Aisaya 58 - Uwumbɔr aagbaŋ

Kimɔlul ki ye mbamɔn na

¹ Uwumbɔr bui ke, “Li tar man mpɔɔn pu naah gee pu na. Bui maanib Israel yaab baatunwanbir pu.

² Binib bee dooni mi iwiin mɔmɔk, ki len ke bi neen ke bi li nyi maabimbin ki kii maakaal. Bi bui ke bi ban m tii bi ikaal i bi chob na la, ki bui ke bi neen ke bi li dooni mi.”

³ Binib ngbaan baa ke, “Ba ŋa ti lulni bumɔb, le Uwumbɔr aatafal aa bi ti ni? Ba ŋa ti sunn tibaa taab, le waa pel ti chee?” Uwumbɔr bui bi ke, “Mbamɔn aah ye pu na le ye ke n‑yoonn mu ni lul bumɔb na, le ni bi ban nibaa aageehn le ki muk nimi aatutum.

⁴ Nimi aamɔlul aayoonn le ni waar le ki kpak ki jaa. Ni dak ke kimɔlul kimina aaboln ga cha m pel nimi aameel aa?

⁵ Ni yaa lul bumɔb kan, le ni muk nibaa, le ki tiin niyil ke kimook ki yɔl na, ki di tiwan ni saak kuub na aakekeln yar, ki di nfatan yɔk yɔk ŋi pu, ki doon paan. Nimina le ni yin bumɔb aalulm aa? Ni dak ke nima ngbaan ga piir nsui ii?

⁶ “Maah ban kimɔlul ki aaboln na sɔ: Chuu nyan man limukl aakululn ti ni di buu bigiim na, ni inyamɔn aatuln li ni di tun bi na bi pu, ki cha bi li chuun bibaa pu.

⁷ Yakr man nimi aajikaar tii nkon aah joo binib bi na, ki piir nimi aadichal tii bigiim bi kaa kpa nkookoo yaan na. Tii binib bi kaa kpa nibaa peeni na bi peen, ki li joo nido yaab man.

⁸ “N‑yoonn ngbaan le maaŋann ga dan ni chee ki wiin ke kichakpiik ni aawiin na, le nimi aabuun mɔmɔk ga yann mala. M ga li bi ni chee n‑yoonn mɔmɔk ki gaa nimi lii; maah ga li bi ni chee pu na ga li kii nimi ŋipepel mɔmɔk pu.

⁹ Le ni yaa mee mi kan, m ga kii nimi aameel. Ni yaa yin mi kan, m ga kii nimi. “Ni yaa kuln limukl, ni lik‑seen, ni tibɔbir mɔmɔk,

¹⁰ ki yaa tii nkon aah joo binib bi na tijiir, ki cha binib bi lann na mu kan kan, n‑yoonn ngbaan le mbɔmbɔɔn mu maln goln nimi na ga daa labr nwiihn mu wiin ke nwiin pu aawiin na.

¹¹ Le m ga li kii nimi n‑yoonn mɔmɔk ki tii nimi tiwan ni ŋan na. M ga cha ni li kpa laafee ki pɔɔ. Ni ga li bi ke tikpin aasaak ki kaa lann nnyun na la, ki naahn uyayak aanyunbun mu kaa foor na.

¹² Jerusalem aanib ga ki gir maa nimɔk nan ye tilangbenn n‑yoonn mu jer na, ki ki gir maa ŋidinyik ŋi nan puen bi na pu. Binib mɔmɔk ga bee nimi ke ni ye binib bi ki gir maa ŋigon ŋi lir na, ki ki fiini ŋidichal ŋi lir na siini na la.”

Likpaakool daal aajoom aanyoor

¹³ Uwumbɔr bui ke, “Aa yaa joo likpaakool daal ke nwiin mu bi chain na, kaa ban aabaa aanyoor nwiin ngbaan daal; aa yaa pak maawiin mu bi chain na, kaa buen lisachuln, kaa tun lituln, kaa len bɔyɔlyɔl nwiin ngbaan daal kan,

¹⁴ aa ga kan mpopiin mu nyan ni saah tun maatuln pu na ni. M ga cha dulnyaa mɔmɔk li pak si, le aa ga ji mmɔɔn, kitiŋ ki m nan di tii aayaaja Jakob na pu. Min Uwumbɔr le len kina.”