Aisaya 49 - Uwumbɔr aagbaŋ

Israel le ye ŋitimbol mɔmɔk aawiihn

¹ Nimi ŋitimbol ŋi bi dandar na, li pel man, nimi binib bi koo dandar na, li pel man. Waahr aan bi nin ma mi na, le Uwumbɔr nan lee mi, ki di mi siin ke m li ye waatutunn.

² U cha maamɔliin ka ke kijaak aajuk na. U nan joo mi uŋaal ni ki bɔr mi. U naan mi ke mpiin mu ka ki ŋeer bi too mu na la.

³ U nan bui mi ke, “Israel aanibol, sin le ye maatutunn; sin pu, le binib mɔmɔk ga pak mi.”

⁴ Le m bui ke, “M tun pam, le naa kpa tinyoor. Maapɔɔn mɔmɔk doo a, le maa nyan tinyoor tibaa.” Le m tee kpa limakl ke Uwumbɔr ga sil mpuwɔb; u ga pa mi maah tun pu na pu.

⁵ Waahr aan bi nin ma mi na, Uwumbɔr nan nyan mi siin; u nan ŋa mi waatutunn ke m giin ni waanib, ke m giin ni waanib Israel yaab bi yaa na. Uwumbɔr nyuŋni mi; uma le tii mi mpɔɔn.

⁶ Uwumbɔr bui ke, “M kpa lituln li pɔɔ na ke sin maatutunn tun. Naa ye ke aa giin Israel yaab bi ŋmar na aapɔɔn tii bi baanja, m ga cha aa li ye ŋitimbol mɔmɔk aawiihn ki tii dulnyaa aanib mɔmɔk nsan ke bi ŋmar.”

⁷ Israel yaab Aawumbɔr u bi chain, ki gaal bi lir na bui baah lik unii u fam na, aan ŋinibol mɔmɔk yii u, aan u ye bitinjoob aanaagbiija na ke: “Bibɔrb ga kan ke aa nyan saamuk ni le ki ga fii sil ki tii si kipak; Kitiŋ aajojoob mu ga kan kina, le ki gbaan kitiŋ ki nyuŋ si.” Uwumbɔr aah lee waatutunn pu na le ga cha kina ŋa; Israel yaab Aawumbɔr u bi chain na joo waah puu tipuur ti na la.

Jerusalem aah gir sil mpɔɔn pu pu na

⁸ Uwumbɔr bui waanib ke, “Ni yaa ŋeer ke m gaa nimi lii kan, le m ga san nimi kinimbaak, aan ki pel nimi aameel. M ga li kii nimi ki joo nimi le ki puu tipuur tii binib mɔmɔk, nimi pu. M ga cha ni ki gir kal nimi aatiŋ ki dɔ fam dandana na pu.

⁹ M ga bui biyom ke, ‘Li cha man, ni fuur a,’ ki bui binib bi bi mbɔmbɔɔn ni na ke, ‘Dan nwiihn ni man.’ Bi ga li naahn ipiih i ŋmɔ timoor ŋigongon paab na la;

¹⁰ nkon ni nnyunyuu aan ki chuu bi. Le nwiin, ni nteersakpiin pu aatotoŋ aan ki see bi, ba pu? u gee bi na le ga li joo bi. U ga mɔk bi uyayak aanyunbun chee.

¹¹ M ga naan nsan mu waa na ŋijoo paab, ki toor nsan tii maanib aan bi dii.

¹² Maanib ga nyan ni dandar, bi ga nya ni ŋŋangan wɔb ni liwilir wɔb, ki nya ni Aswann aatiŋ ki bi ŋŋangii wɔb na.”

¹³ Kitaapaak ni taab, li gaa mpopiin aalahn man. Cha ŋijoo li gaa ilahn man. Uwumbɔr ga sɔŋ waanib aasui; u ga san waanib bi bi falaa ni na kinimbaak.

¹⁴ Le Jerusalem aanib bui ke, “Uwumbɔr san cha timi a. Waa ki nyi ti bɔr.”

¹⁵ Le Uwumbɔr gar ke, “Upii ga ŋmaa suln waabo bɔr, kaan li gee ubo u u ma na aa? Hali upii yaa suln waabo bɔr kan, mma aan suln ni bɔr.

¹⁶ Jerusalem, maan ŋmaa suln nibɔr. M ŋmee nimi aayimbil paan ŋŋaal pu.

¹⁷ Binib bi ga ki gir maa Jerusalem aatiŋ siin na ga fuu ni dandana, le binib bi nan bii si na ga nya.

¹⁸ Fenn ki lik tiwan ni bi ŋani na. Saanib bi kuuni tɔb chee, ki choo kun ni la. Maah po ye Uwumbɔr u bi n‑yoonn mɔmɔk na pu na, kina le aa ga li kpa limakl saanib pu, ke ubɔndinn aah mak waaleenyaan pu pu na.

¹⁹ Saatingbaln nan bii ki kuln, le dandana ma li ga li par ki tii binib bi choo bi nan koo li ponn ni na. Le binib bi nan kuln saatingbaln ngbaan na ga li gur daa aa chee.

²⁰ Saanib bi bi ti ma bi tinaagbiir ponn ni na ga nan bui si daalbaadaal ke, ‘Kitiŋ kee par sakpen a. Kpee timi kitiŋ aan ti koo ki ni.’

²¹ Le aa ga bui ke; ‘Ŋma ma mbim mue mɔmɔk tii mi? Maabim nan wɔŋ, le maa nan ki ŋmaa ma biken. Bi nan di mi buen tinaagbiir ni; ŋma kpiin mbim mue? M nan gur mbaa baanja la, mbim mue mɔmɔk nyan ni la chee?’”

²² Tidindaan Uwumbɔr bui waatimbol ke: “M ga tii ŋitimbol limɔkl aan bi kunn ni saabim.

²³ Bibɔrkpaam ga li naahn aatetiib la; le bipiibɔrb naahn aanatiib. Bi ga sunn bibaa taab aanimbiin ni ki nyuŋ si; bi ga sunn bibaa taab ki mɔk si baapak, le aa bee ke min le ye Uwumbɔr; unii umɔk ka kii maaterm na aan lir.”

²⁴ Aa ga ŋmaa gaa butɔb aaja chee waah gaa tiwan ni kijaak ni na aa? Aa ga ŋmaa gaa biyom mbiindaan chee ee?

²⁵ Le Uwumbɔr giin kii ke, “Kina le sil ga ŋa. Bi ga gaa butɔb aaja chee biyom, ki gaa ubiindaan chee waah gaa tiwan ni kijaak ni na. Unii umɔk tak si na, m ni udaan ga jan, le m ga gaa saabim lii.

²⁶ M ga cha binib bi muk si na ku tɔb ki ŋmɔ tɔb; bi ga nyun tɔb aasin gbii ke baah nyun ndaan le na. Le unibɔn mɔmɔk bee ke min le ye Uwumbɔr u gaal si lir ki cha aa fuur na. Bi ga bee ke min le ye Israel yaab Aawumbɔr u kpa mpɔɔn sakpen na.”