Ikaal 22 - Uwumbɔr aagbaŋ

¹ “Ni yaa kan niŋeen aatɔ Israel aanii aanaa, bee upiih wɔŋ ki cha kan, taa cha u buen, chuu u ti tii uwandaan.

² Tɔ, uwakodaan aado yaa daa, aan saa nyi uwandaan kan, aa di u kun aado. Buyoonn uwandaan nan fuu ni, ki nan bee ke waawakork ye na kan, aa di waawan tii u.

³ Ni yaa ye ubon, bee tiwanpeenkaan, bee tiwan nimɔk aaŋeen aatɔ Israel aanii di wɔŋ na kan, ni ŋa kina.

⁴ “Aaŋeen aatɔ Israel aanii ubaa aabon, bee unaa yaa cha ki ti lir kitiŋ kan, aa taa siir cha u, ter uwandaan aan u fiin u siin.

⁵ “Bipiib taa peen bijab aawanpeenkaan, bijab mu taa peen bipiib aawan; Nidindaan Uwumbɔr aa gee binib bi ŋani kina na.

⁶ “Ni yaa chuun ki ti kan unyoon aadil busub paab, bee timoor ponn ni, aan unyoninkpel dɔ ŋijen, bee mbim pu kan, ni taa nyan ina ngbaan.

⁷ Ni ga ŋmaa nyan mbim, bee ŋijen, ki cha ina li cha, nima kan, ni ga kan tinyoor ki li kpa limɔfal li fɔk na.

⁸ “Aa yaa maa lidichapɔln kan, maa ligoln mann lipaacham. Nima kan, unii yaa nyan lipaab ki lir, ki kpo kan, saan li kpa taani ubaa.

⁹ “Aa yaa kon ŋisubil aasui kan, taa ki di tiwan nibaa bun ŋmal i ponn ni. Aa yaa ŋa kina kan, saasaak ngbaan mɔmɔk ga bii la.

¹⁰ “Ni taa di unaa ni ubon kpaan ke i ko.

¹¹ “Ni taa di ipiih aakokor aatan ni ŋitanyaan aatan kpaan ŋal tiwanpeenkaan ki di peen.

¹² “Ni di tikokonn ki di tuun tuun nimi aawanpeenkaan aamɔju inaa ngbaan mɔmɔk.

Lichamɔln aakaal aabɔr

¹³ “Nibaakan, uja ga yoor upii le ki nan ki bui n‑yoonn mubaa ke waa ki gee u.

¹⁴ Kina pu le u gii inyamɔn paan upii ngbaan, ki bii waayimbil, ki bui ke upii ngbaan nan nyi uja le u nin yoor u.

¹⁵ “Kina yaa ŋa kan, upii ngbaan aana ni ute di baah nan puen kpaan bundaal ki doon tiwandookaan ni pu na aakekeln li nsin nan gbaa li na ti mɔk kitiŋ ngbaan ni aayidam. Nima kan, bi ga bee ke upii ngbaan aa nan nyi uja le u nin yoor u.

¹⁶ Upii ngbaan aate ga bui biyidam ngbaan ke, ‘M di mbisal tii uja wee ke u di u ŋa upuu, le dandana wee, u bui ke waa ki gee u.

¹⁷ U bii waayimbil ki gii inyamɔn paan u, ki bui ke u nan nyi uja le u nin yoor u ki di ŋa upuu. Tɔ, tiwan nimina le mɔk ke waa nan nyi uja, baah nan puen kpaan bundaal na aawandookaan aakekeln le na, nsin le bi li pu na.’

¹⁸ Kitiŋ ngbaan ni aayidam chuu uja ngbaan ki gbaa u.

¹⁹ Bi cha u pa tikunabr aamombil kuruwaa ubaa, aan bi di ŋi tii upii ngbaan aate. Uja ngbaan aah ŋa kina na, u jinn Israel aapiibo ngbaan inimɔɔn la, ki bii waayimbil. Ni ki kpee na, ni cha u li beenin joo upii ngbaan ki ti saa waakundaal, u taa jenn u lii.

²⁰ “Tɔ, tibɔr ngbaan yaa gbii ke upii ngbaan nan nyi uja le uja ngbaan yoor u kan,

²¹ bi di u buen ute aadichal aanampal, aan kitiŋ ngbaan ni aajab mae ŋitakpal ku u. Upii ngbaan aah nan laa bi ute do ki bee uja aan ki nin kun tichar pu na, u jinn waanib Israel yaab inimɔɔn. Ni yaa ku u kan, ni ga nyan kina aatunwanbir aaboln nibaa chee.

²² “Ni yaa chuu uja, uŋeen aatɔ aapuu chee kan, ni ku bi mɔmɔk bilee. Ni yaa ŋa kina kan, ni ga nyan kina aatunwanbir aaboln nimi Israel yaab chee.

²³ “Ni yaa chuu uja ni usapɔɔn kitiŋ ni, ki nyi ke ubaa le ban u yoor u kan,

²⁴ ni nyan bi kitiŋ ngbaan aagbaan ki ti mae ŋitakpal ku bi. Ni ŋeer ke ni ku upiibo ngbaan, ba pu? u yii, kaa wii yin binib; u yaa ba wii kan, binib ba ga ŋun ki gaa u lii. Le uja mu ŋeer ke u kpo, ba pu? u doon upiibo u ubaa ban u yoor na chee. Ni yaa ku bi mɔmɔk bilee ngbaan kan, ni nyan kina aatunwanbir aaboln nibaa chee a.

²⁵ “Uja yaa chuu usapɔɔn u ban u kun tichar pu na mpɔɔn timoor ni, ki doon u chee kan, uja baanja le ŋeer ni ku u.

²⁶ Ni taa ŋa usapɔɔn ngbaan nibaa, ba pu? waa tun titunwanbir ti ŋeer nkun na. Tibɔr timina, ni uja yaa tak uken ki ku u kan, ni ye tibɔbaan la.

²⁷ Uja ngbaan aah chuu usapɔɔn ngbaan mpɔɔn timoor ni na, u wii yin binib, le ubaa aa ŋun u pu.

²⁸ “Uja yaa chuu usapɔɔn u kaa kpa uja na mpɔɔn ki doon u chee kan,

²⁹ ni cha uja ngbaan pa tikunabr aamombil piiŋmu ki tii usapɔɔn ngbaan aate, ki cha u yoor usapɔɔn ngbaan ŋa upuu, ba pu? u chuu u mpɔɔn le ki doon u chee. U li joo usapɔɔn ngbaan, u li ye upuu ki ti saa waakundaal, u taa jenn u lii.

³⁰ “Uja taa doon ute aapuu ubaa chee ki jinn ute inimɔɔn.