Daniel 6 - Uwumbɔr aagbaŋ

Baah nan di Daniel ŋa ichinn aabuu ni pu na

¹ Le Darius nan siin ke u ga nyan biyidam nkub ni moninko aan bi li joo waanaan ni aatun.

² U nan lee binib bilee ki di kpee Daniel pu ke bi li lik biyidam ngbaan aatuln, ni ubɔr mu aageehn.

³ Naa nan yunn le Daniel nan mɔk ke u ye unii u nyi waatuln ki jer uŋeen aatɔtiib bilee na, ni biyidam na mu la. Waah nan nyi tiwan ki ti nyaŋ sakpen pu na, ubɔr nan ŋa nlandak ke u di u ŋa waanaan ngbaan mɔmɔk aayidaan.

⁴ Le uŋeen aatɔtiib na, ni biyidam na nan ban isan ke bi bii u waah joo nnaan ngbaan pu na, kaa ŋmaa kan nsan mu pu bi ga di bii u na; ba pu? Daniel nan tun waatuln ni ibamɔn la, kaa kpa beebee.

⁵ Le bi bui tɔb ke, “Taan ŋmaa kan nsan mu pu ti ga ŋmaa di galn Daniel na. Nsan mu diin na le ye waah dii Uwumbɔr aasan mu na.”

⁶ Kina pu le bi nan buen ti kan ubɔr ki bui u ke, “Ubɔr Darius, Uwumbɔr tii si limɔfal li fɔk na.

⁷ Timi bimɔk lik saanaan na, biyidam, ni butɔb aajab aaninkpiib, ni bi chuun manni bininkpiib bee na, ki di kpee bininkpiib bi gur na kii ke mpɔɔndaan siin nkaal aan ki cha mu li pɔɔ. Siin nkaal ke iwiin piitaa i choo na ponn ni, ubaa taa ki mee liwaal, bee Uwumbɔr ubaa, bee unibɔn ubaa chee tiwan see sin mpɔɔndaan baanja. Unii umɔk yii, ki bii nkaal ngbaan na kan, bi di u mee ŋa ichinn aabuu mu ni ichinn gbii na.

⁸ Kina pu na, cha mpɔɔndaan siin nkaal ngbaan ki di saanaŋ nyii mu pu, ki cha mu aatuln piin. Mu li ye Media yaab, ni Pesia yaab aakaal mu kaan ki kpeln na.”

⁹ Le ubɔr Darius di waanaŋ nyii kina aakaal pu.

¹⁰ Daniel aah ŋun ke ubɔr di waanaŋ nyii nkaal ngbaan pu na, le u kun linampal. U nan ti koo paacham aadiik ni, waadichal ponn ni. Kidiik ngbaan aatakolu tiib bibaa nan lik Jerusalem aatiŋ wɔb la. Nima chee, le u nan gbaan ke waah ti ŋani pu n‑yoonn mɔmɔk na, takolu tiib bi piir na chee, ki mee Uwumbɔr nfum mutaa nwiin mubaa.

¹¹ Daniel aadim aah kan u bi mee Uwumbɔr na,

¹² le bi mɔmɔk buen ubɔr chee ke bi ti galn Daniel. Bi nan len ke, “Mpɔɔndaan, aa di saanaŋ nyii nkaal mu pu ke iwiin piitaa i choo na, unii umɔk mee liwaal libaa, bee Uwumbɔr ubaa, bee unibɔn ubaa chee tiwan, kaa ye sin chee na kan, bi di udaan mee ŋa ichinn aabuu mu ponn ni ichinn gbii na.” Le ubɔr kii ke, “Een, nkaal mu pɔɔ ki ye Media ni Pesia yaab aakaal, kaan ŋmaa kpeln na.”

¹³ Le bi bui ubɔr ke, “Unaagbiija Daniel, u nyan ni Juda aatiŋ ni na aa pak mpɔɔndaan, kaa dii saah siin nkaal mu na. U mee Uwumbɔr nfum mutaa nwiin mubaa n‑yoonn mɔmɔk la.”

