Ikaal 29 - Uwumbɔr aagbaŋ

Uwumbɔr aah nan ki puu tipuur tii Israel yaab pu na aabɔr

¹ Tipuur timina le Uwumbɔr nan bui Moses ke uma Uwumbɔr puu tii Israel yaab, Moab yaab aatiŋ ni. Tipuur timina le nan ki kpee tipuur ti Uwumbɔr nan puu tii bi Sainai Aajool chee na pu.

² Moses nan kuun Israel aanib ngbaan mɔmɔk le ki bui bi ke, “Nimi nibaa aanimbil nan kan Uwumbɔr aah nan ŋa Ijipt yaab aabɔr, ni waatutum, ni waatiŋ mɔmɔk pu na.

³ Ninimbil nan kan iween i ku binib na, ni lijinjiir aatuln, ni laasib aawan nimɔk Uwumbɔr nan ŋa na.

⁴ Tɔ, ki yoor ki nan saa din wee na, waa cha ni bee naah nan kan tiwan nimɔk na aatataa.

⁵ Ŋibin imonko ilee le Uwumbɔr nan loln ni pu nsan, nteersakpiin ni, le nimi aawanpeenkaan ni ŋinaatak aa nan kpoi.

⁶ Le naa kan boroboro ni ŋmɔ, ki mu aa kan ŋisubil aadaan ni nyu, le Uwumbɔr nan tii nimi naah ban pu na; u mɔk nimi ke uma le ye nimi Aawumbɔr.

⁷ Le taah fuu ni do chee na, Ubɔr Sihonn u nan koo Hesbonn aatiŋ ni na, ni Basann yaab aabɔr u bi nan yin u ke Og na, nyan ni ki nan tak timi.

⁸ Le ti nan nyaŋ bi, ki gaa baatim, le ki yakr baatim ngbaan tii Rubenn aanibol, ni Gad aanibol, ni Manase aanibol ligeln.

⁹ Ni li joo tipuur tee aah mɔk nimi pu na mbamɔm, nima kan, ni ga ŋmaa nyaŋ nimi aatuln mɔmɔk.

¹⁰ “Din wee na, ni mɔmɔk, bi ye biyidam, ni bininkpiib, ni bijab,

¹¹ ni bipiib, ni mbim, ni biwɔwɔm bi koo ni chee ki peei idɔ ki lu nnyun tii nimi na, ni si Nidindaan Uwumbɔr aanimbiin ni la.

¹² Din wee, ni mɔmɔk si do ke ni kii tii Nidindaan Uwumbɔr aah ban u puu tipuur ti tii nimi na la, aan ki gaa ti.

¹³ Nima kan, Uwumbɔr ga len mbamɔn ke ni ye waanib, le u mu ye nimi Aawumbɔr, ke waah nan puu tii niyaajatiib Abraham, ni Aisak, ni Jakob pu na.

¹⁴ Naa ye nimi baanja le Uwumbɔr ban u puu tipuur ngbaan tii ke ni li joo ti,

¹⁵ u ban u puu ti tii ti mɔmɔk bi si unimbiin ni do, din wee na, ki kpee tiyaabitiib bi bi taa kee ma bi na mu la.

¹⁶ “Ni teer naah nan koo Ijipt aatiŋ ni, ni bi nimi pu na, ki chuun dii ŋinibol ŋiken aatim ponn ni aan ni bi pu na.

¹⁷ Ni nan kan baawaawanbir ŋi bi di idɔ, ni ŋitakpal, ni tikunabr, ni salmaa ŋa ŋi na.

¹⁸ Ni pɔɔn nibaa ki taa cha uja, bee upii, bee mmaal, bee linibol li si do din wee na fenn bipuwɔb tii Tidindaan Uwumbɔr ki dooni ŋinibol ngbaan aawaa. Ni yaa ŋa kina kan, ni ga li bi ke ulɔnn yaa punn idi ni kan, u ku i pu na la.

¹⁹ Ni mɔmɔk ubaa taa ŋmann ubaa ke naah si do din wee ki ŋun tipuur tee na, u ki pɔɔn usui, ki fenn dii ubaa aasan, ki bui ubaa ke nibaa aan ŋa u. Waabimbin ga bii ni mɔmɔk, bi ŋan na, ni bi kaa ŋan na doo.

²⁰ Le Uwumbɔr aan di cha pinn udaan ngbaan. Waaŋuul ga fii u pu ke mmiigaal na, le tibɔbir ti mɔmɔk bi kigbaŋ kimina ni na ga lir udaan pu, le Uwumbɔr ga kuln u doo.

²¹ Uwumbɔr aah ga ŋa u pu na ga li ye limɔkl, ke Israel yaab aanibol mɔmɔk kan, le tibɔbir timɔk bi tipuur ti ŋmee ki bi Uwumbɔr Aagbaŋ ponn ni na, lir u pu.

²² “Niyaabitiib bi ga paa ni nipuwɔb na, ni biwɔwɔm bi nyan ntim mu daa na ni na, ga nan kan tibɔbir ni falaa u Uwumbɔr di lii nimi aatiŋ pu na.

²³ Ikpaakon ga kpaln chirbil ni n‑yaan ŋmeen, ubaa aan ŋmaa bu tiwan nibaa ni punn, le timoor mu aan ŋmaa punn. Nima aatiŋ ngbaan ga li bi ke Sodom ni Gomora aatim, ni Adma, ni Seboyim aatim mu Uwumbɔr nan bii mu na la, n‑yoonn mu usui nan fii bi pu sakpen na, le u kuln mu.

²⁴ Le dulnyaa aanib mɔmɔk ga baa ke, ‘Ba ŋa Uwumbɔr ŋa baatiŋ ngbaan kina? Ba ŋa waaŋuul nan fii bi pu sakpen aan u ŋa bi kina?’

²⁵ Le naatataa ga li ye ke, ‘Binib ngbaan bii tipuur ti Uwumbɔr u ye biyaajatiib Aawumbɔr na nan puu tii bi, buyoonn u nan nyan ni bi Ijipt ni na la.

²⁶ Bi nan fenn le ki dooni ŋiwaa ŋi baa nan nyi ŋi na. Uwumbɔr nan bui bi ke bi taa doon ŋiwaa.

²⁷ Nima pu le Uwumbɔr aaŋuul fii bi pu, le ki cha ntafadaan mumɔk bi waagbaŋ ni na dan bi pu.

²⁸ Uwumbɔr aaŋuul nan fii bi pu sakpen, le liŋuusakpeln ngbaan ponn ni, u chuu nyan bi baatiŋ ni, ki di bi buen biwɔwɔm aatim ni, le bi bi nima chee din wee.’

²⁹ “Tiwan ngem bi, le Tidindaan Uwumbɔr di ni bɔr, kaa cha ti nyi ni. Le u tee kpiir Waakaal mɔk timi, ni ŋan ke ti ni timi aabim kii waamɔb, ki li joo i mbamɔm, ki cha n‑yoonn mu kaa kpa ndoon na.