Ikaal 10 - Uwumbɔr aagbaŋ

Moses aah nan ki gir ti gaa Uwumbɔr Aakaal lelee pu na aabɔr

¹ “N‑yoonn ngbaan le Uwumbɔr bui mi ke, ‘Kpii ŋitakpapapan ŋilee ŋi naahn njan yee na, aan ki ŋa ŋikpan aadakaa mu, ki di ŋi ŋa u ponn ni.

² Dan m chee lijool paab, aan m nan ki ŋmee ŋitakpapapan ngbaan pu, ke maah nan ŋmee ŋima na pu, aan aa di lii wii na, aan aa di ŋi ŋa dakaa ngbaan ni.’

³ “Nima pu na, m nan di lisiijal aadɔ le kpii dakaa ngbaan, ki kpii ŋitakpapapan ŋilee ke njan yee na, le ki di ŋi jon lijool paab.

⁴ Uwumbɔr nan ŋmee ŋitakpapapan ngbaan pu tibɔr chachaan ti u nan ŋmee njan, aan ni ye waakaal kipiik i u nan di tii nimi, buyoonn ni nan kuun lijool ngbaan taab, aan u len ni chee tibɔr mmii ni na. Uwumbɔr nan di ŋitakpapapan ngbaan tii mi,

⁵ le m fenn ki sunn ni lijool ngbaan taab. Uwumbɔr aah nan bui mi pu na, m nan di ŋi ŋa dakaa ngbaan ni, le ŋi beenin bi u ponn ni, ki nan saa din wee.”

Aaronn aah kpo pu na

⁶ Le Israel yaab nan fii Jaakann yaab aanyunbun ibaa chee, ki buen Mosera aatiŋ ni. Nima chee le Aaronn nan kpo, le bi sub u kitiŋ ngbaan ni, le ujapɔɔn u bi nan yin u ke Eleasar na nan kal ute aajal pu, ki ye utotoor.

⁷ Bi nan ki nyan nima chee ki fii buen Gudgoda aatiŋ ni, ki ki fii nima mu ki ti fuu Jotbata aatiŋ ni, nima chee nan kpa nnyun pam.

⁸ Baah nan bi lijool ngbaan chee na, le Uwumbɔr nan nyan Liifai aanibol ke bi li lik Nkaal Aadakaa ngbaan, ki li tun bitotoorb aatuln tii u, ki li joo waayimbil ŋani tinyoor ŋani waanib pu. Liifai yaab laa beenin tun lituln ngbaan ki nan saa din wee.

⁹ Kina pu le baa nan yakr kitiŋ tii Liifai yaab aanibol ke biken na. Baah nan gaa ipiin i na le ye ke bi nan kpa nsan ke bi li ye Nidindaan Uwumbɔr aatotoorb, ke waah nan puu pu na.

¹⁰ Moses nan ki bui ke, “M nan bi lijool ngbaan aapaacham nwiin pu ni kinyeek, ki ti saa iwiin imonko ilee, ke maah nan ŋa njan pu na, ki gaŋni Uwumbɔr. Le Uwumbɔr ki ŋun tii mi; u nan kii ke waan ki kuln nimi.

¹¹ U nan bui mi ke m sunn ni, ki nan loln ni pu nsan, aan ni ŋmaa buen ti gaa kitiŋ ki u nan puu ke u ga di tii niyaajatiib na.

Uwumbɔr aah ban waanib li bi pu na

¹² “Israel yaab, li pel man Nidindaan Uwumbɔr aah ban ni li bi pu na: Ni li dooni Uwumbɔr, ki li ŋani waah bui ke ni ŋa pu na. Ni li gee u, ki li joo nisui mɔmɔk tun waatuln.

¹³ Ni li joo waakaal mɔmɔk. Din wee na, m ban m di i tii nimi aan i li kpa tinyoor ki toor nimi.

¹⁴ Uwumbɔr le yeh paacham, ni dulnyaa, ni tiwan nimɔk bi u ni na.

¹⁵ Uwumbɔr aah gee niyaajatiib sakpen pu na, le u nyan nimi baanja ŋinibol mɔmɔk ni, le ni beenin ye waanib ki nan saa din.

¹⁶ Nima pu na, n‑yoonn mue ki joo cha, ni kii Uwumbɔr aamɔb, ki di cha nimi aatafalaaŋun ngbaan.

¹⁷ Nidindaan Uwumbɔr le jer dindatiib mɔmɔk, le ki kpa mpɔɔn mu ki jer ipɔɔn mɔmɔk. Waah ye usakpiin ki kpa mpɔɔn na, le ni ŋeer ke ti li san u ijawaan. Waa kpa imaagann, le kaa gaal igaŋgaŋlik.

¹⁸ Uma le lik nkpobim, ni bikpopiib, ki gee biwɔwɔm bi koo ti chee na. Uma le tii bi tijikaar ni tiwanpeenkaan.

¹⁹ Nima pu na, ni li gee biwɔwɔm bi koo ni chee na; ba pu? ni mu nan ye biwɔwɔm le Ijipt aatiŋ ni.

²⁰ Ni kii Nidindaan Uwumbɔr aamɔb aan ki li dooni uma baanja. Ni li si chob ki dii u mbamɔm, ki li puur tipuur waayimbil baanja pu.

²¹ Ni li pak u. Uma le ye nimi Aawumbɔr, le ninimbil kan waah ŋa lijinjiir aawan nimɔk ki tii nimi na.

²² N‑yoonn mu niyaajatiib nan buen Ijipt aatiŋ ni na, bi nan ye binib imonko itaa ni kipiik baanja la, le dandana wee, Nidindaan Uwumbɔr cha ni wiir sakpen ke iŋmabi i bi kitaapaak na.