Ikaal 13 - Uwumbɔr aagbaŋ

¹ “Unii u bui ke u ye Uwumbɔr aabɔnabr na, bee unii u nyi tidaŋ aatataa na yaa puu tipuur tii nimi ke u ga mɔk nimi lijinjiir aawan,

² ki ban ke u cha ni li dooni ŋiwaa kan, ni taa dii u. Hali waah puu tipuur ti na yaa ŋa kina kan,

³ ni taa kii tii u. Naa kee dii ŋiwaa ngbaan. Nidindaan Uwumbɔr ban ke u di unii ngbaan tɔŋ nimi ki lik ke ni gee u nisui mɔmɔk ni aan naa gee u.

⁴ Ni li dii Uwumbɔr aasan ki pak u. Ni ŋun tii u, ki li joo waakaal mɔmɔk; ni li dooni uma baanja, ki li ŋani waah len pu na n‑yoonn mɔmɔk.

⁵ Tɔ, ubɔnabr ngbaan, bee unii u nyi tidaŋ aatataa na yaa bui nimi ke ni yii Uwumbɔr u nan nyan ni nimi Ijipt yaab aatiŋ ni, nin chee ni nan ye binaagbiib na kan, ni ku u. Unii ngbaan aaboln ye mbiindaan la, le ki pɔɔni ubaa ke u nyan nimi Uwumbɔr aasan mu u tuk nimi ke ni li dii mu na ni. Ni ku udaan ngbaan, nima kan, ni ga gaa nibaa titunwanbir chee lii.

⁶ “Hali ni yaa ye aana aabo, bee aajapɔɔn, bee aabisal, bee aapuu u aa gee sakpen na, bee aajɔ u aa ni u aan ŋmaa yakr tɔb chee na, le yaa loon bui si ke ni li dooni ŋiwaa kan, aa taa kii tii u. Aa ni aayaajatiib aa kee dii ŋiwaa ngbaan.

⁷ Nibaakan bi ponn ni ubaa yaa pɔɔn ubaa ke u ŋmann nimi ke ni li dooni biniyayam bi koo gbɔk nimi, bee binib bi bi dandar na aawaa kan,

⁸ ni taa cha u ŋmann nimi aan ni san dii u, ni taa pel waah len pu na kpala. Ni taa san u kinimbaak kpala, ki taa biin u pu.

⁹ Ni ku u. Sin u, u pue len aa chee kina na kan, aa piin ki li mae u ŋitakpal aan ki cha biken kpee aa pu.

¹⁰ Ni mae ŋitakpal ku u, ba pu? u ban u ŋmann nimi aan ni yii Nidindaan Uwumbɔr u nyan ni nimi Ijipt aatiŋ ni, ki nyan nimi tinaagbiir ni na la.

¹¹ Israel yaab mɔmɔk yaa ŋun naah ku u pu na kan, bi ga san ijawaan, le ubaa aan ki ŋa titunwanbir ngbaan aaboln.

¹² “N‑yoonn mu ni ti bi ntim mu Nidindaan Uwumbɔr di tii nimi na ni,

¹³ nibaakan ni ga ŋun ke titunwanbirdam bi ye nido yaab na mu ŋmann binaabitiib kitiŋ ki ponn ni bi bi na, le ki cha bi dooni ŋiwaa, ŋiwaa ŋi naa kee doon ŋi na,

¹⁴ ni yaa ŋun bi len kina aabɔr kan, ni pɔɔn nibaa ki fiir lik, ki bee ti mbamɔm; ti yaa ye mbamɔn kan,

¹⁵ ni kpaan ki ku binib bimɔk bi kitiŋ ngbaan ni na, ni baawakor mu. Ni kuln kitiŋ ngbaan mɔmɔk.

¹⁶ Ni kuun ni kitiŋ ngbaan aawan mɔmɔk nan kpaan kinyaŋ ni, ki see kitiŋ ngbaan ni kaawan mɔmɔk, aan ni li ye kitork aapiin ki tii Nidindaan Uwumbɔr. Ni cha kitiŋ ngbaan gaar kina ki li ye ŋilangben; ubaa taa ki maa kitiŋ ngbaan daalbaadaal.

^17-18 Ni taa yoor tiwan ni Uwumbɔr bui ke ni bii, kitiŋ ngbaan ni na, ki li joo nibaa; nima kan, Uwumbɔr aaŋuusakpeln ga sɔŋ, le u ga san nimi kinimbaak. Ni yaa joo waakaal i m joo tuk nimi din wee na, ki ŋani waah gee pu na kan, le u ga san nimi kinimbaak, ki cha ni pɔr pam, ke waah nan puu pu tii niyaajatiib na.