan ki bi Jɔɔdann Aamɔɔl liwipuul wɔb aapepel ni la, le ki yoor kina ti ker N‑yaan Aanyusakpem aaŋangii wɔb, ki dii kina ti saa Pisga Aajool aataab, liwipuul wɔb.