Ikaal 27 - Uwumbɔr aagbaŋ

Ŋitakpal ŋi bi ga ŋmee Uwumbɔr Aakaal ŋi pu na aabɔr

¹ Moses ni Israel yaab aayidam nan bui binib ngbaan ke, “Ni li ŋani maah tuk nimi din wee pu na mɔmɔk.

² Bundaal ni puur Jɔɔdann Aamɔɔl doo, aan ki koo kitiŋ ki Nidindaan Uwumbɔr ban u di tii nimi na ni kan, ni ban ŋitakpal ŋi gbei na ŋibaa, ki di ŋi ŋum aan ki pɔ biin ŋi pu,

³ ki ŋmee ikaal ni mmɔkm mumina mɔmɔk ŋi pu. Buyoonn ni ti koo kitiŋ ki kpa tiwakor aamoŋmɔpaan ni ŋisubil sakpen na ki Uwumbɔr, u ye niyaajatiib Aawumbɔr na, nan puu tipuur ke u ga di tii nimi na ni,

⁴ ki yaa ti bi Jɔɔdann Aamɔɔl lipepel liken na wɔb kan, ni di ŋitakpal ngbaan ŋum Ebal Aajool pu, ke maah tuk nimi din wee pu na, aan ki pɔ biin ŋi pu.

⁵ Ni ki ban ŋitakpal ŋi baa di tikur aawan nibaa kpii ŋi na, ki maa kitork aabimbiln,

⁶ ba pu? kitork aabimbiln li ni ban ni maa tii Nidindaan Uwumbɔr na kan, ni taa di tikur aawan nibaa kpii ŋitakpal ngbaan. Ni di kitork ki ni joo seer mmii ni na toor li pu,

⁷ ki toor kitork, ki kpaan tɔb chee ki ji kimɔbaan aatork, ki doon Nidindaan Uwumbɔr, unimbiin ni.

⁸ Ni ŋmee Uwumbɔr aakaal mɔmɔk, ni li waa chain, ŋitakpal ŋi ni ŋum na pu.”

⁹ Moses ni Liifai yaab aatotoorb na kpaan le ki bui Israel yaab ke, “Israel yaab, ni mɔmɔk ŋmin chii man, ki li pel m wɔb man. Din wee na, ni ŋa Nidindaan Uwumbɔr aanib la;

¹⁰ nima pu na, ni kii tii u ki li joo waakaal imɔk m di tuk nimi din wee na.”

Limɔyiir aatafadaan

¹¹ Moses nan ki bui Israel aanib ngbaan ke,

¹² “Ni yaa puur Jɔɔdann Aamɔɔl doo kan, ŋinibol ŋimina sil Gerisim Aajool paacham aan ni len tinyoor aabɔr tee lii Israel yaab pu. Ŋinibol ngbaan sɔ: Simeonn, ni Liifai, ni Juda, ni Isakar, ni Josef, ni Benjaminn aanibol.

¹³ Le ŋinibol ŋimina mu ga sil Ebal Aajool paab aan ni len imɔpuur aabɔr tee. Ŋinibol ngbaan sɔ: Rubenn, ni Gad, ni Aser, ni Sebulunn, ni Dann, ni Naftali aanibol.

¹⁴ Liifai yaab le ga sil ki len tibɔr ngbaan mpɔɔn pu. Tibɔr ngbaan sɔ:

¹⁵ “‘Uwumbɔr aamɔpuur bi unii umɔk di litakpal, bee ndɔ, bee tikur naan liwaal ki looni dooni li na pu. Uwumbɔr aa gee ŋiwaa kpala.’ “Le binib ngbaan ga kpaan ki kii ke, ‘Amii.’

¹⁶ “‘Uwumbɔr aamɔpuur bi unii umɔk lik seen ute bee una na pu.’ “Le binib ngbaan mɔmɔk ga kpaan ki kii ke, ‘Amii.’

¹⁷ “‘Uwumbɔr aamɔpuur bi unii umɔk chuu foor uŋeen aatɔ aapɔnja aatakpal ki di mpaan kpee ubaa na pu.’ “Le binib ngbaan mɔmɔk ga kpaan ki kii ke, ‘Amii.’

¹⁸ “‘Uwumbɔr aamɔpuur bi unii umɔk cha ujoon yenn nsan na pu.’ “Le binib ngbaan mɔmɔk ga kpaan ki kii ke, ‘Amii.’

¹⁹ “‘Uwumbɔr aamɔpuur bi unii umɔk cha biwɔwɔm, ni nkpobim, ni bikpopiib lann baabamɔn na pu.’ “Le binib ngbaan mɔmɔk ga kpaan ki kii ke, ‘Amii.’

²⁰ “‘Uwumbɔr aamɔpuur bi unii umɔk doon ute aapuu chee ki jinn ute inimɔɔn na pu.’ “Le binib ngbaan mɔmɔk ga kpaan ki kii ke, ‘Amii.’

²¹ “‘Uwumbɔr aamɔpuur bi unii umɔk doon kiwakork chee na pu.’ “Le binib ngbaan mɔmɔk ga kpaan ki kii ke, ‘Amii.’

²² “‘Uwumbɔr aamɔpuur bi unii umɔk doon uninkpan chee na pu.’ “Le binib ngbaan mɔmɔk ga kpaan ki kii ke, ‘Amii.’

²³ “‘Uwumbɔr aamɔpuur bi unii umɔk doon uchool upii chee na pu.’ “Le binib ngbaan mɔmɔk ga kpaan ki kii ke, ‘Amii.’

²⁴ “‘Uwumbɔr aamɔpuur bi unii umɔk loon ki ku unii na pu.’ “Le binib ngbaan mɔmɔk ga kpaan ki kii ke, ‘Amii.’

²⁵ “‘Uwumbɔr aamɔpuur bi unii umɔk loon gaa ŋimombil ki ku unii u kaa kpa taani na pu.’ “Le binib ngbaan mɔmɔk ga kpaan ki kii ke, ‘Amii.’

²⁶ “‘Uwumbɔr aamɔpuur bi unii umɔk yii, kaa joo Uwumbɔr aakaal ni waamɔkm mɔmɔk na pu.’ “Le binib ngbaan mɔmɔk ga kpaan ki kii ke, ‘Amii.’