Aisaya 46 - Uwumbɔr aagbaŋ

¹ Babiloŋ aawaa aadoon le na. Bel ni Nebo nan ye ŋiwaa ŋi bi nan dooni ŋi na la, le dandana ma bi di ŋi buu paan ibon pu, ŋi gur ye ŋitun ŋi nyuun na le ki tii ibon i bak na.

² Ŋiwaa ngbaan aa ŋmaa gaa ŋibaa lii, bi nyaŋ ŋi ki di ŋi buen a. Babiloŋ aawaa aadoon le na.

³ “Jakob aayaabitiib, nimi Israel yaab ponn ni bimɔk ŋmar na, li pel m chee man. Buyoonn bi nan ma nimi na, min le nan joo nimi.

⁴ Min le ye nimi Aawumbɔr u joo nimi na ki ti saa buyoonn ni ga por aan niyil piir na. Min le naan nimi le ki ga li joo nimi, min le ga ter nimi ki gaa nimi lii.”

⁵ Min Uwumbɔr bui ke, “Ŋma aan ni ga di mi ŋaŋ udaan? Ubaa ki bi ke min na aa?

⁶ Binib piir baamombil aataakɔr ki nyan salmaa; bi ŋaŋni tikunabr aanyunyuun. Bi ga ban uchaa aan u mɔɔ bi liwaal; le ki gbaan ki doon li.

⁷ Bi ga yoor li ki di buŋ bibɔgbin pu, ki ti di li siin, le li si nima, kaan ŋmaa chuun buen nibaa chee. Unii yaa mee li kan, laan ŋmaa kii, kaan ŋmaa nyan u tibɔbir ni.

⁸ Nimi titunwanbirdam, teer man tibɔr timina; dakl lik maah ŋa pu na man.

⁹ Teer man tibɔr ti nan ŋa n‑yoonn na; tii naadii man ke min baanja le ye Uwumbɔr, ke ubaa aa ki bi ke min na.

¹⁰ Mpiin na le m nan len tiwan ni ga dan na; n‑yoonn mu jer na m nan len tiwan ni ga ŋa na. M nan len ke maalandak aan bee yɔli, ke m ga ŋa maah dak pu na mɔmɔk.

¹¹ M bi yin ni uja ubaa ke u nya ni liwipuul wɔb; u ga boon ni ke kaasaa na ki nan ŋa maah dak pu na. Min le len, le ni ga ŋa kina.

¹² Nimi binib bi aatafal pɔɔ aan ni dak ke linyaŋ chee daa na, li pel ni m chee man.

¹³ M joo linyaŋ aawiin mar ni la, mu aa ki daa kpala. Maanyaŋ aan ki yunn kpala. M ga gaa Jerusalem aatiŋ lii, ki joo ni Israel yaab kipak nima.”