¹⁴ Ubɔr aah ŋun kina na, usui nan bii pam, le u pɔɔk ubaa ke u kan nsan ki gaa Daniel lii. U nan bi pɔɔni ubaa ki ban kina aasan le nwiin ti lir.

¹⁵ Le bijab ngbaan ki gir buen u chee ki ti bui u ke, “Mpɔɔndaan nyi ke Media ni Pesia yaab aakaal mu ubɔr di waanaŋ nyii mu pu na aan ki ŋmaa kpeln daalbaadaal.”

¹⁶ Kina pu le ubɔr nan tii nsan ke bi ti chuu Daniel ki di u mee ŋa ichinn aabuu mu ichinn gbii na ni, le ki bui Daniel ke, “Saawumbɔr, u aa di aasui ni saalandak mɔmɔk tii u na gaa si lii.”

¹⁷ Le bi di litakpal ŋeeb mbuu ngbaan aamɔb, le ubɔr di uma ubaa aanaŋ ni waaninyuum aanaŋ nyii li pu, ke ubaa taa ŋmaa nyan Daniel.

¹⁸ Le ubɔr gir kun, kaa ti ŋmaa geen kinyeek ngbaan, kaa jin tijikaar, kaa cha bi gbiir ngbiir tii u liyaadaal ngbaan.

¹⁹ Kichakpinaanyeek ni le ubɔr fii ki ŋa mala ki buen mbuu ngbaan chee.

²⁰ Waah ti fuu nima chee na, le u yin mala ke, “Daniel, Uwumbɔr u kpa limɔfal na aatutunn, Uwumbɔr u aa dii ni ibamɔn na ŋman ki gaa si lii ichinn ngbaan chee ee?”

²¹ Le Daniel kii ke, “Uwumbɔr tii mpɔɔndaan limɔfal li fɔk na.

²² Uwumbɔr tun ni waatuun le u nan kiir ichinn ngbaan; yaa ŋmaa ŋa mi nibaa. Waah nyi ke maa tun taani ubaa kaa ti ki ŋa mpɔɔndaan mu tibaa na, le u ŋa kina.”

²³ Ni nan mɔɔr ubɔr ni ti nyaŋ, le u bui ke bi daa nyan ni Daniel mbuu ngbaan ni. Le bi daa nyan ni u ki kan ke nibaa aa ŋa u; ba pu? u nan gaa kii ke Uwumbɔr ga nyan u.

²⁴ Le ubɔr bui ke bi chur binib bi mɔmɔk nan galn Daniel na, ki nan di bi mɔmɔk, ni bipuutiib, ni baabim mee ŋa mbuu ngbaan ni. Waahr aan bi ti lir mbuu ngbaan aataab na, ichinn ngbaan nan bib chur bi ki nyii kool baakpab.

²⁵ Le Ubɔrkpaan Darius ŋmee kigbaŋ tii ŋitimbol mɔmɔk, ni ŋinibol mɔmɔk, ni iliin mɔmɔk aanib kitiŋ kee pu ke: “M dooni ni mɔmɔk.

²⁶ Min le len ke maanaan mɔmɔk ni, binib mɔmɔk li san ki pak Daniel Aawumbɔr. U ye Uwumbɔr u kpa limɔfal na la, le u ga li joo dulnyaa ki ti saa n‑yoonn mu kaa kpa ndoon na. Ubaa aan ŋmaa bii waanaan, le waapɔɔn mu aan ŋmaa doo.

²⁷ U gaal binib lir ki cha bi ŋmar; u tun iwaan, ni lijinjiir aatuln paacham, ni kitiŋ do. U cha ichinn aa ŋmaa ku Daniel.”

²⁸ Kina pu na, Daniel nan kan nwankam n‑yoonn mu Darius ni Sairus u nyan ni Pesia aatiŋ ni na nan joo kitiŋ ngbaan.