Aisaya 62 - Uwumbɔr aagbaŋ

¹ M ga len ki pɔɔk Jerusalem yaab aataakpab; maan di cha limeel ni pu see ni ŋmar, le nimi aaŋann li wiin ke kinyeek aamii aah wiin pu na.

² Jerusalem, ŋitimbol ga kan saatunyaan. Ŋaabɔrb ga kan saawangol, le aa ga li kpa liyimbipɔln, liyimbil li Uwumbɔr ubaa ga tii si na.

³ Aa ga li ŋan ki wiin chain ke tiwan ni kpa kidaak saakpen na, ki ga li bi ke kibɔryikpupuk na le Uwumbɔr chee.

⁴ Ubaa aan ki yin si ke, “Baah yii u na,” kaan ki yin saatiŋ ke, “Upii u aachal san cha u na.” Saayimbipɔln le ga li ye ke, Hefsiba. Le saatiŋ mu yoo li ye ke, Bula, ba pu? Uwumbɔr aanimbil gbiin si, ki ga li bi ke chal na le ki tii saatiŋ.

⁵ Unachipɔɔn aah yoor upii u kaa nyi uja na pu na, kina le Uwumbɔr u naan si na ga yoor si ŋa upuu. Unachipɔɔn aah yoor ubɔɔn aan ni mɔ u pu na, kina le Uwumbɔr aasui ga li piin aa pu.

⁶ Sin Jerusalem, saagon paab le m ga kaan bikikiib; bi taa li ŋmin nwiin pu ni kinyeek mu. Bi li teer Uwumbɔr tipuur ti u puu na, ki taa cha u suln ti.

⁷ Bi taa cha u fuur kpala ki ti saa buyoonn u ga ki giin Jerusalem siin kaasisiiyaan, ki ŋa ki kitiŋ ki dulnyaa mɔmɔk pak na.

⁸ Uwumbɔr puu tipuur ti pɔɔ na, le waapɔɔn pu u ga ŋa waah puu pu na ke: “Saadim aan ki di saajikaabim ŋa baajikaar, le biwɔwɔm mu aan ki nyu nimi aadaan.

⁹ Nimi bi bun ki nan chee nimi aajikaabim na, le ga nan ji ŋaasaa aan ki pak Uwumbɔr. Nimi bi ŋum ki lik ndaan aasubil aasui na, le ga nyu ŋaadaan min Uwumbɔr Aadichal aachin ni.”

¹⁰ Jerusalem aanib, nya kitiŋ ngbaan ni man, ki naan nsan kiir nimi aanib bi gir choo kun ni na. Naan nsan mu waa na man; nyan ŋitakpal mɔmɔk man, ki siin limɔkl aan ŋitimbol mɔmɔk bee ke

¹¹ Uwumbɔr bi mooni kitiŋ kee mɔmɔk pu ke: “Bui Jerusalem aanib ke Uwumbɔr choo u nan gaa nimi lii, ki joo ni binib bi u gaa bi lii na.”

¹² Bi ga li yin nimi ke, “Uwumbɔr aanib bi bi chain na,” ki ki yin nimi ke, “Binib bi Uwumbɔr gaa bi lii na.” Bi ga yin Jerusalem ke, “Kitiŋ ki Uwumbɔr gee ki na,” ki ki yin ki ke, “Kitiŋ ki Uwumbɔr aan suln ki bɔr na.”